Read Sukuma Bible 2015 – Bibilia Ilagano Lya Kale 2015 Balamuji 3 Bible Online

Balamuji 3 - Sukuma Bible 2015 – Bibilia Ilagano Lya Kale 2015 bible

Balamuji 3

¹A mahanga aya hū gene ayo akagaleka ū SEEBA kūlwa kūbagema a Baisilaeli a bose abo baalī batabūlwile ū būlūgū wa mu sī ya Kanaani.

²(Ū gwenūyo akagwīta kūlwa kūbalanga dūhū a banhū ba shibyalīlwe sha Baisilaeli abo baalī batabītile mu būlūgū; nabo bīībītīle ī mihayo ya būlūgū.)

³A mahanga genayo gaalī aya, sī ya basugi bataano ba Bafilisiti, pye a Bakanaani, Basidoni, Bahīvī abo biikalaga kū ngūlū ja Lebanoni, kūfuma kū lūgūlū lwa Baali-helimoni kūshisha kū nzīla ya Hamati.

⁴A mahanga genaya gakalekwa kūlwa kūbagema a Baisilaeli, kūbabona ūlū bakūbiza biigwi ū kū shilagīlo sha ng'wa SEEBA, īsho walī wabinha bakūlūgenji babo mu nzīla ya ng'wa Musa.

⁵Na lūūlū a Baisilaeli biikala hamò nabo a banhū ba mahanga ga Bakanaani, Bahītī, Baamooli, Bapelizi, Bahīvī, na a Bayebusi.

⁶Na a bashīke babo būyūbatoola, na a boi būyūbazunīlīja a bashīke babo kūtoolwa na a basūmba ba mu mahanga genayo; hama na a baamulungu babo būyūbatūmamīla.

⁷A Baisilaeli bakīīta yabūbi ū miso ga ng'wa SEEBA, nguno bakang'wīība ū SEEBA Mulungu wabo, bandya kūgalamya[6] Maabaalī na Maashela.

⁸A henaho ū būpelanu o ng'wa SEEBA būbapembekela no nīyo a Baisilaeli, ūbajinja mu nkono gwa ntemi Kushani-lishasaimu, wa Mesopotamia;[7] wandya kūbaluhya a Baisilaeli kūshisha ikanza lya myaka īnaane.

⁹Alīyo aho baanīlīīla ū SEEBA, ūbabūūkīja ngunanhi: Osinieli ng'witūnja o ng'wa Kenazi, nzunaye o ng'wa Kelebu; ū munhū ng'wenūyo hū ūbapīja.

¹⁰Nguno Moyo o ng'wa SEEBA akang'wikīīla, ūbiza namuji,[8] wabo a Baisilaeli; ūja na kwilwisha būlūgū nū ntemi Kushani-lishasaimu wa Mesopotamia. Ū SEEBA ūntūūla ū ntemi Kushani-lishasaimu mu nkono gwakwe ū Osinieli, ūng'heeba kībi no.

¹¹Ī sī yūbiza mu mhola ikanza lya myaka makūmi anè, kūshisha ūcha ū Osinieli ū ng'witūnja o ng'wa Kenazi.

¹²A Baisilaeli bīīta yabūbi hangī ū mu miso ga ng'wa SEEBA, aho bīīta ū būbi wenūbo, ū SEEBA ūng'winha nguzu ntemi Eguloni wa Moabu, ja kūbaheeba a Baisilaeli.

¹³Ū ntemi ng'wenūyo ūbalaalīka Baamoni na Baamaleki, hūna ūja kūbadumīla a Baisilaeli, būgūsola ū nzengo gwa mitende.

¹⁴A Baisilaeli būsugwa na ntemi Eguloni wa Moabu ikanza lya myaka ikūmi na īnaane.

¹⁵Alīyo a Baisilaeli aho baanīlīīla hangī ū SEEBA, ūbabūūkīja ngunanhi, Ehudi; munhū wa lūmoso, ng'witūnja o ng'wa Gela wa lūganda lwa Benjamini. A Baisilaeli būntūma ū Ehudi kūja na banhū ī ng'wa Eguloni ū ntemi wa Moabu, kūtwaala goodi.

¹⁶Ū Ehudi walī wabeeja lūshū lwa būlīhu wa kūbiza gītī fuuti īmò na nusu. Ū lūshū lwenūlo ūlūtunga mu nkīmbīlī lūnungeela hitango lya kūgūlū gwa būlyo, hūna ūlūkundīkīja shizwalo īsho walī azwaalile.

¹⁷Aho washika a ha ng'wa ntemi wa Moabu ū Eguloni, ūng'winha ī goodi. Ū ntemi ng'wenūyo walī ngīnu no.

¹⁸Ū Ehudi aho wamala ū kūfunya ī goodi, ūbalaga a biye abo walī wiza nabo bībūkije ī goodi, būja.

¹⁹Ū wei ūshokanya aho washika bbihī na Giligaali, gaalī hoi maashiikolile ga kūlamiwa; ūshika ūng'wīla, “Baba ntemi, nalī na kamhayo kaakūkūwīla tūlī babīlī dūhū.” Ū ntemi ūng'wīla, “Lembeeshaga taame!” Hūna a batūmami bakwe būfuma mo pye a bose.

²⁰A henaho ū Ehudi wegeela aho walī wigaasha ū ntemi iyene mu chumba sha kū golofa sha kwifuulīla makanza ga līīmi ūlū lyasebaga; ūng'wīla gīkī, “Nalī na mhayo nakwenhelaga, naatūmagwa na Mulungu.” Ū ntemi aho wihamba kūbūūka a hisumbī lyakwe,

²¹ū Ehudi ūgoloola ū nkono gwakwe gwa lūmoso, ūlūsopoola ū lūshū ū kūfuma ū kwitango lya kū būlyo, ūnchima ū ntemi lwa munda.

²²Lūūlibīla pyī nī shipīndī shaalo, lūūkapulung'hanya na kū ngongo. Ū Ehudi ūlūleka haaho nguno lūkalung'wa masaasa, būpuluka na būsoso.

²³Hūna ū Ehudi ūfuma hanze kwibīndo, wīlugala ī milyango ya chumba sha kū golofa, ūnugalīla ng'wenūmo.

²⁴Aho wīnga ū Ehudi, a batūmami ba ntemi biiza kūlola; aho bīībona ī milyango ya kū chumba sha kū golofa īlugalilwe, būhaya gīkī, “Mmho ū ntemi wifuulaga kū chumba sha mu gatī.”

²⁵Būūlindīīla kūshisha nose būzwangana, aho baabona wadīīla no no no ū kwīlugūla ī milyango, būsola lūfungūlo būlugūla; būūkang'wipuumūkīja ū saabo būgonzo alambalalile hasī achiile!

²⁶Ū ng'wikanza lya kūlindīīla lyenīlo, ū Ehudi ūhega ajile; ūūkabīta ho a ha maashiikolile ga kūlamiwa, ūpeelela Seila.

²⁷Kūshika kwenūko ūja kū ngūlū ja Efulaimu ūūkafuula mhembe; hūna a Baisilaeli būholomoka kūfuma ū kū ngūlū balīnkūūbīja.

²⁸Ūbawīla, “Nilondeelagi nguno ū SEEBA wītūūlaga mu makono ging'we ī Moabu ya banishi bing'we.” Ng'hana būnondeela, bika bajile kū mongo gwa Yolodani, būūkadima a ha būkīlīlo wa mongo, a hipandī lya kwingīlīla mu Moabu. Batazunīlīgije nūūlū ūmò ū kūkīlīla a henaho.

²⁹Ī likanza lyenīlo būbabūlaga Bamoabu, bagosha ba mbagashūūla, ba kūshika gītī shihūmbī ikūmi; atapūlūgūkile nūūlū ūmò yaya.

³⁰Ū lūshikū lwenūlo a Baisilaeli bīsuga ī Moabu, ī sī yifuula ikanza lya myaka makūmi anaane.

³¹Aho wabīta ū Ehudi, wilonga Shamga, ng'witūnja o ng'wa Anati; ū munhū ng'wenūyo akabūlaga Bafilisiti magana atandatū bo kūtūmamīla nang'ha gwa kūtūlīla ng'ombe. Nang'hwe akabaguna a Baisilaeli.