Read Sukuma Bible 2015 – Bibilia Ilagano Lya Kale 2015 Balamuji 20 Bible Online

Balamuji 20 - Sukuma Bible 2015 – Bibilia Ilagano Lya Kale 2015 bible

Balamuji 20

¹A Baisilaeli bibilinga Mispa pye a bose; biza pye mu būsangī bumò, kūfuma Dani kūshisha Beeli-sheba, nū kūfuma ū kū sī ya Gileadi.

²A batongeeji ba ng'anda ja Baisilaeli ī jose būlī ng'wene wīmīīla hipandī lyakwe ū mu kwibilinga kwa banhū ba ng'wa Mulungu; baalī bashilikale shihūmbī magana anè na makūmi ataano, baakoolī ba kūlwīīla shū.

³(A banhū ba lūganda lwa Benjamini bigwa ī gīkī a Baisilaeli bajaga Mispa.) Hūna a Baisilaeli būbawīla, “Bing'we tūwīlagi ūmo yaīlile nose mhayo gwamalofu gīkī gwilonga.”

⁴Ū Nnawī ū ngoshi wa nkīma ūyo walī wabūlagwa ūhaya, “Naalī mu lūgendo nū nke wane; aho nashika Gibea ya mu sī ya banhū ba lūganda lwa ng'wa Benjamini nūūbona nalaale.

⁵Ū mu būjikū a banhū ba Gibea biza bīpīndya ī numba, baalī na ng'hūmbū ja kūnibūlaga ū nene; hūna būng'wiguusīja ū nke wane kūshisha ūcha.

⁶Na lūūlū nūnsola ū nke wane nūmutagūla mapingili mapingili; nūūtwaala ipingili līmò līmò hose pye ū mu sī ja wingīji wa Baisilaeli, nguno bīītile mhayo gwabūbi na gwamalofu ū mu Isilaeli.

⁷Alilūūlū Baisilaeli īkī pye mulīho aha, gūhooyelagi mufunye ū būlamuji wing'we.”

⁸Pye a banhū ūmo baalī bagelelile bīīmīīla, būhaya gīkī, “Atīho nūūlū ūmò wise ū wa kūshoka kwiheema; nūūlū atizilonga munhū ose ose wa kūja kū ng'wakwe.

⁹Ū mhayo gwa kwīyīītīla ī Gibea gūlī gīkī, tūkwīdumīla wa ndīīma ja kūsolwa wa kūtūlīja mbale.

¹⁰Tūkūyūsola banhū ikūmi kūfuma mu būlī igana lya banhū ba ng'anda jose ja Baisilaeli; hama ū kūfuma ū mu banhū shihūmbī, tūkūsola mo igana līmò; ū mu banhū shihūmbī ikūmi ū ng'weene tūkūsola banhū shihūmbī shimò. A benabo bakūbiza batwaji ba shilīwa na shiigunaanīlo shingī ū kū bashilikale. A bashilikale ūlū balashike ī Gibea ū kū banhū ba lūganda lwa ng'wa Benjamini, bakūbinha īyo ībiigeleelilwe kūlwa mhayo gwamalofu ūyo baagwītile mu sī ya Isilaeli.”

¹¹Na lūūlū pye gete a Baisilaeli a bagosha bibilinga mu būsangī būmò kwilwisha nū nzengo gwenūyo.

¹²Ī ng'anda ja Baisilaeli jūūtūma banhū hose pyī ū mu sī ya banhū ba lūganda lwa Benjamini būja bakūhayaga, “Ni yajile kinehe nose mhayo gwamalofu gīkī gwītwa ū mu bing'we?

¹³Alilūūlū, bafunyagi a banhū ba nhūngwa ja būbi gīko, abo balī ū mu Gibea tūbabūlage, tūwīnje ū būbi wenūbū ū mu Baisilaeli.” Alīyo a banhū ba lūganda lwa ng'wa Benjamini batabadegelekile a badūgū babo a Baisilaeli.

¹⁴Bikobya dūhū nabo kūfuma hose pyī ū mu mizengo yabo, biza bibilingīla Gibea kwilwisha būlūgū na a Baisilaeli.

¹⁵A banhū ba lūganda lwa ng'wa Benjamini bitana bashilikale kūfuma ū mu mizengo yabo, ū lūshikū lwenūlo bigela shihūmbī makūmi abīlī na shitandatū; bamani ba kūlwīīla shū, kūleka kūbabala abo magana mpungatī a ba mu nzengo gwa Gibea.

¹⁶Ū mu bashilikale benabo baalīmo bagosha basolwa magana mpungatī ba lūmoso, būlī ng'wene walī ndeeba no, atūūfuuja shikolo shose shose, nūūlū lūkabiza lūywīīlī lūmò ūlū ūlūluuta iwe bo kūtūmamīla lūtaago.

¹⁷A Baisilaeli abo bakikuminga, kūleka kūbabala a ba lūganda lwa Benjamini, baalī bagosha shihūmbī magana anè, pye banhū ba būlūgū, bamani ba kūlwīīla shū.

¹⁸Na lūūlū a Baisilaeli būja Beeseli[20] kūbūūja kūlī SEEBA. Būūhaya gīkī, “Ūmo tūlī ng'wenūmu, nani atonge ū kūja kwilwisha na a banhū ba lūganda lwa Benjamini?” Ū SEEBA ūhaya, “Yuda ni atongage ū kūja.”

¹⁹Ha ntondo yaho, a Baisilaeli būmisha dilū, beegeela ī Gibea būūkakoma ng'hambī yabo.

²⁰Hūna a Baisilaeli būbasanga ī Gibea a banhū ba lūganda lwa ng'wa Benjamini, bamba būlūgū kwilwisha nabo.

²¹A banbū ba lūganda lwa ng'wa Benjamini aho baapuluka ū mu nzengo gwa Gibea, būbahūlūla Baisilaeli shihūmbī makūmi abīlī na shibīlī ū lūshikū lwenūlo.

²²Alīyo a Baisilaeli bitimbya ng'holò, gīkī balaaje hangī ū kwipandī lyenīlo īlo baalī ū lūshikū lwa kwandya, bakambe hangī ū būlūgū.

²³Kwike a Baisilaeli būja kūnīlīīla ū SEEBA taame; būnīlīīla na kūmūūja balīhaya, “Tūje hangī ū kū būlūgū tūkilwishe na a badūgū bise a banhū ba lūganda lwa ng'wa Benjamini?” Nang'hwe ū SEEBA ūbawīla, “Jagi ko mukalwe nabo.”

²⁴Na ng'hana nū mu lūshikū lwa kabīlī lwaho a Baisilaeli beegeela ko kwamba būlūgū, gīkī balwe na a banhū ba lūganda lwa ng'wa Benjamini.

²⁵Ū lūkangala lwenūlū a banhū ba lūganda lwa ng'wa Benjamini aho baafuma ū mu Gibea gīkī bilwishe nabo, būbabūlaga Baisilaeli shihūmbī ikūmi na shinaane, bose bamani baakūlwīīla shū.

²⁶Hūna pyī ī libità lya bashilikale ba Baisilaeli būlinha bajile Beeseli; būshika bigaasha kū būtongi bo ng'wa SEEBA bakūlīlaga. Ū lūshikū lwenūūlo būfunga, būfunya na shitambò sha kūpemva hamò na shakwinha sha būsangī kūlwa nguno ya ng'wa SEEBA.

²⁷Hanuma būmūūja a Baisilaeli ū SEEBA, (ū mu shikū jenījo ī lisandīko lya būlagane bo ng'wa SEEBA lyalī kwenūko;

²⁸nū Finehasi ū ng'witūnja o ng'wa Elieza, ng'witūnja o ng'wa Alooni, wikalaga kwenūko akūtūmamaga kū būtongi walyo.) Na lūūlū būbūūja balīhaya gīkī, “Tūje hangī ū kwilwisha būlūgū na a badūgū bise a banhū ba lūganda lwa Benjamini, nūūlū hamo tooye lūūlū?” Ū SEEBA ūbawīla, “Jaagi nguno ī ntondo nakūbatūūla mu makono ging'we.”

²⁹Hūna a Baisilaeli būsola banhū ba kwibanda mu masaka kūgūpīndīlīja ū nzengo gwa Gibea.

³⁰Ū mu lūshikū lwa kadatū lwaho būja hangī ū kūbadumīla a banhū ba lūganda lwa ng'wa Benjamini; bamba ū būlūgū kwilwisha nū nzengo gwa Gibea gīt'ūmo bīītīlaga na kale.

³¹A banhū ba lūganda lwa ng'wa Benjamini būdutwa kūgūsegenela ū nzengo. Bandya kūbatūla na kūbabūlaga bamò ba banhū aho bakūpeelaga ū mu matogolo nū mu makūūwa; līmò lya makūūwa genayo lyaalī ya kūja Beeseli, līngī Gibea; būbūlaga Baisilaeli ba kūshika gītī makūmi adatū gīko.

³²A banhū ba lūganda lwa ng'wa Benjamini būyiwīla gīkī, “Nī lelo twabapyena gīt'ūmo tūkwītīlaga na kale.” Alīyo a Baisilaeli biwīlaga gīkī, “Tūbapeelagi tūbadute kūja kū makūūwa bagūsegenele ū nzengo.”

³³Pye a Baisilaeli bīnga ū mu mapandī gabo ūmo baalī bihela, būja būūkashika Baali-tamali; hūna a bibandīīji būpuluka ū mu masaka ayo baalī bibanda, ū kwiza kūgūdumīla ū nzengo gwa Gibea būgūfumīīla mu ng'weli.

³⁴Banhū shihūmbī ikūmi ba būdūla mu kalwīīle ka būlūgū ū mu Baisilaeli, būgūsanga ū nzengo gwa Gibea kwilwisha nago būlūgū. Ū būlūgū wenūbo būkabiza wa kalwīīle kabūbi no; alīyo a banhū ba lūganda lwa ng'wa Benjamini baalī batīdeebaga ī mibi īyo yaalī hihī kūbilongela.

³⁵Ū SEEBA ūbapyena a banhū ba lūganda lwa ng'wa Benjamini ū kū būtongi wa Baisilaeli; ū lūshikū lwenūlo a Baisilaeli būbūlaga banhū shihūmbī makūmi abīlī na shitaano na igana līmò, ū kūfuma ū mu banhū ba lūganda lwa Benjamini; bose baalī banhū ba kūlwīīla shū.

³⁶A banhū ba lūganda lwa ng'wa Benjamini būbona hape gīkī baaheewa. A Baisilaeli bakandya kūbapeela a banhū ba lūgūnda lwa ng'wa Benjamini, nguno baalī bamanile gīkī balīho bibandīīji abo baalī baabatūūla hihī nū nzengo gwa Gibea.

³⁷Na ng'hana a banhū abo baalī bibanda bakīīta kaja kaja, būpeela kūja ū mu nzengo gwa Gibea, būshika būgūsaambaalīla wangū wangū, būbamala shū pye a banhū ba mu nzengo gwenūyo.

³⁸A Baisilaeli baalī baagūsha na a bibandīīji gīkī balaagūpembe ū nzengo gūdundumūke lyochi itaale.

³⁹Hūna a Baisilaeli ūlū būbona gīko bakūgalūka bandye būlūgū. Ū ng'wikanza lyenīlo a banhū ba lūganda lwa Benjamini bilembaga balīhaya, “Nī lelo twabapyena gīt'ūmo twalīītīlaga ū mu kalwīīle a ka shikū ījo jaabītile;” na ng'hana būbatūla na kūbabūlaga Baisilaeli (ba kūshika gītī makūmi adatū.)

⁴⁰Alīyo ī lyochi lya kūfuma ū mu nzengo aho lyadundumūka, a banhū ba lūganda lwa ng'wa Benjamini bahayūgalūka, būgūbona ū nzengo ū gose gūkūdundumūkaga lyochi lījile kwigūlya kwilunde.

⁴¹Hū a henaho a Baisilaeli būbagalūkīla; a banhū ba lūganda lwa ng'wa Benjamini bakogoha no, nguno bakabona gīkī yababipīla ī mihayo.

⁴²Bandya kūbapeela a Baisilaeli bajile kwitogolo; alīyo batabūshigile ū būlūgū. A Baisilaeli abo baafumaga ū mu mizengo būbakūūbya būja bakūbabūlagaga.

⁴³Būūbanyamanīja ha gatī a banhū ba lūganda lwa ng'wa Benjamini būbapeeja, būbapandīkīla bbihī dūhū; kīya ya Gibea, būbabūlagīla henaho.

⁴⁴Būūgwa banhū shihūmbī ikūmi na shinaane ba mu lūganda lwa ng'wa Benjamini; bose bamani ba kūlwa mu būlūgū.

⁴⁵Aho baagalūka gīkī bapeele kūja kwitogolo bakapīlīle kwiwe lya Limoni, a Baisilaeli būbabūlaga shihūmbī shitanò aho balī ū mu makūūwa ga nzīla. Bongeja kūbakūūbya kūja Gidomu, būbabūlaga hangī bangī shihūmbī shibīlī.

⁴⁶Na lūūlū ū lūshikū lwenūlo būbiza baashila banhū shihūmbī makūmi abīlī na shitaano ū mu lūganda lwa ng'wa Benjamini; a bose bamani ba mihayo ya būlūgū.

⁴⁷Alīyo banhū magana atandatū būnyamuka; būpeelela kwitogolo, būūkapīlīla kwiwe lya Limoni; bikala kwenūko myeji īnè.

⁴⁸A Baisilaeli būshoka ū kū sī ya banhū ba lūganda lwa ng'wa Benjamini, būūkabamala shū pye a banhū nī mitugo, na būlī shose shose īsho baashibonaga. Nī minzengo ī yose īyo bīībonaga bīīpemba moto.