Read Sukuma Bible 2015 – Bibilia Ilagano Lya Kale 2015 Kūkundūlūlwa 7 Bible Online

Kūkundūlūlwa 7 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 7

¹Hūna a ha numa ya yenīyo nūbona bamalaika bane bīmīīlaga kū mhandī ja sī būne wajo. Baalī bīdimīīlile ī miyaga ya sī būne wayo, bīhangīja ītizīhuuyembela ī sī nī nyanza; nūūlū ītizūhuuyembela ntī gose gose.

²Nūmona na malaika ūngī aliza kūfuma kū būfuma līīmi, walī n'imeng'helo lya ng'wa Mulungu mpanga; ūbahamukīla n'ilaka itaale a bamalaika a bane, abo baalī bazunīlījiwa kwīkenaagūla ī sī nī nyanza.

³Ūbawīla gīkī, “Mutizīkenaagūla ī sī nī nyanza nī mitī; kūshisha tūbameng'he kū būshū a batūmami ba ng'wa Mulungu wise!”

⁴Hūna nūliigwa ī lisaabu lyabo abo bakameng'hwa; baalī shihūmbī igana na makūmi ane na shine (144,000) ba kūfuma mu būlī lūganda lo Baisilaeli.

⁵Ū mu lūganda lo ng'wa Yuda, būmeng'hwa 12,000. A ba mu lūganda lo ng'wa Lubeni 12,000. A ba mu lūganda lo ng'wa Gadi 12,000.

⁶A ba mu lūganda lo ng'wa Asheli 12,000. A ba mu lūganda lo ng'wa Nafutali 12,000. A ba mu lūganda lo ng'wa Manase 12,000.

⁷A ba mu lūganda lo ng'wa Simioni 12,000. A ba mu lūganda lo ng'wa Lawī 12,000. A ba mu lūganda lo ng'wa Isakaali 12,000.

⁸A ba mu lūganda lo ng'wa Zabuloni 12,000. A ba mu lūganda lo ng'wa Yosefu 12,000. Na a ba mu lūganda lo ng'wa Benjamini 12,000.

⁹Ha numa ya henaho, aho nataalī nalolile nūbona ibita lya banhū itaale no, atīho nūūlū ūmò ūyo adūgije kūbasolooja; baalī ba kūfuma mu mahanga gose, na ng'anda jose, ba ndūgū jose na ndīmi jose. Baalī bīmīīlile ū kū būtongi wī Isumbi lya būtemi, nū kū būtongi bo Ng'wana wa Ng'holo, bazwalile shizwalo shape. Ū mu makono gabo baalī babūūkije matambī ga mitī ya nhende.

¹⁰Bahamukaga n'ilaka itaale balīhaya gīkī, “Ū būpīji būlī bo ng'wa Mulungu wise ūyo igashije hī Isumbi lya būtemi; hamò na Ng'wana wa Ng'holo.”

¹¹Hūna pye a bamalaika abo baalī balīpīndije ī Lisumbī lya būtemi, na a Banamhala nī Shiseeng'wa shipanga ī shine, būgwa bachimīgije ū kū būtongi wī Isumbi lya būtemi, būnamya ū Mulungu.

¹²Būhaya, “Ee kūkumīlīja na kūgongoola na masala na kūlūmba, n'ikūjo na būdūla na nguzu; shiigeleelilwe kūlī Mulungu wise shiku jose: Alichene!”

¹³Hūna ūmò wa Banamhala ūlūngalūnga; ūniwīla gīkī, “Banani abo bazwalile shizwalo shape benaba, na hangī bafumile halī?”

¹⁴Nane nūng'wīla, “Seeba wane; ū bebe h'ūyo ūmanile!” Hūna ūniwīla gīkī, “A benaba hū bene abo bafumile mu būluhiwa ū būtaale; ī shizwalo shabo baashifula mu mininga ga Ng'wana wa Ng'holo.

¹⁵H'ī nguno yene balī kū būtongi wī Isumbi lya būtemi lya ng'wa Mulungu, bakūntūmamīlaga līīmi na būjikū mu hekalu yakwe. Nang'hwe ūyo igashije hī Isumbi lya būtemi akūbafīīkīja n'iheema lyakwe.

¹⁶Batalatuuba hangī, nūūlū nota batalakolwa, nūūlū līīmi lītalaboocha, pyī nūūlū miyaga yose yose ītalabakoya hangī.

¹⁷Nguno ū Ng'wana wa Ng'holo ūyo alī ha gatī yī Isumbi lya būtemi, akūbadīīma na kūbatongeela kū nzwinzī ja minzī mapanga. Ū Mulungu akūshipyagūla ī shisoji shīnge pyī ū mu miso gabo.”