Read Sukuma Bible 2015 – Bibilia Ilagano Lya Kale 2015 Kūkundūlūlwa 8 Bible Online

Kūkundūlūlwa 8 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 8

¹Aho walītaligūla ī litungījo lya mpungatī hūbiza sele sele ū ng'wigūlū, ikanza gītī lya nusu sa!

²A bamalaika mpungatī abo baalī bīmīīla kū būtongi bo ng'wa Mulungu, nūbabona binhwa mapembe mpungatī.

³Na malaika ūngī wiza wīmīīla ha ng'walīlo; walī winhwa ngazu ningī mu shinje ya zahabu, gīkī azuukīje hamò na būlombi wa beela bose, a ha ng'walīlo gwa zahabu ūyo gwalī kū būtongi wī Isumbi lya būtemi.

⁴Hūna ī lyochi lya ngazu nū būlombi wa beela bose, shūfuma ū mu nkono go ng'wa malaika ng'wenūyo, shilīdundumūka shilinhile kū būtongi bo ng'wa Mulungu.

⁵Hama ū malaika wīsola ī shinje ūyokaja makala ga moto kūfuma a ha ng'walīlo henaho, ūgūponeja mu sī; shūbiza ho būpalalūki na mihilimo na ndabi na nyahīnga.

⁶Hūna a bamalaika mpungatī abo baalī na mapembe, bibeeja beeja gīkī bandye kūgang'ang'aaja.

⁷Ng'hana ū wa kwandya ūlīng'ang'aaja ī lipembe lyakwe; yūgwa a ha sī mbula ya mawe, na moto gūsangīlīgije na mininga; selusi īmò ya sī yūbakīla, na selusi īmò ya mitī yūjiga, na a maswa a madoto gūjiga pye.

⁸Nū malaika wa kabīlī ūlīng'ang'aaja ī lipembe lyakwe; līshikolo itaale lya kūbiza gītī lūgūlū lyūponejiwa mu nyanza līkūbakaga moto. Selusi īmò ya minzī ga mu nyanza yūgalūka kūbiza mininga.

⁹Hūna selusi īmò ya shiseeng'wa ī sha mu nyanza īsho shilī na būpanga shūshila kūcha, na selusi īmò ya meli jūkenaagūka.

¹⁰Nū malaika wa kadatū ūlīng'ang'aaja ī lipembe lyakwe; yika Sonda kūfuma ng'wigūlū īlībaka moto gītī līchenge itaale. Yūgwīla ha selusi īmò ya myongo, nī nzwīlo ja minzī.

¹¹Ī lina lyayo ī Sonda yenīyo īkitanagwa Būlūlū. Selusi īmò ya minzī gūlūla; banhū bingī būshila kūcha kūlwa nguno ya būlūlū bo minzī.

¹²Nū malaika wa kane ūlīng'ang'aaja ī lipembe lyakwe; selusi īmò ya līīmi yūtūlwa, na selusi īmò ya ng'weji, na selusi īmò ya sonda ī jose. Selusi īmò ya shose īshi yūbiza mu giiti; hū kūhaya selusi īmò ya makanza ga līīmi yūbiza mu giiti; na a makanza a ga būjikū naho gīko.

¹³Kūhayimanīla nabona mbeshi īlīlala ng'wigūlya, nūyigwa īlīhamuka n'ilaka itaale īlīhaya gīkī, “Bagwīlwa makoye, bagwīlwa makoye a banhū abo balī mu sī kūlwa nguno ya malaka ga mapembe ga bamalaika a badatū, ayo gashiiga ū kūng'ang'aajiwa!”