Read Sukuma Bible 2015 – Bibilia Ilagano Lya Kale 2015 Balamuji 7 Bible Online

Balamuji 7 - Sukuma Bible 2015 – Bibilia Ilagano Lya Kale 2015 bible

Balamuji 7

¹Ī ntodo yaho ī dilū ū Yelubaa (hū ū Gidioni) na a bashilikale[9] abo walī nabo bipuuna, būūkakoma ng'hambī bbihī na lwinzī lwa Halodi. Ī ng'hambī ya Bamidiani yalī sukuma yabo kū sī ya ntubīlo, bbihī na kaalūgūlū ka Moole.

²Ū Seeba ūng'wīla ū Gidioni, “Ūlī na banhū bingī no, natūdūla kūbatūūla a Bamidiani ū mu makono gabo, a Baisilaeli batizikumīlīja mu kūnidalaha balīhaya gīkī, ‘Nkono gwane ng'wenekīlī gwanipījaga.’

³Na lūūlū bawīlage a banhū gīkī, ‘Ūyo alīdetema kūlwa boobà ni īngage ū mu lūgūlū lwa Gileadi ashoke.’” Banhū shihūmbī makūmi abīlī na shibīlī būshoka, būsaaga shihūmbī ikūmi.

⁴Alīyo ū Seeba ūng'wīla ū Gidioni gīkī, “A banhū benaba bataalī bingī no; jaga nabo kūng'wa minzī, nakūkūsolaanhīja kwenūko. Ūlū nūkūwīla gīkī, ‘Ū ng'wenūyū akūja nang'ho,’ ni ajage ū ng'wenūyo; alīyo ūlū nūkūwīla gīkī, ‘Ū ng'wenūyū atūja,’ na ng'hana ū ng'wenūyo ni atizagūja.”

⁵Ng'hana ū Gidioni ūbatwaala kūjūng'wa minzī a banhū. Ū Seeba ūng'wīla gīkī, “Abo balayūgang'wa a minzī bo kūgasapula gītī mva īkūzabangīlaga ūkūbatūūla heeke, na a babo balayūtuja mazwi hū baang'wa, nabo ūkūbatūūla heeke.”

⁶Abo bakang'wa a minzī wa kūgaponeja na nkono ū kū nomo bakashika magana adatū. Pye a bangī baatujaga mazwi hū baang'wa.

⁷Na lūūlū ū Seeba ūng'wīla ū Gidioni gīkī, “A Bamidiani nakūbatūūla mu nkono gwako mu nzīla ya banhū aba magana adatū benaba, abo baang'wa a minzī bo kūgaponeja ū mu nomo. A bangī bene baje kaya, būlī ng'wene kū ng'wakwe.”

⁸Na lūūlū ū Gidioni ūjisola ī shinje nī mbiilūlū ū kūfuma ū kū banhū a bangī, hūna ūbalaga būja kū maheema gabo; ūsaaja dūhū abo magana adatū. Ī ng'hambī ya Bamidiani yaalī kū ntulumenho, kū sīlīlī yakwe ū Gidioni.

⁹Ū būjikū wenūbo ū Seeba ūng'wīla ū Gidioni gīkī, “Būūkaga ūtulumenhe ū kū ng'hambī yabo, nguno ū nene namalaga kwītūūla mu makono gaako.

¹⁰Ūlū ūlogoha ū kūja ko, jaga nū ntūmami wako ū Puula.

¹¹Jaaga ūkabadegeleke ūmo baliwīlīla; ūkūpandīka nguzu ja kūja kwīīdumīla ī ng'hambī yenīyo.” Hūna ū Gidioni ūja nū ntūmami wakwe ū Puula, kūshisha begeela a ha bashilikale abo baalī ū kū mhelo mhelo ya ng'hambī.

¹²A Bamidiani na a Baamaleki, hamò na a banhū bangī a ba kūfuma kīya, baalī biyiita ū mu ntubīlo gwenūyo; bingī no gītī njige. Ī ngamīla jabo jalī ningī no gītī maseni ga ha ng'walo gwa nyanza; yaalī shilambu ū kūjibala.

¹³Na lūūlū ū Gidioni aho washika, kwimanīla ūmò wa banhū benabo wandya kūnotoolela ng'wiye shilooti shakwe alīhaya, “Naalootaga shilooti; ū mu shilooti shenīsho naalī naabona ngatī ntaale ng'wibilingu gwa būsu wa būsīga. Gwizaga gūkūpilingitaga kwizīīla a ha ng'hambī ya Bamidiani. Gūūshika gūūlītūla ī liheema na shiligityo shitaale no kūshisha ī liheema lyūdubbūka, lyūkagwa lyūtandagūka na kūtandagūka.”

¹⁴Ū ng'wiye ūnshokeja alīhaya, “Bebe ū lwenūlū lūtūūlemeelwa kūbiza lūshū lwa ng'wa Gidioni a hene, ū Ng'wisilaeli ū ng'witūnja o ng'wa Yoashi? Tambala shilanga ū Mulungu wabatūūlaga mu nkono gwakwe a Bamidiani nī ng'hambī pyī ī yose.”

¹⁵Ū Gidioni aho washiigwa ī shilooti nū būshomheleja waaho, ūnamya Mulungu. Ūshoka ū kū ng'hambī ya Baisilaeli ūbakomiga alībawīla, “Bing'we būkagi! Ū Seeba wītūūlaga mu makono ging'we ī ng'hambī ya Bamidiani.”

¹⁶A banhū bakwe ūbatīna būgabanhīka mu magele adatū, hūna ūbagabanhya pye a bose mbiilūlū na shinje jitī na kīnhū ū mu gatī, kwike ū mu gatī jilī na chenge shikūbakaga moto.

¹⁷Hūna ūbawīla alīhaya, “Nilolagi chiiza, ning'we ng'wīte ūmo nalīītīle ū nene; ūlū nalayeegeele ī ng'hambī nabize naashika ū kū mhelo yaho, ning'we mukwīta ūmo nalīītīle.

¹⁸Ū nene na a babo abo balī hamò naane ūlū tūūjifuula ī mbiilūlū jise, na a bing'wee jilījagi ī jing'we; pye a bose ūmo ng'wīpīndīlīgije ī ng'hambī, hama muhamuke na kūhamuka na ilaka lya higūlya mulīhaya, ‘Tūlī ba ng'wa Seeba, na ba ng'wa Gidioni.’”

¹⁹Ū Gidioni na a banhū igana abo walī nabo būshika ū kū mhelo ya ng'hambī ikanza lya lūdīīma lwa ha gatī, a balang'hani ba ng'hambī būsangwa hū bikaabanya lūdīīma dūhū. Ū Gidioni na a biye būjilīja ī mbiilūlū jabo, nī shinje ījo jalī ū mu makono gabo būjibela.

²⁰Hūna a magele būdatū waago gūjilīja ī mbiilūlū, nī shinje ījo jalī ū mu makono gabo būjibela. A bose būshidima kū nkono gwa lūmoso ī chenge, ī mbiilūlū ja kūfuula būjidiimīla nkono gwa būlyo, hūna būhamuka na ilaka itaale balīhaya, “Līīlūshū lya ng'wa Seeba na lya ng'wa Gidioni.”

²¹Bīpīndya pyī ī ng'hambī, na būlī munhū wīmīīla hīgīyī aho waalī; a Bamidiani būhaahūka būyūpelanya sagala, kūnū bakūlīlaga.

²²Ī mbiilūlū ījo magana adatū aho jalīla, ū Seeba ūbīīta pye ū mu ng'hambī kwisengagūla shū būlī ng'wene na ng'wiye. Ī libità na būtaale lyūpeela nhambo līlolile Beti-shita kūīlīīla Zeleeda, kūshisha kū lūbīmbī lwa Abeli-mehola bbihī na Tabasi.

²³A Baisilaeli ba lūganda lwa ng'wa Nafutali, nū lwa ng'wa Asheli, nū lwa ng'wa Manase bitanwa pyī kūbakūūbya a Bamidiani.

²⁴Ū Gidioni ūtūma nhūng'wa pye a hose ū mu sī ya magūlya ya Efulaimu; ūbawīla, “Nzūgi wangū mubanyame a Bamidiani ū kū minzī ga kū mongo gwa Yolodani, kūshisha Beti-baala.”

²⁵Būbadima na batongeeji babīlī ba Bamidiani, Olebu na Zeebu; ū Olebu būmūlagīla hiwe lya Olebu, ū Zeebu būmūlagīla kwikamīlo lya mizabibu lya Zebu. Aho balībapeeja a Bamidiani būnekela Gidioni ī mitwe ya ba Olebu nū Zeebu; walī kū nkīlo gwa Yolodani.