Read Sukuma Bible 2015 – Bibilia Ilagano Lya Kale 2015 Kūkundūlūlwa 22 Bible Online

Kūkundūlūlwa 22 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 22

¹Akīīta ūnoolekeja mongo gwa minzī mapanga mateemagīzu gītī ilole; gwalī gūfumīīlile a hī Isumbi lya būtemi lya ng'wa Mulungu na Ng'wana wa Ng'holo.

²Gwahūūmaga kūbītīla a ha gatī gatī y'ibbala bbala lyamo. Ū kū ngegu ja mongo gwenūyo, ī lipandī īlī nī lipandī īlī, gwalīho ntī gwa būpanga, gwatwajaga mbika ikūmi n'ibīlī ja matwajo; mu katwagīje ka būlī ng'weji. A madūūtū gaho ga kūlagūlīla mahanga.

³Nīyo lītūbiza mo izumo na hado yaya ū mu nzengo gwenūyo; ī Lisumbī lya būtemi lya ng'wa Mulungu na Ng'wana wa Ng'holo līkūbiza ng'wenūmo, hama a batūmami bakwe bakūbiza balamya bakwe.

⁴Bakūbūbona ū būshū bokwe, nī lina lyakwe līkūbiza lyandīkilwe ū kū būshū wabo.

⁵Būtūbiza ho būjikū na hado yaya, na ītīho nguno ya kūbiza na būpe bo tala nūūlū bo līīmi, nguno ū Seeba Mulungu ng'wenekīlī h'ūyo akūbiza Isana lyabo, bakūsuga shikū ja shiku jose.

⁶Hama ūniwīla gīkī, “Ū mihayo yenīyī īlī ya ng'hana, nīyo shiigelile īsanyiwe. Hūna lūūlū, ū Seeba Mulungu wa myoyo ya bahangi, wantūmaga malaika wakwe kwiza kūboolekeja a batūmami bakwe, ī mihayo īyo shiigelile ībize ho wangū.”

⁷“Managa gīkī naliza wangū, alī na lubango ū wa kīdima ī mihayo ya būhangi ūbo wandīkilwe ū mu shitabo shenīshi!”

⁸Ū nene Yohana hū nalī ng'wene ūyo nakīyigwa na kwībona ī mihayo yenīyī. Ī mihayo yenīyī aho nīyigwa nū kwībona nībona, nakagwa kū magūlū gakwe ū malaika ūyo wanoolekejaga, nūgwa gīkī naanamye!

⁹Alīyo ū wei ūniwīla, “Lekaga ū kwīta ī gīko, ū nene nane nalī ntūmami ng'wiyo dūhū, hamò na a badūgū bako a bahangi, na a babo bīdimile ī mihayo ya mu shitabo shenīshi, namyage Mulungu!”

¹⁰Hūna ūniwīla gīkī, “Yaya ū kwībisa ī mihayo ya mu shitabo shenīshi, nguno ī likanza lyegeelaga.

¹¹Ūyo atī ntūngīlīja ni ongejage kwīta īyo ītī ya būtūngīlīja, ū nsoso nang'hwe ongeje kwisosohaja; nū ntūngīlīja ni ongejage kwīta ī ya būtūngīlīja, ū ng'wela nang'hwe ongeje ū kwiyeeja.

¹²Managa gīkī naliza wangū, nalī nayo nī mheela yane. Būlī munhū nakūng'winha mheela ya kūlenganīla na shītwa shakwe.

¹³Ū nene nalī Alufa na Omega, nalī wa Kwandya na wa Kūmalīja, Wandījo na Būkalīkījo.

¹⁴Balī na lubango abo bafulile shizwalo shabo, gīkī banukūle būdūla bo kūbiza na ngabo ū kū ntī gwa būpanga, hama badūle kūbīta a ha mibita, bingīle ū mu nzengo.

¹⁵Alīyo a hanze jilīho mva, na balogi, na bajingi, na babūlagi, na balamya ba shiikolile; na a balomolomo, abo batogilwe kwīta ya būlomolomo.

¹⁶Nene Yesu nantūmaga malaika wane kwika kū kanisa jose, ize kūmukaanīla. Hū nene ūyo nalī Nji go ng'wa Daūdi na wa lūganda lokwe; nalī Sonda ng'weku ya mu makīngo.”

¹⁷Ū Moyo nū Ntoolwa balīhaya, “Nzūgū!” Hama ūyo aliigwa ni ahayage gīkī, “Nzūgū,” nū yūyo akolilwe nota ni izage. Ūyo alītogwa ni anukūlage dalali minzī mapanga.

¹⁸Ū nene nalīng'hūgūla būlī munhū ū wa kwīyigwa ī mihayo ya būhangi wa mu shitabo shenīshi gīkī, ose ose ūyo ongeja mhayo a higūlya ya yenīyī, ū Mulungu akūng'ongeja ū būluhiwa ūbo wandīkilwe ū mu shitabo shenīshi.

¹⁹Hama nūūlū ose ose wīnja mhayo ū mu yose īyo yandīkilwe ū mu shitabo sha būhangi wenūbū, ū Mulungu akūng'wīngīja ū ngabo gwakwe a ha ntī gwa būpanga, nū mu nzengo ng'wela.

²⁰Ū Nkaanīji wayo ī mihayo yenīyī alīhaya, “Ee naliza wangū.” Alichene, nzūgū Seeba Yesu.

²¹Shigongo sha ng'wa Seeba Yesu shibize hamò na banhū bose a ba ng'wa Mulungu. Alichene.