Read Sukuma Bible 2015 – Bibilia Ilagano Lya Kale 2015 Kūkundūlūlwa 3 Bible Online

Kūkundūlūlwa 3 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 3

¹“Nū malaika wa kanisa ya Salidi ng'wandīkīlage gīkī, ‘Ī mihayo īyī alīyīhaya ūyo ayīdimile ī Myoyo mpungatī ya ng'wa Mulungu, nī Sonda īji mpungatī: Nīmanile ī milīmo yako, nguno ūlī na lina lya gīkī ūlī mpanga, alīyo ūchile!

²Lang'hanaga wīgunanhe īdaame ī mihayo īyo īlīhaya kūshilīlīkīīla. Nguno natūbonaga gīkī ī milīmo yako īshikanile ū kū būtongi bo ng'wa Mulungu wane.

³Hūna lūūlū, yizūkagwe īyo wamala kwīyanukūla na kwīyigwa, īdimage gete, hama ūgalūke ooye. Ūlū ūtalang'hanile nakwiza gītī ng'wibi; ūtūdūla ū kūlīmana ī likanza lya kwiza kwane.

⁴Alīyo ūtaalī ūlī na mina magehu ū mu Salidi, banhū abo bataalī kūsosohaja shizwalo shabo. A benabo h'abo bakūshimīza hamò nane bazwalile shizwalo shape, nguno bigeleelilwe ū mhayo gwenūyo.

⁵Ū wa kūpyena akūzwalīkwa shizwalo shape gīko, hama natūlījimya na hado yaya ī lina lyakwe ū mu shitabo sha būpanga; na hangī nakūlīkaanīla hape ī lina lyakwe ū kū būtongi bo ng'wa Baba, nū kū bamalaika bakwe.

⁶Ūyo alī na gūtū ni ayigwage īyo Moyo alījiwīla ī kanisa.’

⁷“Nū malaika wa kanisa ya Filadelifia ng'wandīkīlage gīkī, ‘Ī mihayo īyī alīyīhaya ū ng'wela, ūyo alī Ng'hana yenekīlī; ūyo alī na lūfungūlo lwa ng'wa Daūdi. Ū wei h'ūyo akalugūlaga na atīho wa kūlugala; nūūlū ūlugala atīho wa kūlugūla:

⁸Nīmanile ī milīmo yako, hūna lūūlū managa gīkī naamalile kūkūlugūlīla mīta, ūyo atīho wa kūgūlugala; nguno nūūlū īkī ūlī na nguzu ngehu, alīyo nahene ūgūdimile ū mhayo gwane; nī lina lyane ūtaalī ū kūlīlema!

⁹Managa gīkī a ba ng'wisinagogi lya ng'wa Shetani abo bakūlomalomaga bihaya gīkī Bayudaya alīyo batī bene, nakūbīīta bize batuje mazwi kū mhambala jako; hama nakūbīīta bamane gīkī nakūtogilwe.

¹⁰Nīyo ū bebe īkī ūgūdimile ū mhayo gwane ū gwa wiyūmīlīja, nū nene nakūkūlang'hana ū bebe ū ng'wikanza lya kūgeng'wa, īlo līlī hihī kwiza mu sī, kūlwa kūbagema pye a bikaji ba mu sī.

¹¹Nizile wangū, shūmīīlage īsho ūlī nasho, atizilonga wa kūkūtaaja ī ngikili yako.

¹²Ū wa kūpyena nakūng'wīta kūbiza ng'hīngī ya mu hekalu ya ng'wa Mulungu wane, na atīnga mo na hado yaya; nīyo ī lina lya ng'wa Mulungu wane nakūlyandīka a halī munhū ng'wenūyo, nī lya nzengo go ng'wa Mulungu wane, ū gwa Yelusalemu mhya ūyo gūkwika kūfuma ng'wigūlū kūlī Mulungu wane, nī lina lyane ī lipya.

¹³Ūyo alī na gūtū ni ayigwage īyo Moyo alījiwīla ī kanisa.’

¹⁴“Nū malaika wa kanisa ya Lodikea ng'wandīkīlage gīkī, ‘Ī mihayo īyī alīyīhaya ū Alichene yenekīlī, ū Nkaanīji nsanyiwa na wa ng'hana, ū Ntaale wa shiseeng'wa sha ng'wa Mulungu:

¹⁵Nashimanile ī shītwa shako, gīkī ūtī nedeku nūūlū ūtī nsebu; hambū hambū ūlū ni wabiza nedeku nūūlū nsebu.

¹⁶Hūna lūūlū īkī ūlī nūngūzu, ūtī nsebu nūūlū ūtī nedeku, nakūkwigafula nakūswe wīnge ū mu nomo gwane!

¹⁷Nguno ūkwigīmbaga ūhaya gīkī, “Nalī nsabi, naasaba natī na būgehelwa bose bose!” Alīyo ūtamanile gīkī ūlī na makoye, ūlī kunese wa bakunese wa kūpīnīhalīlwa; hangī ūlī mboku, na ūlī dūūhū!

¹⁸Nalīkūyangūla wize kūlī nene, ūgūle zahabu ījo jejiwe bo kūbītiwa mu moto nang'ho ūsabe; ūzwale na shizwalo shape ūkundīkīje ī minala ya dūūhū yako, wibile na būgota bo miso ū kū miso gako wandye kūbona.

¹⁹Pye abo nabatogilwe ū nene nakabahamaga na kūbahūgūla, hūna lūūlū dīlīlaga ūgalūke.

²⁰Ī haha nīmīīlaga ha mīta nalītūla hoodi; būlī ng'wene ūyo ūliigwa ī lilaka lyane ūgūlugūla ū mīta gwakwe nakwingīla nalye nang'hwe, nū wei hamò nū nene.

²¹Ū wa kūpyena nakūnzunīlīja kwigasha hamò nane a hī Isumbī lyane lya būtemi; gīt'ūmo nū nene nalī mpyeni na nigashije hamò na Baba hī Isumbī lyakwe lya būtemi.

²²Ūyo alī na gūtū ni ayigwage īyo Moyo alījiwīla Ī kanisa.’”