Read Sukuma Bible 2015 – Bibilia Ilagano Lya Kale 2015 2 Yohana 1 Bible Online

2 Yohana 1 - Sukuma Bible 2015 – Bibilia Ilagano Lya Kale 2015 bible

2 Yohana 1

¹Nene namhala, kūlī nkīma nsolwa, hamò na baana bako abo nabatogilwe mu ng'hana; nīyo ītī nene kwike, alīyo na a babo bītogilwe ī ng'hana.

²Nguno ī ng'hana īlī hamò nise, hama īkūbiza nise welelo bose.

³Shigongo na wiza na mhola kūfuma kūlī Mulungu Sīswe na Yesu Kilisito Ng'wana wa ng'wa Sīswe, shikūbiza hamò nise mu ng'hana na būtogwa.

⁴Naayegile no ū kūbona gīkī bamò ba mu baana bako bakūshimīzīlaga mu ng'hana, gīt'ūmo shihayīlile ī shilagīlo īsho twanukūla kūfuma kūlī Sīswe.

⁵Hūna lūūlū mayū, ītī gīkī ī haha nalīkwandīkīla shilagīlo shipya, alīyo īsho tūlī nasho kūfuma ha wandījo; nalīmulomba tūkomeele ū mu kwitogwa.

⁶Ū būtogwa wene būlī gīkī, tūshimīze mu katongeelele ka shilagīlo shakwe; na ng'hana shimīzagi musho ī shilagīlo gīt'ūmo ng'wigwīla kūfuma ha wandījo.

⁷Nguno ī haha bakwīlile a balemba lembi ū mu sī, abo batazunije gīkī ū Yesu Kilisito wamala kwiza mu mīlī. Ū gwenūyū gūlī nīmo gwa Nomolomo, ū Ng'wilwisha wa ng'wa Kilisito.

⁸Ilang'hanagi mutizīlekanīja īkajimīīla īyo ng'wībeegije; alīyo īkūbeelela ng'wanukūle mheela nshikanu.

⁹Būlī ng'wene ūyo akitūūla tūūlaga dūhū alīyo ūbiza atīmo ū mu kalangīle ka ng'wa Kilisito, ū ng'wenūyo atī nang'hwe ū Mulungu. Ū wa kwikala ū mu kalangīle kenako alī nang'hwe ū Sīswe, nū Ng'wana.

¹⁰Ūlū munhū wiza kwisanja ning'we alīyo atūng'wenhelaga kalangīle ka mbika gītī yenīyī, yaya ū kūng'wanukūla ū mu kaya jing'we, nūūlū kūnyegela; nīyo yaya nūūlū ni kūhoya nang'hwe.

¹¹Ū wa kūhoya nang'hwe mu būyegi, akūbiza alīsangīla ū mu milīmo yakwe ī yabūbi.

¹²Nalī nayo mingī ī ya kūkwandīkīla, alīyo natūhayaga kūtūmamīla lūbbapula na wino; nguno nalisagīlwa kwiza ko tūhoye būshū kū būshū, ū būyegi wise būshikīlījiwe.

¹³Balīmugīsha a baana ba nkīma ū nsolwa, ū ng'wanong'wing'we.