Read Sukuma Bible 2015 – Bibilia Ilagano Lya Kale 2015 Luzi 3 Bible Online

Luzi 3 - Sukuma Bible 2015 – Bibilia Ilagano Lya Kale 2015 bible

Luzi 3

¹Lwise lūmò ū Naomi ū nina būkwi o ng'wa Luuzi ūng'wīla gīkī, “Bebe ng'wana wane, ī gīsī nibūlī naleke ū kūkūkoobela ha kwifuulīla, aho nang'ho ūdūgije kwikala ūbeeja?

²Ū Boazi ng'wenūyo ūyo ūkūtūmamaga na baanikī bakwe, angū ndūgū wise gete ahene? Ī leelo ī mhīndī akūbiza na bahehi ba būsīga a ha lūbūūga.

³Na lūūlū oogaga chiza wibile na tūguta, hama ūzwaalīle na myenda yawiza. Hūn'ūje a ha lūbūūga lwa kūtūlīla, kwike ūtiziyoolecha akakūbona; nekage alye taame ang'we na kūng'wa.

⁴Ūlū lyūshika ikanza lya kūlaala deebelaga chiza aho alīīlaala; hanuma ūlaaje hoi ūkankundūje ū ng'wenda ū kū magūlū ūlaale ho nang'ho. Akūkūwīla ī ya kwīta.”

⁵Ū Luuzi ūhaya, “Mayū nakwīta gīt'ūmo ūlīhayīla.”

⁶Na ng'hana ūja a ha lūbūūga, ūūkīīta pyī ī yose īyo nina būkwi akang'wīla kwīta.

⁷Ū Boazi aho wamala ū kūlya nū kūng'wa, nī ng'holò yakwe yūzalabana, wīnga a ha ng'hunde ya būsīga, ūja ha mhūjo ūūkalaala henaho. Hūna ū Luuzi nang'hwe ūja ho akūzonaga pole pole ūshika ūgūkundūla ū ng'wenda ū kū magūlū gakwe, ūlaala ho nang'hwe.

⁸Ū būjikū aho wahuumūlīja, ū ngosha wiyigwa alīīkuumya kuumiwa; wibakīla ūgalūka kūlola, ūbona nkīma ū kū magūlū gakwe.

⁹Ūbūūja, “Bebe ūlī nani?” Ng'wanikī ūhaya, “Nene Luuzi nsese wako; gūgoloolage ūng'wenda gwako ūnikumbe nane, nguno ū bebe hū ūlī ndūgū wa bbihī wa kūdūla kwīguna ī kaya.”

¹⁰Ū Boazi ūng'wīla, SEEBA akwīlūkīle ng'wana wane, ū wiza ūbo waboolecha ī haha būlī būtaale no, kūtinda ūbo waawītile kū shikū ja kū numa. Nguno waleka kūkūūbīja basūmba, babize basabi nūūlū bahabī!

¹¹Alilūūlū ng'wana wane, īnjaga ū boobà, nakwīshikīlīja dūhū īyo ūlīnilomba. Pye a bagosha bichaane ū mu nzengo baakūbonile būūdeeba gīkī ūlī nkīma wikūjo.

¹²Na ng'hana ī chene nalī ndūgū wa bbihī wa kwīguna ī kaya, alīyo alīho ū wa bbihī kūniheeba ū nene.

¹³Na lūūlū lembeelaga henaha īkī būjikū ī haha, tūkwīlola ūlū būleele, ūlū ūbiza atogilwe ū kūkūgunanha, numho būgatū akūkūgunanha. Alīyo ūlū atatogilwe, ū nene nalīkwilahīlīla kūlī Seeba mpanga gīkī, nakūgwīta ū nīmo gwenūyo. Na lūūlū laalaga henaha kūshisha weele ū būjikū.

¹⁴Ūlaala ng'hana ū kū magūlū gaakwe kūshisha dilū y'ikingilima; alīyo ūbūūka ītaalī giiti, ītaalī shilambu munhū kūmanīīka. Ū Boazi ūnkomeleja alīhaya, “Ūtizenheleja banhū bamane gīkī walī wizaga nkīma a ha lūbūūga.”

¹⁵Ūng'wīla na gīkī, “Ali gwenhage ū ng'wenda gwako ūyo wifīīkījaga gwenūyo ūgūgoloole aha.” Aho wagūgoloola, ū Boazi ūsukīla ho ngele itandatū ja būsīga, ūng'widīīcha kū ntwe. Hūna ū nshīke wīnga ho ūshokanya mu nzengo.

¹⁶Ū Luuzi aho washika ū kū kaya, ū nina būkwi ū Naomi ūmūūja, “Kinehe ko ng'wana wane, yaaja kinehe?” Ūnsomboolela pyī īyo Boazi akang'wītīla.

¹⁷Ongeja na kūhaya, “Waninha na ngele itandatū ja būsīga, ūhaya gīkī, ‘Yaya ū kūja kūlī noko būkwi ūlī ng'hono ndūhū.’”

¹⁸Ū Naomi ūng'wīla ū Luuzi gīkī, “Lembeelaga lūūlū ī haha ng'wana wane kūshisha ūbone ūmo īlaaīle ī mihayo. Nguno ū munhū ng'wenūyo atifuula kūshisha īgoloolwe ī mihayo ī leelo īyī.”