Read Sukuma Bible 2015 – Bibilia Ilagano Lya Kale 2015 Kūkundūlūlwa 17 Bible Online

Kūkundūlūlwa 17 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 17

¹Hūna ūmò wa bamalaika abo baalī na nzweso wiza, ūniwīla gīkī, “Nzūgū nakoolekeje ū nsango gokwe ū malahya ntaale, ūyo igashije higūlya ya minzī mingī;

²ūyo batemi ba mu sī balikalaga bakwijingīlaga nang'hwe, pye na a bikaji ba mu sī walī wabaseeseeja mvinya ya būmalahya bokwe.”

³Na lūūlū ūnibūūcha mu mbika ya Kiimoyo, ūnitwala kwitogolo; nūkamona nkīma adamhīlile shiinū yaza yokalile mina ga būsondagūji; yalī na mitwe mpungatī na mapembe ikūmi.

⁴Ū nkīma ng'wenūyo walī azwalile shizwalo sha nzulunge na shaaza, hama hangī azwalīlile na būlenji bo zahabu na mawe ga mpango ntaale na luulu. Ū mu nkono gwakwe walī na shikombe sha zahabu shokalile mihayo ya malofu na būsoso bo būmalahya bokwe.

⁵Ū kū būshū bokwe walī andīkilwe lina; gīkī, MBISĪLA, BABELI, NINA NTAALE WA BAMALAHYA, NA WA BŪSOSO BO MU SĪ.

⁶Ū nkīma ng'wenūyo nakamona walī aleebilwe mininga ga beela, na mininga ga bakaanīji ba ng'wa Yesu. Aho namona nūkumya na kakumīje kataale no!

⁷Alīyo ū malaika ūniwīla, “Nibūlī ūlīkumya? Nakūkūwīla ī mbisīla ya nkīma ng'wenūyū nī ya shiinū īyo wīdamhīlaga, īyo īlī na mitwe mpungatī na mapembe ikūmi.

⁸Ī shiinū īyo wībonaga yalī īlīho ī kwandya, ī haha ītīho, alīyo īlī hihī kūpuluka kwīnga ū ng'wishimayenze īje mu kūyagala. A bikaji ba mu sī, abo mina gabo gatandīkilwe mu shitabo sha būpanga kūfuma ikanza lya kūseeng'wa kwa sī, bakūkumya ūlū bībona ī shiinū yenīyo, īyo yalīho, alīyo ī haha ītīho, hama hangī īlilonge.

⁹A henaha lyagongwa iganiko lya masala; ī mitwe īyo mpungatī jilī ngūlū mpungatī ījo ajigasīgije ū nkīma ng'wenūyo, a benabo batemi mpungatī.

¹⁰A batanò bamala kūgwishiwa, ūmò ataalī alīho, lelo ū ūngī ataalī ū kwilonga, ūlū wilonga shiigelile ashinge ho kakanza kado.

¹¹Ī shiinū īyo yalīho kwandya alīyo ī haha ītīho, ī yene ya kanaane, īlī mu lūkwa lūmò na a babo mpungatī, nayo ījile mu kūyagala.

¹²A mapembe ikūmi ayo wagabonaga, a bene batemi ikūmi; kwike bataalī ū kwanukūla ū būsugi. Alīyo bakwanukūla būdūla bo kūsuga hamò nayo ī shiinū ikanza lya sa īmò.

¹³A boi balaganile mhayo gūmò, gwa kūyinha būdūla na kwīguzuhya ī shiinū yenīyo.

¹⁴Bakwilwisha būlūgū nū Ng'wana wa Ng'holo; alīyo ū Ng'wana wa Ng'holo akūbapyena, nguno ū ng'wene alī Seeba wa baseeba na Ntemi wa batemi, nīyo abo balī nang'hwe balī basolwa na basanyiwa.”

¹⁵Hangī ū malaika ūniwīla gīkī, “A minzī ayo wagabonaga agigasīgije ū malahya ng'wenūyo, a benabo banhū; būhī na būhī wa mahanga ga būlī ndīmi.

¹⁶Ī shiinū īyo wībonaga yenīyo īkwīta īnkolwe ū malahya. Na a mapembe ayo ikūmi nago gakūnkolwa; hūna lūūlū bakūnkenaagūla banzuuje baneke buyīkī, nū mīlī gokwe bagūlye; hūna bampembeele na moto ashile ho gete!

¹⁷Nguno ū Mulungu wabinhile ū mung'holò jabo iganiko līmò lya kūbūlekela shiinū ū būtemi wabo kūshisha īshikīīle ī mihayo yakwe gīt'ūmo ayīhelelile.

¹⁸Ū nkīma ūyo wamonaga ng'wenūyo, h'ī līnzengo ī litaale īlo lībasugile a batemi ba mu sī!”