Read Sukuma Bible 2015 – Bibilia Ilagano Lya Kale 2015 Luzi 4 Bible Online

Luzi 4 - Sukuma Bible 2015 – Bibilia Ilagano Lya Kale 2015 bible

Luzi 4

¹Ū Boazi aho wīnga a henaho, ūja kū nzengo ūūkigaasha ha mita; lītabitile ikanza wiza ū ndūgū wa bbihī ūyo Boazi wang'hayaga. Ū Boazi ūng'wīla, “Alinzūgū wigaashe aha ong'wise.” Weegeela ho wigaasha.

²Ū Boazi witana banamhala ikūmi ba mu nzengo nabo ūbawīla, “Igaashagi aha.”

³Hūna wandya kūng'wīla ū ndūgūye gīkī, “Ū Naomi ūyo washokile kūfuma Moabu alīlījinja nī lilaale īlo lyalī ya ndūgū wise Elimeleki.

⁴Naabona nakūmanīīkīje ū mhayo gwenūyū, hama nakūwīle ūlīgūle mu būtongi wa banhū aba bigaashaga aha, na mu būtongi wa banamhala ba banhū bane. Ūlū ūlītogwa ū kūlīkomoola gwītage ū mhayo gwenūyo, alīyo ūlū ūtūtogagwa, niwīlage nakūdeeba ū gwa kwīta, nguno ū mu būdūgū wise atīīko ūngī ūyo adūgije kūgwīta ū mhayo gwenūyo ūlū ūtī bebe, na nene ū wa kūkūkūūbīja.” Ū ndūgū ng'wenūyo ūhaya, “Nakūlīkomoola.”

⁵Hūna ū Boazi ūhaya, “Ū lūshikū lwa kūlīgūla ī lilaale lya ng'wa Naomi, managa gīkī ūlīngūla nū Luuzi, ū nke wa sūmba ūyo wazumalīka, ūyo wazumalīka ūmūūkīje lina ū mu wingīji wakwe.”

⁶Ū ndūgū ng'wenūyo aho wigwa gīko ūlema alīhaya, “Ūlū chene ū nene yaya ū kūlīkomoola ī lilaale lyenīlo, natatogilwe kūkenaagūla wingīji wane; līkomolage ū bebe, ū nene natūūdūla.”

⁷Ī kale ū mu Baisilaeli, ī mihayo ya kūkomoola shikolo nūūlū kūkaabanya, yajaga gīkī, ū koolecha gīkī ū mhayo gwajaga gīt'ūmo shīmīle shilī, ūmò wa bigūlīji nūūlū abo bakwikaabīlaga shikolo, wazuulaga shilatū shakwe wang'winha ū ng'wiye. Ū mu Baisilaeli ū lwenūlo hū lwalī lūmeng'ho lwa koolecha gīkī ū mhayo gwenūyo gwanukūlagwa.

⁸Na lūūlū ū ndūgū ūyo yalī īng'wigeleelilwe kūlīkomoola ī lilaale ūng'wīla ū Boazi gīkī, “Līgūlage ū bebe lībize lyako;” hūna ūzuula shilatū shimò.

⁹Ī likanza lyenīlo ū Boazi ūbawīla a banamhala na a banhū a bangī gīkī, “Ī lelo yenīyī mulī bakaanīji ba gīkī naashigūla kūfuma ū kūlī Naomi pyī ī shikolo īsho shaalī sha ng'wa Elimeleki, Kilioni, na Mahiloni.

¹⁰Nū Luuzi ū muna Moabu, ūyo walī nke o ng'wa Mahiloni hū nangūlaga wabizaga wane, kūlwa kūlīlang'hana ī lina lyakwe ūyo wazumalīkile, likale līlīho ū mu wingīji wakwe; ī lina lyakwe lītizūjimīīla gete ū mu baana ba ng'wawe, nū mu mita gwa ng'wawe; ī lelo yenīyī ng'wabizaga bakaanīji.”

¹¹Hūna a banamhala na a banhū a bangī abo baalīho a ha mita būhaya, “Ng'hana tūlī bakaanīji. Ū Seeba ni ang'wītage ū nkīma ūyo aliza mu kaya yako abize gīt'ūmo baalī ba Laheli na Leya, abo kūlwa būbīlī wabo bakīzenga ī Isilaeli. Leka ūbize munhū wa ū mu Eflata, na munhū nkumūku ū mu Betelehemu.

¹²Ū Seba akwīlūkīle ū kūfuma ū mu būbyīle ūbo alaakwinhe mu nzīla ya nshīke ūyo ataalī ndo ng'wenūyū. Ī kaya yako ībize gītī ya ng'wa Pelezi ūyo Tamali akamyaalīla Yuda.”

¹³Hūna lūūlū ū Boazi ūntoola ū Luuzi, ūbiza nke wakwe; ū Seeba ūng'winha būdūla wa kūbūūcha nda, ūbyala ng'wana ngosha.

¹⁴A bakīma būyūng'wīla ū Naomi gīkī, “Akumīlījiwe ū Seeba ūyo wakwinhaga ī lelo wa kūkūkomoola; ī lina lyakwe ni lībizage ikumūku hose pyī ū mu Isilaeli.

¹⁵Ū būpanga wako akūwinha nguzu mhya, nū mu shikū ja kū būgikūlū wako akūkūlang'hana; ū wei wabyalagwa na ng'wīnga wako ūyo akūtogilwe, ūyo alī wa mpango ntaale kūtinda bitūnja mpungatī.”

¹⁶Hūna ū Naomi ūnsola ū nīgīnī ng'wenūyo ūbiza neji wakwe, na ūnang'hana.

¹⁷A bakīma abo baalī bazengile ng'wenūmo būhaya gīkī, “Ū Naomi wapandīkaga ng'wana ngosha;” būng'winha lina lya Obedi. Ū ng'wenūyo hū walī ise o ng'wa Yese, ūyo walī ise o ng'wa Daūdi.

¹⁸Na lūūlū īshi h'ī shibyalīlwe sha ng'wa Pelezi: “Ū Pelezi walī ise o ng'wa Hezilomu,

¹⁹Ū Hezilomu ūmyaala Lamu, Lamu ūmyaala Aminadabu,

²⁰Ū Aminadabu ūmyala Nashoni, Nashoni ūmyaala Salumoni,

²¹Ū Salumoni ūmyaala Boazi, Boazi ūmyaala Obedi,

²²Ū Obedi ūmyaala Yese, Yese nang'hwe ūmyaala Daūdi.”