Read Sukuma Bible 2015 – Bibilia Ilagano Lya Kale 2015 Kūkundūlūlwa 18 Bible Online

Kūkundūlūlwa 18 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 18

¹Aho yabīta ī yenīyo, nūmona malaika ūngī wa būdūla būtaale alika kūfuma ng'wigūlū; ī likūjo lyakwe lyūyakīīla ī sī.

²Ūhamuka n'ilaka lya nguzu alīhaya gīkī, “Yagwaga, yagwaga ī Babeli ī nhaale. Bobizaga wikalo wa masamva, n'ihalo lya myoyo misoso ya mbika jose, n'ipandī lya būlī noni jabūbi na ja malofu.

³Nguno pye a mahanga gīng'wile ī mvinya ya būjingi bokwe, īyo īkaseeseejaga. A batemi ba mu sī baalijingīlaga nang'hwe, na a basūlūja ba mu sī balūsabīlaga ū mu būdūla bo būsabi bokwe ūbo wadoosha!”

⁴Hama niigwa ilaka līngī kūfuma ng'wigūlū līlīhaya gīkī, “Bing'we banhū bane, fumagi ng'wīnge mo, lekagi ū kwisangīja ū mu būkenaagūji bokwe, mutizūgwīlwa nsango gokwe ning'we.

⁵Nguno ī shibi shakwe shaseesekelile kūshisha ng'wigūlū; nū Mulungu owizūkilwe ū būkenaagūji bokwe.

⁶Ng'winhagi nang'hwe gīt'ūmo olūbinhīlaga ū wei, ng'winhagi ng'hangala ibīlī Īyo yigeleelilwe katūmamīle kakwe. Ngelekelagi ū mu shikombe Īsho olūbagelekelaga bangī, nīyo na kūtinda ho!

⁷Ng'winhagi būluhi na būpīna ū mu shikolo īsho shalūng'winhaga kwikumīlīja na kūdoosa. Nguno olikalaga wiwīla ū mung'holò yakwe gīkī, ‘Ū nene nigashije gītī nalī ntemi nkīma, natī naachīlwa, hangī natalabona būpīna!’

⁸Hūna lūūlū, ū būtūlwa bokwe būkūngwīla mu lūshikū lūmò, icha na būpīna na nzala. Hanuma akūpemva moto ashile ho gete; nguno ū Mulungu, ū Namuji wakwe, alī Seeba wa nguzu.

⁹“A batemi ba mu sī abo baalijingīlaga nang'hwe na kūyegela mu būdooshi bokwe, bakūlībona ī lyochi lya kūpemva kwakwe bandye kūtūla ng'hūngū bakūnīlaga.

¹⁰Kūlwa kūbogoha ū būluhiwa bokwe, bakwīmīīla kūle balīlīla būhaya gīkī, ‘Babeli wagwīlwa makoye, bebe nzengo ntaale gwa nguzu, wagwīlwa makoye. Nguno ū kūlamulwa kwako gwakwikīīla ng'wikanza līmò!’

¹¹“Na a basūlūja ba mu sī bakūmpīnīhalīla bandye kūnīla, nguno atīho ūngī wa kūbagūlīla ī miligo ya shikolo shabo;

¹²miligo ya zahabu na feza na mawe ga mpango ntaale na luulu, na myenda ya kitaani yawiza, na ya nzulunge na ya halili, na yaza; na mitī ya būlī mbika na shikolo sha kūbeejiwa kūfuma mu mapembe ga mhūlī, na sha mitī ya gembe, na sha chūma shibbūpu, na shisīnza, na sha mawe gape;

¹³na shisanjo sha mu shilīwa na maguta ga kwibila, na malaashi, na mvinya na maguta ga kūzugīla shilīwa, na būsu na būsīga, na ng'ombe na ng'holo na falasa na magogoteni, na mibīlī ya banhū, nū būpanga wabo!

¹⁴Bakūnīla balīhaya gīkī, ‘Nī litwajo īlo būpanga wako walūlīhahaalīlaga lyakwīngaga; pyī nī shikolo ī shose ī shawiza na sha mpango ntaale shakūkenaagūkīlaga, shitalabonwa hangī na hado yaya!’

¹⁵A basūlūja ba shikolo shenīshi abo walī wabasabya, bakwikīga kūle bakūdetemaga, bagogohaga a makoye ayo gangwīlaga. Bakūlījiwa būpīna

¹⁶balīhaya, ‘Gwagwīlwa makoye, gwagwīlwa makoye ū nzengo ntaale, ūyo gwalikalaga gūzwalīlile myenda yawiza ya kitaani na ya nzulunge, na yaza. Nzengo ūyo gwalikalaga gūkūlabagīlaga kūlwa zahabu na mawe ga mpango ntaale, na luulu!

¹⁷Nguno ū būsabi ū bose ūbū bojimīīla ng'wikanza lya sa īmò dūhū!’ “Na hangī būlī ntaale wa meli na būlī ng'wene ūyo akashimīzīlaga mu meli, pye a batūmami ba mu meli, abo milīmo yabo īlī mu nyanza, bakwikīga kūle

¹⁸bakūlīlaga ūlū būlībona ī lyochi lya kūpemva kwa nzengo gwenūyo; bakūlīla balīhaya, ‘Nzengo kī hangī ūyo gūshikile kūlenganījiwa nū nzengo ū ntaale ūyū!’

¹⁹Hama bakwandya kwisaamagūlīla lūbuubu ū kū mitwe yabo, kūnū balīlīla ng'hūngū kūlwa būpīna būtaale; balīhaya, ‘Gwagwīlwa makoye, gwagwīlwa makoye ū nzengo ū ntaale, ūyo kūlwa būsabi wago gwalūbasabyaga pye abo balī na meli mu nyanza; gwabiza buyīkī ng'wikanza lya sa īmò dūhū!’

²⁰Bebe igūlū yegaga kūlwa nguno yago, pye na a bing'we beela, na a batūng'wa na a bahangi; Īkī ū Mulungu wagūgwisījaga nsango ū nzengo gwenūyo, kūlwa nguno ying'we!”

²¹Hūna malaika wa nguzu ūsola iwe itaale gītī lya kūshela, ūlīponeja mu nyanza kūnū alīhaya, “Ū nzengo ū ntaale, ū gwa Babeli gūkūgwishiwa na shiligityo shitaale gīkī, na gūtalabonekana hangī na hado yaya!

²²Lītaliigwiwa ilaka lya batūji ba ndono nūūlū lya bīmbi, nūūlū batūji ba ng'oma, nūūlū mbiilūlū, nūūlū mhembe ītaliigwiwa na hado yaya; nūūlū koolī wa kūbeeja shose shose atalilonga mo ū mulī bebe na hado yaya, nūūlū ng'hilimo gw'iwe lya kūshela gūtaliigwiwa ū mulī bebe nūūlū kamò.

²³Nūūlū ka būng'weku ka chenge katalang'weka gete ū mulī bebe; nūūlū ilaka lya ntooji lītaliigwiwa ū mulī bebe na kamò yaya, nūūlū lya ntoolwa ndūhū; nguno a basūlūja ba mu ng'wako hū bene abo baalī bataale ū mu sī. Walikalaga ūgalemba lemba pye a mahanga ga mu sī kūlwa būlogi boko!

²⁴Ū mulī we gaabonekanile mininga ga bahangi na ga beela, na a bose a ba mu sī abo babūlagwa!”