Read Sukuma Bible 2015 – Bibilia Ilagano Lya Kale 2015 Kūkundūlūlwa 5 Bible Online

Kūkundūlūlwa 5 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 5

¹Hūna nūbona shitabo ū mu nkono gwakwe ū gwa būlyo, ūyo walī igashije a hī Isumbi lya būtemi. Shalī shandīkilwe ū mu gatī na a higūlya, hama shūtungwa matungījo mpungatī.

²Kūhayimanīla nabona malaika wa nguzu alīhamuka n'ilaka itaale alīhaya gīkī, “Nani ūyo igeleelilwe kūgataligūla a matungījo gasho ī shitabo, na kūshikundūla?”

³Atigelile nūūlū ūmò, pye hose na hose ū ng'wigūlū nū mu sī, nūūlū ni mu gatī ya sī; atilongile wa kūdūla kūshikundūla ī shitabo shenīsho, nūūlū kūshilola dūhū yaya!

⁴Nakalīla no nguno akagaya nūūlū ūmò, ūyo igeleelilwe kūshikundūla ī shitabo shenīsho, nūūlū kūshilola!

⁵Alīyo ūmò wa Banamhala ūniwīla gīkī, ūtalīlage; nolage ūyo alī Shimba ya lūganda lo ng'wa Yuda, ūyo alī Nji go ng'wa Daūdi. Ū ng'wenūyo hū mpyeni, hū ng'wene akūgataligūla a matungījo mpungatī ga shitabo shenīsho, ashikundūle!

⁶Hūna a ha gatī gatī yī Isumbī lya būtemi nūmona Ng'wana wa Ng'holo wīmīīlaga, walī apīndiwe nī Shiseeng'wa shipanga ī shine, hamò na a Banamhala. Wabonekanaga gītī gīkī walī wasīnzwa, na walī na mapembe mpungatī na miso mpungatī. Ī yenīyo h'ī Myoyo ya ng'wa Mulungu īyo īkatūmagwa kūja hose pyī ū mu sī.

⁷Ūshika ūshisola ī shitabo ū mu nkono gwa būlyo gwakwe ūyo walī wigasha hī Isumbi lya būtemi.

⁸Aho washisola ī shitabo, ī Shiseeng'wa shipanga ī shine na a Banamhala abo makūmi abīlī na bane būgwa ū kū būtongi bokwe ū Ng'wana wa Ng'holo. Būlī ng'wene walī na ndono; na baalī na nzweso ja zahabu jokalile ngazu go ng'waso gwawiza, hū būlombi wa beela.

⁹Bandya kūhelelekeja kwīmba lyīmbo ipya; balīhaya gīkī, “Wigeleelilwe ū bebe kūshisola ī shitabo, nū kūgataligūla a matungījo gasho, nguno ūkasīnzwa. Hūna kūlwa mpango gwa mininga gako wankomoolelile banhū ū Mulungu, kūfuma mu ng'anda na ndīmi jose, na mahanga gose.

¹⁰Wabīītile kūbiza būtemi kūlwa ng'wa Mulungu wise; ūbīīta kūbiza bagabīji, na bakūbiza basugi ū mu sī.”

¹¹Hūna nūbona, hama niigwa n'ilaka itaale lya bamalaika baalī balīpīndije ī Lisumbī lya būtemi, nī Shiseeng'wa shipanga na a Banamhala. Ī lisaabu lyabo baalī būhī na būhī, makūmi ga mashihūmbī, ng'hangala mashihūmbī makūmi!

¹²Bahamukaga n'ilaka itaale balīhaya gīkī, “Ū Ng'wana wa Ng'holo ūyo walī wasīnzwa igeleelilwe kwanukūla būdūla na būsabi na masala, na nguzu. Hangī igeleelilwe ikūjo na kūgongoolwa, na kūkumīlījiwa!”

¹³Hama pyī ī shiseeng'wa īsho shilī ng'wigūlū na mu sī, nū mu gatī ya sī, nī sha mu nyanza, pye gete ī shose īsho shilī musho nūshiigwa shilīhaya gīkī, “Ū kūlī we ūyo igashije hī Isumbi lya būtemi, nū kūlī Ng'wana wa Ng'holo, shiigeleelilwe kūbiza ho būkumīlīja, n'ikūjo, na būgongooji, na būdūla; kūshisha shiku jose!”

¹⁴Nasho ī Shiseeng'wa shipanga ī shine shūhelelekeja shilīhaya, “Alichene.” A Banamhala abo makūmi abīlī na bane būgwa ha sī būnamya.