Read Sukuma Bible 2015 – Bibilia Ilagano Lya Kale 2015 Kūkundūlūlwa 19 Bible Online

Kūkundūlūlwa 19 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 19

¹Aho yabīta ī yenīyo niigwa ilaka itaale gītī ly'ibita itaale lya ng'wigūlū līlīhaya gīkī, “Halelūya, būpīji n'ikūjo na būdūla shilī sha ng'wa Mulungu wise;

²nguno ū būlamuji bokwe būlī bo ng'hana, na būtūngīlīgije. Īkī wang'winhaga nsango ū malahya ntaale, ūyo walī wīsosohaja ī sī kūlwa būmalahya bokwe. Na hangī ū Mulungu wagamalīlaga shiilī a mininga ga banhū bakwe, ayo wagiita na nkono gwakwe ū malahya ng'wenūyo!”

³Bongeja kūhaya hangī gīkī, “Halelūya, nī lyochi lyakwe līkwinunga kūja ng'wigūlū shiku jose!”

⁴A Banamhala makūmi abīlī na bane, nī Shiseeng'wa shipanga ī shine būgwa balīnamya Mulungu ūyo igashije hī Isumbi lya būtemi, kūnū balīhaya; “Alichene, Halelūya!”

⁵Hūna liza ilaka kūfuma a hī Isumbi lya būtemi līlīhaya gīkī, “Nkumīlījagi ū Mulungu wise pye a bing'we batūmami bakwe; na a bing'we abo mung'ogohile, bado na bataale!”

⁶Hangī niigwa ilaka gītī ly'ibita itaale, gītī ng'huutumo gwa minzī mingī, gītī kūpalalūka kūtaale; nūliigwa līlīhaya, “Halelūya, nguno ū Seeba Mulungu wise, ū wa būdūla bose, hū ng'wene ū Nsugi!

⁷Tūyegagi tūsangabale, tūng'winhagi ikūjo, nguno lyashikaga ī likanza lya būtooji bo Ng'wana wa Ng'holo, nū Ntoolwa wakwe amalīīlile.

⁸Azwalīchiwe shizwalo shape shilabagīzu sha kitaani yawiza.” Nguno ī kitaani yawiza īlī shītīle sha būtūngīlīja, Īsho bakwītaga beela.

⁹Hūna ūniwīla, “Andīkaga gīkī, ‘Balī na lubango abo balaalīkilwe kūja kū shigukulu sha būtooji bo Ng'wana wa Ng'holo.’” Hama ūniwīla hangī gīkī, “Ī yenīyī mihayo ya ng'wa Mulungu, īlī ya ng'hana.”

¹⁰Nūgwa kū magūlū gakwe gīkī naanamye; alīyo ūniwīla, “Lekaga ū kwīta gīko, nū nene nalī ntūmami ng'wiyo dūhū, hamò na a badūgū bako abo balī na būkaanīji bo ng'wa Yesu. Namyage Mulungu, nguno ū būkaanīji bo ng'wa Yesu gūlī moyo gwa būhangi!”

¹¹Aho nataalī nalolile kwimanīla nabona haalugūka hangī ū ng'wigūlū, na falasa yape yīmīīlaga, ūyo walī ayīdamhīlile akitanagwa Nsanyiwa, nīyo h'ūyo alī Ng'hana yenekīlī; ūyo kalamulīle na kalwīle kakwe mu būlūgū kalī ka būtūngīlīja.

¹²A miso gakwe gaalī gītī ndali ja moto, ū kū ntwe gokwe jalīho ngikili ningī; walī andīkilwe lina īlo atīho munhū wa kūlīmana, ūlū atī wei ng'wenekīlī dūhū.

¹³Walī azwalile shizwalo shidabbiwe mu mininga; ī lina lyakwe akitanagwa Mhayo go ng'wa Mulungu.

¹⁴A mabita ga bashilikale ba ng'wigūlū ganondeelaga gadamhīlile falasa jape, hangī gazwalile shizwalo shawiza sha kitaani yape.

¹⁵Ū mu nomo gokwe lyafumaga mo līlūshū lyūgī lya kūbūlagīla mahanga; na hangī akūbadīīma na nang'ha gwa chūma, na akūlīpandagīla ī likamīlo lya mvinya ya būkalī na būpelanu bo ng'wa Mulungu wa būdūla bose.

¹⁶A ha shizwalo shakwe na a h'itango walī andīkilwe ī lina lyakwe; gīkī, NTEMI WA BATEMI, NA SEEBA WA BASEEBA.

¹⁷Hama nūmona na malaika wīmīīlaga ha līīmi alījihamukīla pyī ī noni ījo jikalalaga ng'wigūlya, alījiwīla gīkī, “Ikumingagi ng'wize kū shigukulu shitaale, shigukulu sha ng'wa Mulungu.

¹⁸Nzūgi mulye nyama ja mibīlī ya batemi, na ya bataale ba bashilikale, na banhū ba nguzu; na nyama ja falasa na badamhīji bajo, na nyama ja mibīlī ya banhū bose, babize balī mu wiyabī nūūlū mu būsese, bado na bataale.”

¹⁹Hūna nībona ī shiinū, na a batemi ba mu sī na a mabita gabo. Baalī bikuminga kwilwisha būlūgū nang'hwe ūyo walī adamhīlile falasa nī libita lya bashilikale bakwe.

²⁰Yūding'wa ī shiinū, hamò nū ng'hangi ū nomolomo, ūyo yantūmaga kūja wīta shimanīkījo akūbalembagūlaga a balamya ba shiikolile, abo baalī banukūla lūmeng'ho lwayo ī shiinū. A babīlī benabo būponyiwa balī bapanga gīko, mu nyanza ya moto ūyo gūkūbakaga na būgota bo shibiliti.

²¹A bangī bene ūbabūlaga ūyo walī adamhīlile falasa; akababūlaga na līlūshū īlo lyafumaga mu nomo gokwe. Pyī ī noni jikalya jilile ī mibimba yabo, jigūta!