Read Sukuma Bible 2015 – Bibilia Ilagano Lya Kale 2015 Kūkundūlūlwa 2 Bible Online

Kūkundūlūlwa 2 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 2

¹“Ū malaika wa kanisa ya Efeso ng'wandīkīlage gīkī, ‘Ī mihayo īyī alīyīhaya ūyo ajidimile ī Sonda mpungatī mu nkono gwakwe gwa būlyo, na alī hamò na a makīndīkīlo mpungatī ga tala ga zahabu:

²Nīmanile ī milīmo yako na a makoye ayo gakakūkoyaga, pyī nū wiyūmīlīja wako, nī gīkī ūtadūgije ū kwiyūmīlīja kwikala na banhū babūbi. Namanile nī gīkī wabagīsīlīgije chiza abo bakwihayaga balī batūng'wa, ūbabona batī batūng'wa, bakūlomalomaga dūhū.

³Nīyo namanile nī gīkī ūlī ng'wiyūmīlīja kūlwa nguno ya lina lyane, hama ūhandatīlile, na ūtaalī kūgwa ng'holò.

⁴Alīyo nalī na mhayo gwa kūkūhūgūla; gīkī, wabūlekile ū būtogwa wako ū bo kwandya.

⁵Hūna lūūlū, izūkīlaga aho wagwīlile ūgalūke, wandye hangī kwīta ī milīmo īyo wītaga ī kwandya. Ūlū ītī chene nakwiza ū kūlī bebe, nalyīnje ī likīndīkīlo lyako lya tala a ha lwandī lwalyo.

⁶Kwike ū mhayo gwawiza ūyo ūlī nago gūlī gīkī, wīkolilwe nang'ho ī milīmo ya Banikolayo, īyo nīkolilwe nū nene.

⁷Ūyo alī na matū ni ayigwage īyo Moyo alījiwīla ī kanisa. Ū wa kūpyena nakūnzunīlīja kūlya a ha ntī gwa būpanga ūyo gūlī mu ngūnda go ng'wa Mulungu.’

⁸“Nū malaika wa kanisa ya Similina ng'wandīkīlage gīkī, ‘Ī mihayo īyī alīyīhaya ūyo alī wa Kwandya na wa Kūmalīja, ūyo akacha, alīyo ūbiza mpanga hangī:

⁹Nabūmanile ū būluhi wako nū būhabī wako, kwike ūlī nsabi. Nabūmanile nū būsondagūji wabo abo bakihayaga gīkī Bayudaya, alīyo batī bene; a boi balī isinagogi lya ng'wa Shetani.

¹⁰Ūtizūbogoha ū būluhi ūbo būlīhaya kūkūsanga, managa gīkī ū Shetani alī hihī kūmugema; bamò bing'we akūmuponya mu jeela, na ng'hana mukūluhiwa ikanza lya shikū ikūmi. Alīyo handatīlaga, ūbize ng'wishigwa nūūlū kūshisha mu kūcha; nakūkwinha ngikili ya būpanga.

¹¹Ūyo alī na gūtū ni ayigwage īyo Moyo alījiwīla ī kanisa. Ū wa kūpyena atūkuumiwa nī licha ī lya kabīlī.’

¹²“Nū malaika wa kanisa ya Peligamo ng'wandīkīlage gīkī, ‘Ī mihayo īyī alīyīhaya ūyo alī na līlūshū lyūgī lya būūgī būbīlī:

¹³Namanile gīkī aho ūkikalaga h'aho līlī ī lisumbī lya būtemi lya ng'wa Shetani; alīyo ū bebe ūlīdimile ī lina lyane, ūtaalī ū kūkūleka ū kūzunya kwako ūmo ūnizunīgije ū nene, ūtalekanile nago nū mu shikū ja kūbūlagwa kwa ng'wa Antipa, ū nkaanīji wane ng'wishigwa, ūyo akabūlagīlwa mu nzengo gwing'we, ūmo akikalaga Shetani.

¹⁴Alīyo nalī na mihayo ya kūkūhūgūla; nguno ūlī na banhū balebe ū ng'wenūmo, abo badimile malange ga ng'wa Balaamu, ūyo akananga Balaki mhayo gwa kūbatūūlīla Baisilaeli sha kūbipamya. Ūbalanga na kūlya shitambo sha kūfunyiwa kū shiikolile, hamò na kwīta būjingi.

¹⁵Hama ūlī nabo na bangī abo badimile malange ga Banikolayo.

¹⁶Hūna lūūlū galūkaga; ūlū ītī chene, nakwiza wangū ū kūlī bebe, nize nilwishe būlūgū nabo na līlūshū lya mu nomo gwane.

¹⁷Ūyo alī na gūtū ni ayigwage īyo Moyo alījiwīla ī kanisa. Ū wa kūpyena nakūng'winha mana īyo ībisilwe, nakūng'winha n'iwe lyape lyandīkilwe lina ipya, īlo atīho wa kūlīmana, ūlū atī ū ng'wanukūji walyo dūhū.’

¹⁸“Nū malaika wa kanisa ya Siatila ng'wandīkīlage gīkī, ‘Ū mihayo īyī alīyīhaya ū Ng'wana wa ng'wa Mulungu, ūyo alī na miso gītī ndali ja moto, na mhambala ja kūbiza gītī chūma shipembilwe mu moto hūna shūguuswa sheela pe:

¹⁹Nīmanile ī milīmo yako, nū būtogwa wako, nū kūzunya kwako, na a katūmamīle kako, pyī nū wiyūmīlīja wako. Namanile nī gīkī ī milīmo yako ī ya haha īkīlile a ha ya kwandya.

²⁰Alīyo nalīkūhūgūla, nguno ūzunije mihayo ya ng'wa Yezebeli, ū nkīma ūyo akihayaga gīkī ng'hangi; ūyo akabalangaga na kūbahembeka batūmami bane, wabalemba lemba, wabingīja mu būjingi na mu kūlya shilīwa īsho shikafunyiagwa shitambo kū mashiikolile.

²¹Naang'winhile ng'wanya gwa kūgalūka, alīyo atatogilwe ū kūgalūka abūleke ū būmalahya bokwe.

²²Hūna lūūlū managa gīkī nakūmponya mu būlīīlī; na a babo bakashihyaga nang'hwe nakūbaponya mu makoye ūlū batagalūkile bakalekana nasho ī shītīle shakwe.

²³Hama a baana bakwe nakūbamala kūbabūlaga! Ū mu gīko pyī ī kanisa jikūmana gīkī ū nene hū nalī ng'wene ūyo nakagīsīlījaga ng'holò ja banhū na maganiko gabo. Hama hangī nakūng'winha būlī ūmò wing'we gīt'ūmo īng'wigeleelilwe kwanukūla kūlwa nhūmamīle yakwe.

²⁴‘Alīyo pye a bangī abo mulī mu Siatila, abo mutagadimile a malange genaya, abo mutī nayo ī mihayo ya ng'wa Shetani īyo bakīkumīlījaga gīkī mishimu; a bing'we natūmutūūlīlaga nigo gūngī.

²⁵Kwike dūhū shūmīīlagi īsho mulī nasho kūshisha nize.

²⁶Ū wa kūpyena, wīlang'hana chiza ī milīmo yane kūshisha kū būkalīkījo, nakūng'winha būdūla higūlya ya mahanga,

²⁷Akūbadīīma na nang'ha gwa chūma, akūbabelagūla ūmo shiseme sha malongo shikabelagūkīlaga.

²⁸H'ūmo nū nene waninhīla būdūla ū Baba. Nakūng'winha na sonda ya dilū.

²⁹Ūyo alī na gūtū ni ayigwage īyo Moyo alījiwīla ī kanisa.’