Read Sukuma Bible 2015 – Bibilia Ilagano Lya Kale 2015 Balamuji 6 Bible Online

Balamuji 6 - Sukuma Bible 2015 – Bibilia Ilagano Lya Kale 2015 bible

Balamuji 6

¹A Baisilaeli bakīīta hangī ī yabūbi ū mu miso ga ng'wa SEEBA; nang'hwe ūbatūūla mu makono ga Bamidiani ikanza lya myaka mpungatī.

²A Bamidiani būbaluhya no a Baisilaeli, kūshisha nose yūbigeleelwa kwibeegeja mahalo mu ngūlū, ga kwilang'hanīla, na machongo na mapilinga.

³Nguno būlī makanza a Baisilaeli baabizaga ūlū bahamba ī shilīwa, Bamidiani biizaga hamò na Baamaleki na banhū bangī ba kūfuma sī ja kīya.

⁴Biizaga baabakenaagūja ī shilīwa shabo ī shoe, pye a mapandī, kūshisha Gaza; baasolaga pye gete ī shikolo ī shipanga ū mu Isilaeli, baalī bataabalekelaga shose shose, jibize ng'holo, ng'ombe, nūūlū nzobe.

⁵Biizaga na mitugo jabo na maheema gabo; bingī no gītī njige. Yaalī shilambu ū kūbabala a banhū benabo nī ngamīla jabo; ūlū bashika bīkenaagūlaga no ī sī.

⁶Ī sī ya Midiani īkabakoya no a Baisilaeli, kūshisha nose būnīlīīla ū SEEBA abagune.

⁷A Baisilaeli aho baanīlīīla ū SEEBA kūlwa nguno ya Bamidiani,

⁸ū SEEBA ūbatūmīla ng'hangi kwiza kūbawīla, “Ū SEEBA Mulungu wa Baisilaeli alīhaya gīkī, A bing'we nakang'wenha kūfuma Misili, nūng'wīnja mu sī ya būsese.

⁹Nakamupula ū mu būdūla bo būsugi bo Misili, nū kūfuma ū mu nkono gwa baluhya bing'we a bose nūng'wīnja, nūūbapeeja būng'wīngīla, nūng'winha bing'we ī sī yabo.

¹⁰Nūmuwīla gīkī, Ū nene nalī SEEBA Mulungu, yaya ū kūbalamya a baamulungu ba Baamooli abo balī ū mu sī īyo mukwikalaga. Alīyo mutanidegelekile.”

¹¹Malaika o ng'wa SEEBA akiiza Ofla, wigaasha mu mbeho ya ntī gwaalī ng'wilaale lya ng'wa Yoashi muna Abiezeli, hipandī īlo ng'witūnja wakwe Gidioni waatūlaga ngano ng'wikamīlo lya mizabibu, kūlwa kūjibisa a Bamidiani batizūjibona.

¹²Ū Malaika o ng'wa SEEBA aho wang'wilongela ū Gidioni ūng'wīla gīkī, “Ū SEEBA alī hamò nang'ho bebe ngosha wa nguzu.”

¹³Nang'hwe ū Gidioni ūnshokeja ūhaya, Ū SEEBA ūlū alī hamò niise, nibūlī īkūtūgwīīlaga mihayo īlī gīkī? Īlī halī ī mihayo yakwe ī ya kūkumya īyo baatūwīīla bakūlūgenji bise bakūhayaga gīkī, “Ū SEEBA atatwīngije mu sī ya Misili? Alīyo ī haha ū SEEBA watwībile gete, watūponije mu nkono gwa Bamidiani.”

¹⁴Hūna ū SEEBA ūngalūkīla ūng'wīla, “Jaaga ū mu būdūla wako weenūbū, ūkabapīje a Baisilaeli kūfuma ū mu nkono gwa Bamidiani. Natūkūtūmaga nene?”

¹⁵Alīyo ū Gidioni ūhaya gīkī, “SEEBA nadūgije kinehe ū kūbapīja a Baisilaeli? Ū lūdūgū lwane lūlī lūdūgū lūgokolo gokolo ū mu lūganda lwa ng'wa Manase; hama nū nene ng'wenekīlī nalī ndo wa bado ū mu kaya ya ng'wise.”

¹⁶Nang'hwe ū SEEBA ūng'wīla gīkī, “Nakūbiza hamò nang'ho, na lūūlū ūkūbatūla a bana Midiani; nīyo ū kūlī bebe bakūbiza gītī alī munhū ūmò dūhū.”

¹⁷Ū Gidioni ūshosha alīhaya, “Alilūūlū ūlū wanibonaga gīkī nigeleelilwe ū kūbūtongi wako, ninhage shimanīīkījo sha kūnoolekeja gīkī ng'hana ūlī bebe ūyo ūlīyomba naane.

¹⁸Nalīlomba ūtizīnga a henaha kūshisha nize, nakwenhele inong'ho lyane nize nakūtengele.” Nang'hwe ū SEEBA ūhaya, “Nakūkūlindīīla kūshisha ūshoke,”

¹⁹Ū Gidioni wingīla mu kaya ūsīnza kabūlī kasongi, hūna ūsola nusu latili ya būsu ūbeeja migatī ītī na shibimbya; aho wagolanya, ī nyama ūjitūūla mu kasonzo, ū sūji ūgūtūūla mu nungū, hūna ūshenha a mbeho ya ntī gwenūyo wiza ūntengela.

²⁰Ū Malaika o ng'wa SEEBA ūng'wīla, “Jisolage ī nyama nū ngatī ūyo gūtī na shibimbya ūshitūūle a hiwe aha, hūna ū sūji ūgwitīīle ho.” Ū Gidioni wīta chene ng'hana.

²¹Ū Malaika o ng'wa SEEBA ūtūmamīla nang'ha ūyo walī nago mu nkono, wīīkuumya ī nyama nī migatī īyo ītī na shibimbya. Gūūpuumūka moto kūfuma a hiwe, gūūjipemba ī nyama nī migatī īyo ītī na shibimbya; ū Malaika o ng'wa SEEBA ūjimīīla ī likanza lyenīlo.

²²Ū Gidioni aho wabona gīkī gashi walī Malaika o ng'wa SEEBA; ūkumya alīhaya, “Ee SEEBA Ndūji wa shose, ī lelo naamona Malaika o ng'wa SEEBA būshū kū būshū!”

²³Ū Malaika o ng'wa SEEBA ūng'wīla alīhaya, “Īnjaga ū boobà, mhola ībize hamò nang'ho, ūtūūcha yaya.”

²⁴Na lūūlū ū Gidioni ūzenga ng'walīlo kūlwa ng'wa SEEBA a henaho, ūgwitana lina lya, “Ū SEEBA hū ng'wene ī Mhola yenekīlī.” Kūshisha lelo ū ng'walīlo gwenūyo gūlīho gwīmīīlile ī Ofla ya Baabiezeeli.

²⁵Ū būjikū wenūbo ū SEEBA ūng'wīla gīkī, “Īsolage ī nzagamba ya kabīlī ū kafuma ū ng'widaale lya mitugo ja ng'wa so, ī ya myaka mpungatī. Nū ng'walīlo go ng'wa so ūyo gwazengwa kūlwa ng'wa Baalī ūgūkambagūle, nī ng'hīngī ya ng'wa Ashela īyo yihelile nago wīgwishe.

²⁶Hanuma ya henaho ūzenge ng'walīlo kūlwa ng'wa SEEBA Mulungu wako a higūlya ya kaalūgūlū kenaka a ha lenganīzu, ūtūmamīle mawe gaawiz ūgahele chiza. Hūna ī ng'hīngī ya ng'wa Ashela īyo ūlīīgwishe wīīpandagūle jibize ng'hwi ja kūpemba, wīfunyī ī nzagamba ya kabīlī kūbiza shakwinha shakūpemva.”

²⁷Na lūūlū ū Gidioni ūsola batūmami bakwe ikūmi wīta gīt'ūmo SEEBA akang'wīlīla. Alīyo atīītile līīmi, akīta būjikū nguno akabogoha a ba ha kaya ya ng'wawe, na a banhū ba mu nzengo.

²⁸Ī dilū aho baamisha a banhū ba mu nzengo, būgūbona ū ng'walīlo go ng'wa Baalī gwakambagūkaga, nī ng'hīngī ya ng'wa Ashela īyo yalī hihī nago yagwaaga; nī nzagamba ī ya kabīlī yafunyiagwa shitambò a ha ng'walīlo ū mpya ūyo gūkazengwa būjikū.

²⁹Bandya kwibūūja balīhaya, “Nani ūyo wagwītaga ū mhayo gwenūyū?” Aho baagīsīlīja chiza būwīlwa gīkī, “Ūyo wagwīta ū mhayo gwenūyo Gidioni ng'witūnja o ng'wa Yoashi.”

³⁰Hūna a banhū ba mu nzengo būng'wīla ū Yoashi, “Nfunyage aha ū ng'witūnja wako; shing'wigeleelilwe ache ī lelo, nguno wagūkambagūlaga ū ng'walīlo go ng'wa Baalī, wīgwisha nī ng'hīngī ya ng'wa Ashela īyo yihelile nago.”

³¹Alīyo ū Yoashi ūbashokeja abo baalī bampīndya bapelanile; ūbawīla, “A bing'we hū mulīnwīlīīla ū Baalī? Mutogilwe kūmpīja? Ūyo alanwīlīīle Baalī akūbūlagwa ī dilū yenīyī! Ū Baalī ūlū ng'hana alī mulungu adūgije kwilwīlīīla wei ng'wenekīlī īkī ū ng'walīlo gwakwe gwakambagūlagwa na munhū.”

³²Ū lūshikū lwenūlo ū Gidioni būng'winha lina lya Yelubaa, nguno bakahaya gīkī, “Ū Baalī ni alwaage nang'hwe, ilwīlīīle wei ng'wenekīlī;” īkī wakambagūlīlagwa ū ng'walīlo gwakwe.

³³Ū mu shikū jenījo a Bamidiani na a Baamaleki, hamò na a banhū bangī a ba kū sī ja kīya bikuminga hamò; būsanja a mabità gabo, būgūkīla ū mongo gwa Yolodani biza būtūūla ng'hambī yabo mu sī ya ntubīlo gwa Yezileeli.

³⁴Hūna ū Moyo o ng'wa SEEBA ūng'wizīīla ū Gidioni, ūfuula mhembe kūbalaalīka bana Abiezeeli banondeele.

³⁵Ūtūma nhūng'wa hose pyī ū mu sī ya banhū ba lūganda lwa ng'wa Manase, kūbalaalīka kūbūūcha shilanga, nū kū banhū ba lūganda lwa ng'wa Zabuloni, na a ba lūganda lwa ng'wa Nafutali; pye a benaba būja kwisangīja na a bichaabo.

³⁶Hūna ū Gidioni ūng'wīla ū Mulungu gīkī, “Ūlū gīkī ūkūbapīja ng'hana a Baisilaeli mu nzīla ya nkono gwane ūmo wahayīlile,

³⁷Ī haha naanikīla ikūnza lya ng'holo ha lūbūūga lwa kūtūlīla aha. Ūlū lūlaabize lūme a ha ikūnza lya ng'holo dūhū, ī sī ī yīngī yūbiza hūūmu, a henaho hū nakūdeeba gīkī ng'hana a Baisilaeli ūkūbapīja kūbītīla mu nkono gwane gīt'ūmo wahayīlile.”

³⁸Na ng'hana h'ūmo yūbiizīla, ū Gidioni aho wamisha ī dilū ūlīsola ī likūnza ūlīkama ū lūme, ookaja ibbakuli lya minzī.

³⁹Alīyo ū Gidioni ūhaya hangī gīkī, “Nalīkwikūmbīlīja ūtizūnipelanīla; nalīlomba mhayo gūmò dūhū hangī. Nizunīlījage nalītūmamīle hangī ī likūnza lyenīlī; ī lelo ī likūnza lyikale lyūmu, ī sī īyo īlīpīndīlīgije hū īlobe lūme.”

⁴⁰Ū būjikū wenūbo ū SEEBA wīta gīko ng'hana; ī likūnza lyikala lyūūmu, ī sī īyo yalī īlīpīndīlīgije yūloba lūme.