Read Sukuma Bible 2015 – Bibilia Ilagano Lya Kale 2015 Kūkundūlūlwa 13 Bible Online

Kūkundūlūlwa 13 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 13

¹Kūhayimanīla nabona shiinū yabumbūka kūfuma ū mu nyanza, yalī na mapembe ikūmi na mitwe mpungatī. A ha mapembe gayo yalī na ngikili ikūmi, alīyo būlī ntwe gwalī na lina lya būsondagūji.

²Ī shiinū īyo nakībona yenīyo yalī ībange sūbī, lelo a magūlū gayo gaalī gītī ga ndūba, alīyo ū nomo gītī gwa shimba. Ū būsugi walyo ī Līshing'weng'we lyīyinha ī shiinū yenīyo, pyī nī lisumbī lyalyo lya būtemi; lyīyinha na būdūla būtaale.

³Ī shiinū yenīyo ū ntwe gwayo ū gūmò gwalī n'igulagīje lya kūdūla kwenheleja kūcha; alīyo ī ligulagīje lya kūdūla kwenheleja kūcha lyenīlo, lyalī lyapīla. Pye a ba mu sī būjinjimala bandya kwīlondeela ī shiinū yenīyo.

⁴Būyūlīlamya ī Līshing'weng'we, nguno līkayinha būdūla ī shiinū yenīyo. Nī yoi ī shiinū būyūyīlamya, ū kūnū balīhaya gīkī, “Nani ū wa kūlenganīla nayo ī shiinū yenīyī? Nani ūyo adūgije kwilwisha nayo?”

⁵Ī shiinū yenīyo īkinhwa būdūla bo kūhaya na nomo gwayo mihayo ya magaka na ya būsondagūji; yinhwa ikanza lya myeji makūmi ane n'bīlī, lya kūbūtūmamīla ū būdūla wayo ū kwīta ī gīko.

⁶Hūna yandya kūgūtūmamīla ū nomo gwayo kūnsondagūla ū Mulungu, na kūlīsondagūla ī lina lyakwe nū wikalo bokwe, pye na a bikaji ba ng'wigūlū.

⁷Yinhwa na būdūla bo kwilwisha nabo a beela kūshisha kūbapyena, na būdūla higūlya ya ng'anda jose ja banhū, na ndīmi ja mahanga gose na gose.

⁸Hūna lūūlū a bikaji ba mu sī bakwīlamya ī shiinū yenīyo; pye a bose, būlī ng'wene ūyo lina lyakwe lītandīkilwe mu shitabo sha būpanga ī sha Ng'wana wa Ng'holo ūyo wasīnzwa kale, kūfuma ha kūseeng'wa kwa sī.

⁹Ūyo alī na gūtū ni igwage!

¹⁰Ūyo alī wa kūding'wa nding'wa, akūja mu būding'wa; ū wa kūbūlagwa bo līlūshū, akūbūlagwa bo līlūshū! Ū mu mhayo gwenūyū shiigelile a beela babize na wiyūmīlīja ū mu kūzunya.

¹¹Kūhayimanīla nabona shiinū yīngī yagulumūka kūfuma mu gatī ya sī, yalī na mapembe abīlī gītī ga Ng'wana wa Ng'holo, kwike a kayombele kayo kaalī gīt'ūmo līkayombelaga ī Līshing'weng'we!

¹²Nayo yatūmamaga mu būdūla bose ūbo yalī nabo ī shiinū ī ya kwandya; yūyīta pyī ī sī na a bikaji baamo kūbiza balamya bayo ī shiinū ī ya kwandya, īyo igulagīje lyayo lya kūdūla kwenheleja kūcha lyalī lyapīla.

¹³Yandya kūbeeja maleeba mataale; yūyenha na moto kūfuma kwigūlū gwika mu sī a banhū balolile.

¹⁴Yūyūbalemba lemaba a bikaji ba mu sī kūlwa nguno ya maleeba ayo īkinhwa būdūla bo kūgabeeja, kūlwa kwītūmamīla ī shiinū ī ya kwandya; yūyūbawīla kūbeeja shiikolile sha shiinū īyo yalī n'igulagīje lya līlūshū, alīyo yalī ītaalī mhanga.

¹⁵Yinhwa na būdūla bo kūshinha myūyī ī shiikolile sha shiinū, gīkī ī shiikolile shenīsho shidūle kūyomba. Na hangī yūbiza na būdūla bo kūbenheleja kūbūlagwa pye abo bakūlema kūshilamya ī shiikolile sha shiinū.

¹⁶Yūlagīla gīkī pye a banhū batūūlīlwe lūmeng'ho ha nkono gwa būlyo, nūūlū ha būshū wabo; pye a bose bado na bataale, basabi na bahabī, babize balī mu wiyabī nūūlū mu būsese;

¹⁷na gīkī atizilonga ose ose wa kūgūla nūūlū kūjinja ūlū atī nalo ū lūmeng'ho; ūlū atī nalyo ī lina lyayo nūūlū ī lisaabu lyayo ī shiinū yenīyo.

¹⁸Ū mu mhayo gwenūyū galīgongwa masala madeekanu; ūyo alī na witegeleja ni alībeejage ī lisaabu lyayo ī shiinū yenīyo, nguno līlī isaabu lya ng'wa munhū. Ī lisaabu lyenekīlī līlī magana atandatū na makūmi atandatū n'itandatū (666)!