Read Sukuma Bible 2015 – Bibilia Ilagano Lya Kale 2015 Kūkundūlūlwa 20 Bible Online

Kūkundūlūlwa 20 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 20

¹Hūna nūmona malaika alika kūfuma ng'wigūlū; ū mu nkono gwakwe walī na lūfungūlo lwa h'ishimayenze na nyololo ntaale.

²Ūlīdima ī Līshing'weng'we, ī Liyoka lya kale, ī Lyanishi na Līshetani; ūlītunga ikanza lya myaka 1,000.

³Ūlīponeja ng'wishimayenze ūlīlugalīla ng'wenūmo ūkanda na kūkanda a ha mīta, lītizikala lyūlembagūla banhū, kūshisha īshile ī myaka īyo 1,000; alīyo ūlū yūbīta ī mihayo yenīyo shiigelile lītaligūlīlwe kakanza kado.

⁴Kwimanīla hangī nabona masumbī g'ikūjo ga kwigasīja abo baalī binhwa būlamuji; nūjibona nīng'holò ja banhū abo baalī babūlagwa kūlwa nguno ya būkaanīji bo ng'wa Yesu, na kūlwa nguno ya mhayo go ng'wa Mulungu. Na a babo baalī batīlamije ī shiinū nūūlū ī shiikolile shayo, abo batanukūlile lūmeng'ho lwayo kū būshū nūūlū kū nkono gwabo. Bakabiza bapanga, būsuga hamò nang'hwe ū Kilisito ikanza lya myaka 1,000.

⁵A bafu a bangī batapīlile kūshisha īkalīke ī myaka īyo 1,000; ū wenūbū hū būjūūko bo kwandya.

⁶Balī na lubango, na balī beela abo bakūbiza na ngabo ū mu būjūūko bo kwandya. Ī licha lya kabīlī lītī na nguzu ū kūbo; bakūbiza bagabīji ba ng'wa Mulungu na ba ng'wa Kilisito, bakūsuga nang'hwe ikanza lya myaka 1,000.

⁷Ī myaka 1,000 ūlū yūshila, ū Shetani akūlugūlīlwa ū mu shifungo shakwe.

⁸Ūlū ūfuma moi akwandya kūgayeelela pye a mapandī ga mu sī, Gogi na Magogi; aje alīgalemba lemba a mahanga gīkī bibilinge kū būlūgū. Ū wingī wabo būlī gītī maseni ga ha nyanza.

⁹Bakaja hose hose ū mu sī, bahayūshika ha ng'hambī ya beela, a ha nzengo ntogwa, būgūgobanīja; alīyo gwika moto kūfuma ng'wigūlū gwiza gūbalya.

¹⁰Nū ng'wanishi ūyo wabalemba lembaga ūponyiwa mu nyanza ya moto gwa kūbaka na būgota bo shibiliti; h'ūmo yalī nī shiinū hamò nū ng'hangi ū nomolomo. Bakūbiza ng'wenūmo bakūluha luhiagwa līīmi na būjikū shiku jose.

¹¹Hanuma hangī nūbona Isumbī lya būtemi lyape itaale; ī sī nī ligūlū shūpeela kwīnga ū kū būtongi bokwe ūyo walī aligasīgije, lītabonekanile hangī ī lipandī lyasho.

¹²Hama nūbabona a bafu, bataale na bado bīmīīlaga ū kū būtongi wī Isumbi lya būtemi, na mashitabo gūkundūlwa; na līshitabo līngī lyūkundūlwa, ī lya būpanga. A bafu būūlamulwa kūlwa kūlolwa īyo yalī yandīkilwe ū mu mashitabo genayo, kūlenganīla nū mumo yalī ī milīmo yabo.

¹³Ī nyanza yūbafunya a bafu abo baalī muyo, nū kūcha pyī nū kūlimu shūbafunya a bafu abo baalī musho. Būūlamulwa būlī ng'wene kūlenganīla na shītwa shakwe!

¹⁴Ū kūcha nū kūlimu shūponyiwa mu nyanza ya moto; ī lyenīlo icha lya kabīlī.

¹⁵Na ose ose ūyo akaleka kūbonekana andīkilwe ū mu shitabo sha būpanga akaponyiwa mu nyanza ya moto!