Read Sukuma Bible 2015 – Bibilia Ilagano Lya Kale 2015 Kūkundūlūlwa 9 Bible Online

Kūkundūlūlwa 9 - Sukuma Bible 2015 – Bibilia Ilagano Lya Kale 2015 bible

Kūkundūlūlwa 9

¹Nū malaika wa katanò ūlīng'ang'aaja ī lipembe lyakwe; nūbona Sonda yika kūfuma ng'wigūlū, yinhwa lūfungūlo lwa h'ishimayenze.

²Yūlīkundūla ī lishimayenze lyenīlo, lyūfuma mo lyochi līlīdundumūka gītī līlīfuma h'ibībī itaale; pyī ū ng'wilunde hūbilūhīja kūlwa nguno ya lyochi īlo līkafuma ng'wichongo lyenīlo, nī līīmi lyūhīndīhajiwa.

³Hūna ū mu lyochi lyenīlo jūfuma mo njige, jiza ha sī; jalī jinhwa būdūla gītī būdūla bo ng'homi ja ha sī.

⁴Alīyo jalī jalemejiwa ū kūgakuumya a maswa ga ha sī, nūūlū shikolo shose shose ī shidoto, yaya nūūlū ntī gose gose, ūlū ītī banhū dūhū, abo batī na lūmeng'ho lwa ng'wa Mulungu kū būshū wabo.

⁵Nīyo hangī jalī jalemejiwa ū kūbabūlaga, alīyo jibaluhye dūhū ikanza lya myeji ītanò. Ū būsūngū wajo walī gītī būsūngū bo ng'homi ūlū yūnuma munhū!

⁶Nīyo ū mu shikū jenījo a banhū bakūyūlīkooba ī licha, alīyo batūlīpandīka, bakūlwikūmva no ū lūfu, alīyo lūkūyūbapeela.

⁷Ī njige jenījo jabonekanaga gītī falasa jimalīīlile kūja mu būlūgū; ū kū mitwe yajo jalī jitūūlīkījiwe shikolo sha kūbiza gītī ngikili ja zahabu, ū būshū wajo walī gītī būshū wa banhū.

⁸Jalī na booya gītī nzwīlī ja bakīma, a mino gajo gaalī gītī ga shimba.

⁹A ha shikuba jalī n'ibbapala lya kūbiza gītī lūmūda lwa chūma. Ū ng'huutumo gwa manana gajo gwalī gītī nundumo gwa magogoteni mingī ga falasa jilīpeelanya kūja kū būlūgū.

¹⁰Na hangī jalī na mikīla ya lūboola gītī lo ng'homi; ū būdūla bo kūbaluhya a banhū ū mu myeji īy'ītanò yenīyo boolī kū mikīla yajo.

¹¹Jalī na ntemi wajo ūyo walī malaika wa ng'wishimayenze; ī lina lyakwe ū mu Shihebulania witanagwa Abadoni, ū mu Shiyunani Apolioni.[1]

¹²Būbiza bobīta būluhiwa būmò, alīyo a ha numa yaho boolī būtaalī wiza būngī būbīlī.

¹³Nū malaika wa katandatū ūlīng'ang'aaja ī lipembe lyakwe; niigwa ilaka kūfuma a ha mapembe ane ga ng'walīlo gwa zahabu, ūyo gūlī kū būtongi bo ng'wa Mulungu.

¹⁴Ū malaika wa katandatū ūyo walī n'ipembe lyūng'wīla ī lilaka lyenīlo gīkī, “Balekelage a bamalaika a bane, abo batungilwe kū līmongo, ī Līfulati.”

¹⁵Na ng'hana būlekelwa a bamalaika benabo, abo baalī batūūlwa ho kūshisha līshike ī likanza nū lūshikū, nū ng'weji nū ng'waka, gīkī babūlage selusi īmò ya banhū.

¹⁶Ū būkūmi wa bashilikale ba kūdamhīla falasa walī shihūmbī magana abīlī ng'hangala shihūmbī, h'ūmo nakigwīla.

¹⁷Ū kūbonekana kwajo ī falasa na a badamhīji bajo, ūmo nakabonela ū mu koolekejiwa kwane, kwalī gīkī, ū kū shikuba baalī na mūda ja chūma ja būza būbalalūku gītī bo moto na bo manjaano. Ī mitwe ya falasa jenījo yalī gītī ya shimba, ū mu nomo jafuupaga moto na lyochi na būgota bo shibiliti.

¹⁸Selusi īmò ya banhū yūshila kūbūlagwa nī shikolo ī shidatū shenīsho, ū moto nī lyochi nū būgota bo shibiliti, īsho shafumaga ū mu falasa jenījo.

¹⁹Nguno ū būdūla wajo ī falasa jenījo būlī mu milomo na kū mikīla yajo. Ī mikīla yenīyo jikītūmamīlaga kūyagaja, nguno īlī na mitwe gītī ya nzoka.

²⁰Alīyo a banhū abo bakasaaga ho, abo batabūlagilwe nī shikolo shenīsho, batagalūkile na koya ī milīmo ya makono gabo. Batooyile ū kūgalamya a masamva nī shikolo ī shingī ī sha zahabu na feza na chūma, na mawe na mantī; shikolo īsho shitabonaga nūūlū kwigwa, hangī shitīko nūūlū kūshimīza!

²¹Na hangī batagalūkile gīkī balekane nū būbūlagi wabo, pyī nū būlogi, nū būjingi, nū wibi wabo!