Read Sukuma Bible 2015 – Bibilia Ilagano Lya Kale 2015 Kūkundūlūlwa 10 Bible Online

Kūkundūlūlwa 10 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 10

¹Kūhayimanīla namona malaika ūngī wa makaya alīfuma ng'wigūlū; walī azwalile ilunde, ū kū ntwe gokwe olī n'ita lya baashi. Ū būshū bokwe bong'wekaga gītī līīmi, hama a magūlū gakwe gaalī gītī ng'hīngī ja moto.

²Ū mu nkono gwakwe walī na shitabo shido shikundūlilwe. Wīmīīla ūpanda ha nyanza ū gūgūlū gokwe ū go būlyo, ū go lūmoso ūpanda ha sī nyūmu.

³Hūna ūhamuka n'ilaka itaale gītī lya shimba īlīzuumīīla; aho ohamuka gīko mihilimo mpungatī yūyomba na malaka gayo.

⁴Ī mihilimo yenīyo aho yayomba, ū nene nibeeja beeja gīkī nandye kwandīka; alīyo niigwa ilaka kūfuma ng'wigūlū līlīhaya gīkī, “Ī mihayo īyo yahayiwa na mihilimo mpungatī yenīyo ībisage gete, wībambīle, ūtizūyandīka!”

⁵Ū malaika ūyo nakamona wīmīīlaga ha nyanza na ha sī nyūmu ūbūūcha ū nkono gokwe ū gwa būlyo, oolota ng'wigūlū.

⁶Hūna wilahīla mu lina lyakwe ūyo alī mpanga kūshisha shiku jose; ū nseemi w'igūlū na shose īsho shilīmo, nī sī nī shose īsho shilīmo, pye na a manyanza nī shose īsho shilīmo; ūhaya gīkī, “Lyashilaga ī likanza.

⁷Alīyo ū mu shikū j'ilaka lya ng'wa malaika wa mpungatī, ūlū wegeela kūlīng'ang'aaja ī lipembe lyakwe, īkūshikīīla ī mihayo ya ng'wa Mulungu īyo ayībisīle, īyo wabawīla a batūmami bakwe a bahangi.”

⁸Ī lilaka īlo nakaliigwa kūfuma ng'wigūlū nūliigwa hangī līlīhaya gīkī, “Jaga ūkashisole ī shitabo īsho shikundūlilwe, īsho shilī mu nkono go ng'wa malaika, ūyo wapandaga ha nyanza na ha sī nyūmu.”

⁹Nūja ho a halī malaika ng'wenūyo, nūkang'wīla aninhe ī shitabo. Ūninha kūnū alīniwīla gīkī, “Shanukūlage ūshilye; ū mu nomo shikūkūnonela gītī būūkī, alīyo ū mu nda shikūkūlūlīla.”

¹⁰Nūshisola ī shitabo ī shido shenīsho nūshilya ng'hana, ū mu nomo gwane shikanona gītī būūkī, alīyo aho namala ū kūshilya nandya kwigwa būlūlū ū mu nda.

¹¹Hūna būniwīla gīkī, “Shiigelile ūfunye hangī būhangi kūlwa banhū ba mahanga na ndīmi ningī, na kū batemi.”