Read Sukuma Bible 2015 – Bibilia Ilagano Lya Kale 2015 Kūkundūlūlwa 15 Bible Online

Kūkundūlūlwa 15 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 15

¹Hūna nūbona shiiloleelo shingī ū ng'wigūlū, shalī shitaale no sha kūkumya. Bamalaika mpungatī baalī na sha kūluhya luhya mpungatī sha kūmalīgīja; nguno ū Mulungu akūmalīgīja musho ū būpelanu bokwe.

²Hama hangī nūbona gītī nyanza y'ilole īsanganīkile na moto; nūbabona na a bapyeni abo bakīpyena ī shiinū nī shiikolile shayo nī lisaabu lyayo; baalī bīmīīla bīpīndya ī nyanza yenīyo, balī na ndono ja ng'wa Mulungu.

³Bīmbaga lyīmbo lya ng'wa Musa ū ntūmami wa ng'wa Mulungu, na lya Ng'wana wa Ng'holo. Bīmbaga balīhaya gīkī, “Ee Seeba Mulungu wa būdūla bose, Ī milīmo yako mitaale no, na ya kūkumya. Bebe ūyo ūlī Ntemi wa mahanga, Ī nzīla jako jitūngīlīgije, hangī ja ng'hana.

⁴Seeba, nani ūyo atīko kogoha na kūlīkūja ī lina lyako? Nguno bebe wike h'ūlī ng'wela, pye a mahanga gakwiza, gakwiza kū būtongi wako gakūlamye, Īkī ī shītīle shako sha būtūngīlīja shamalile koolechiwa hape!”

⁵Aho yabīta ī yenīyo nūbona yalugūlwa ī hekalu ya ng'wigūlū, ūmo būkikalaga būkaanīji.

⁶Būfuma a bamalaika mpungatī abo baalī na sha kūluhya luhya mpungatī; baalī na shizwalo shilabagīzu sha kitaani yape; ū mu shikuba baalī bitungile mishipi ya zahabu.

⁷Ūmò wa Shiseeng'wa shipanga ī shine ūbinha a bamalaika mpungatī benabo nzweso mpungatī ja zahabu; jokalile būpelanu bo ng'wa Mulungu, ūyo alī mpanga kūshisha welelo bose.

⁸Ī hekalu yokala lyochi ly'ikūjo lya ng'wa Mulungu na būdūla bokwe; walī atīho nūūlū ūmò wa kūdūla kwingīla ū mu hekalu, kūshisha shishile ī sha kūluhya luhya mpungatī sha bamalaika mpungatī benabo.