Read Sukuma Bible 2015 – Bibilia Ilagano Lya Kale 2015 Kūkundūlūlwa 6 Bible Online

Kūkundūlūlwa 6 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 6

¹Hūna nūmona ū Ng'wana wa Ng'holo walītaligūla līmò lya matungījo mpungatī genayo. Ū mu shiseeng'wa shipanga ī shine, niigwa shimò shayomba n'ilaka gītī lya kūpalalūka kwa mbula; gīkī, “Nzūgū!”

²Kūlola ī gīkī, nūbona falasa yape. Ū ndamhīji wayo walī na būta; winhwa ngikili, hūna ūja alīpyena nyapyeni.

³Ū Ng'wana wa Ng'holo aho wataligūla itungījo lya kabīlī, niigwa Shiseeng'wa sha kabīlī ū mu Shiseeng'wa shipanga shenīsho; shūhaya, “Nzūgū!”

⁴Yūfuma falasa yīngī, ī yene yaza, ūyo walī ayīdamhīlile winhwa līlūshū itaale, winhwa būdūla bo kūyīnja ī mhola ū mu sī; a banhū bandye kwibūlaga boi bike!

⁵Aho wataligūla itungījo lya kadatū, niigwa ī sha kadatū ū mu Shiseeng'wa shipanga; shūhaya, “Nzūgū!” Kūlola ī gīkī, nūbona falasa yapi, ūyo walī ayīdamhīlile walī n'ipimīlo ū mu nkono gokwe.

⁶Niigwa gītī ilaka lyafuma a ha gatī ya Shiseeng'wa shipanga ī shine shenīsho; līlīhaya gīkī, “Ngelekelo īmò ya ngano kū denali īmò, na ngelekelo idatū ja shayili kū denali īmò; a maguta a gene galekage gīko, pyī nū walwa!”

⁷Aho wataligūla itungījo lya kane, nūliigwa ī lilaka lya Shiseeng'wa shipanga ī sha kane; shūhaya, “Nzūgū!”

⁸Aho nataalī nalolile nūbona falasa ya būshīni; ūyo walī ayīdamhīlile ī lina lyakwe witanagwa Lūfu, wakūūbījiagwa na Kūlimu! Binhwa būdūla bo kūja balībūlaga na līlūshū, na nzala, na mahūūya, na mashiinū ga mu mapoolu; bamale lobo ya banhū ba mu sī.

⁹Aho wataligūla itungījo lya katanò nūbona a ha sīlīlī ya ng'walīlo myoyo ya banhū abo baalī babūlagwa kūlwa nguno ya mhayo go ng'wa Mulungu, na kūlwa nguno ya būkaanīji ūbo baalī babūdimile.

¹⁰Baalīlaga n'ilaka lya higūlya balīhaya gīkī, “Ūkwikala ūlindīīlile kūshisha nanalī Seeba ng'wela na Ntūngīlīja? Ūtūbalamulaga a bikaji ba mu sī ūbamalīle shiilī kūlwa mininga gise?”

¹¹Hūna binhwa būlī ng'wene shizwalo shape, būwīlwa bifuule ho kakanza kado, kūshisha līng'we ī lisaabu lya batūmami bichabo, abo nabo balī hihī kūbūlagwa, gīt'ūmo bakīītīlwa a boi!

¹²Aho wataligūla itungījo lya katandatū nūbona yabiza ho nyahīnga nhaale; ī līīmi lyūhīndīhala, lyūbiza gītī igūnīla lya booya būhīndīhazu, nū ng'weji gwalalūka pyī ū gose, gūbiza gītī mininga.

¹³Ī sonda jūyūmodagūka ha sī, gīt'ūmo ntī gūkalagagījaga maholoosha gago ūlū gūtinginyiwa na nyaga ntaale.

¹⁴Ī ligūlū nalyo lyīnjiwa ho, lyūbiza gītī shitabo shilingilwe; na būlī lūgūlū, na a majinga a gose, shīnjiwa a ha wikalo washo!

¹⁵A batemi ba mu sī na a batongeeji, hamò na a bataale ba mabita ga bashilikale, na a basabi, na a banhū ba makaya; pye na a basese na a babo balī mu wiyabī, bandya kwibisa mu ngūlū, mu mapilinga ga mawe.

¹⁶Būyūjiwīla ī ngūlū na a mawe gīkī, “Tūpondejagi mutūbise twīnge ū kū būshū bokwe ūyo igashije hī Isumbi lya būtemi, nū būpelanu bo Ng'wana wa Ng'holo tūwibise!

¹⁷Nguno ū lūshikū lo kūpelanīlwa kwabo lwashikaga; nani ūyo akūgema kwīma ho?”