Read Sukuma Bible 2015 – Bibilia Ilagano Lya Kale 2015 Luzi 2 Bible Online

Luzi 2 - Sukuma Bible 2015 – Bibilia Ilagano Lya Kale 2015 bible

Luzi 2

¹Ū Naomi walī na dūgūye ū kū lwande lwa kū būkwiye, ū kū ndūgū ja ng'wa Elimeleki; ū ndūgūye ng'wenūyo ī lina lyakwe witanagwa Boazi; ngosha nsabi.

²Ū Luuzi ū muna Moabu ūng'wīla ū nina būkwi ū Naomi gīkī, “Mayū naje kū migūnda ya bagesi, ūyo alanikūlīlwe nakūmanūūpūmbīla malagalīkwa ga shilīwa ayo galīyūlekeelwa kū numa.” Naomi ūnshokeja ūng'wīla, “Jaaga dūhū ng'wana wane.”

³Hūna ūja ūūkandya kūpūmbīīla mu ngūnda nebe kū numa ya bagesi. Gashinaga ū ngūnda ūyo akashikīla gūbiza go ng'wa Boazi, munhū wa mu lūdūgū lwa ng'wa Elimeleki.

⁴Lītabītile ikanza ū Boazi nang'hwe wiza kūfuma Betelehemu; ūshikīla kūbagīsha a bagesi bakwe gīkī, “Seeba abize hamò ning'we.” Nabo būnshokeja, “Seeba akwīīlūkīle mbango.”

⁵Hūna ū Boazi ūmūūja ū ntaale wa bagesi bakwe, “Ū shīke ng'wenūyū wa kū ng'wa nani?”

⁶Nang'hwe ū ntaale wa bagesi ūshosha, “Angū ū ng'wenūyo hū ng'wene ū muna Moabu ūyo wizile na Naomi kūfuma Moabu.

⁷Washikaga a henaha ūhaya, ‘Nalīlomba naje nūūpūmbīīla na kūsoleleja a mangala ayo galīīsaagīīla mu mabelele na a malagalīkwa ayo galīīlekwa hasī kū numa ya bagesi.’ Yū, baayīnga watūmama būlī, nguno wandyaga dilū kūshisha ikanza īlī; ūlū ītī kakanza kaguhī dūhū ako waalī waaja kwifuula hado mu mbeho.”

⁸Ū Boazi ūng'wīla ū Luuzi gīkī, “Alinidegelekage ng'wana wane, yaya ū kwīnga ū mu ngūnda gwenūyū ūje kūpūmbīīla kū migūnda yīngī; bebe diimanaga nabo dūhū a batūmami bane a bashīke benaba.

⁹Gūdīlīīlage ū nīmo ūje ūkūbakūūbījaga a hanuma yabo; a basūmba bene naabahūgūlaga batizikala bakūkwīgīja malang'wa. A minzī ga kūng'wa galīho beenhaga a basūmba, ūlū ūkolwa notà jaga dūhū ūkasole ū mu shiseme shise ūng'we.”

¹⁰Ū Luuzi aho wigwa ī mihayo yenīyo ūtuja mazwi hasī, hama winama kūshisha ūkuumya hasī ū būshū, ūhaya gīkī, “Yee baba, būtogwa kī ū wenūbū, shakwenheleja kī nose ūnibone na nene, munhū ngeni wa kūfuma kūle gīko?”

¹¹Ū Boazi ūnshokeja alīhaya, “Naawīlilwe īyo ūkūng'wītīlaga ū noko būkwi, kūfuma a h'ikanza lya ngoshi wako kūzumalīka; nī gīkī wabalekile a ba so nū noko hamò nī sī ya ng'wing'we, wiza kwikala na banhū abo walī ūtabamanile kūfuma kale.

¹²Leka ū Seeba akūshokeje mu yose īyo wayītile, ū Seeba ū Mulungu wa Baisilaeli ni akūnong'hage inong'ho lyawiza; ūyo bebe wizile kūlang'hanwa mu mbeho ya manana gakwe.”

¹³Ū Luuzi ūhaya, “Baba leka nongeje kwanukūlwa ū mu miso gako; wanilūngūja no nguno walūngalūnga mihayo milyehu ū kūlī nsese wako, nūūlū īkī ū nene natigeleelilwe kūlenganījiwa nūūlū na ūmò wa basese bako a bakīma.”

¹⁴A h'ikanza lya shilīwa ū Boazi ūng'wīla, “Egeelaga aha tūlye; ūyūsombya nū ngatī gwako ū mu divai.” Ū Luuzi aho igaashije akūlyaga na a bagesi, ū Boazi ūng'winha matwajo gakalangile; ūlya kūshisha wigeja, ūsaaja gamò.

¹⁵Wahayūbūūka kwandya kūtūmama ū nshīke ng'wenūyo, ū Boazi ūbakomeleja a batūmami bakwe a bagosha alīhaya, “Ng'ūneka wasola na a mangala a matengeke, yaya ū kūng'hama.

¹⁶Ng'ūng'wīngīja nī sha mu miligo īyo ng'watungaga ng'wantūūlīla ha mhūjo wayūūbīnzagūla; yaya ū kūng'hama.”

¹⁷Na lūūlū ū Luuzi ūpūmbīīla ī shilīwa kūshisha līīmi lya mhīndī; hūna ūtūla īsho akapandīka, ūgwaasha sha kwigela kookal'idebbe.

¹⁸Ūbūūcha atwaalile kaya,[3] aho washika ūng'olekeja ū nina būkwi īsho akapandīka. Ūshifunya nī shilīwa īsho walī wasaaja aho walya wigūta, ūng'winha ū nina būkwi.

¹⁹Ū nina būkwi ūmūūja, “Walī wakapūmbīīlīlaga he ī lelo? Halī ūko walūtūmamīlīlaga? Ū munhū ūyo walī wakūyegelaga ng'wenūyo ūkūgunanha na kūkūgunanha ni īīlūkīlagwe mbango!” Hūna ū Luuzi ūng'wīla ū nina būkwi ī mihayo ya ng'wa munhū ūyo watūmamaga kū ng'wakwe, ūhaya, “Ū munhū ng'wenūyo ī lina lyakwe Boazi.”

²⁰Ū nina būkwi ūng'wīla, “Ū SSEEBA ūyo ataalī kooya kūbīītīla yawiza a bapanga na a bachiile, ni ang'wīlūkīlage ū ng'wenūyo.” Ongeja kūhaya, “Ū Boazi ndūgū o mu kaya gete; ashikile nūūlū kwingīla kaya.”

²¹Ū Luuzi ūhaya hangī, “Walī waniwīla na gīkī, ‘Nzūgū ūyūtūmama nabo a bagesi bane kūshisha gūshile ū nīmo gwa kūgesa ī shilīwa shane.’”

²²Ū Naomi ūng'wīla ū ng'wīnga okwe gīkī, “Ng'hana ī chene īkūbeelela ng'wana wane ūtūmame nabo a baanikī bakwe, nguno ūlū ūja kū migūnda yīngī ūdūgije kwītīlwa wibonya na banhū.”

²³Ū Luuzi wikalaga nū nina būkwi, kūnū akūjaga gwa wakatūmama na a baanikī ba ng'wa Boazi, kūshisha gūūshila a magesa ga būsīga na a ga ngano.