Read Sukuma Bible 2015 – Bibilia Ilagano Lya Kale 2015 1 Sang'weli 11 Bible Online

1 Sang'weli 11 - Sukuma Bible 2015 – Bibilia Ilagano Lya Kale 2015 bible

1 Sang'weli 11

¹Mu shikū jenījo Nahashi wa Amoni, ūkuminga ibità lya bashilikale bakwe ūūkagūgobanīla ū nzengo gwa Yabeshi-gileadi. A bagosha ba Yabeshi a bose būng'wīla, “Tūlaganage tūtūūle mhola a ha gatī yise nū bebe, a bise tūbize ha sīlīlī yako.”

²Nang'hwe ū Nahashi ūbawīla, “Nalī na mhayo gūmò, ūlū ng'ūgūzunya hū tūkūlagana tūtūūle mhola a ha gatī ying'we nū nene. Zunyagi būlī ūmò wing'we nankobole ī liso lya kū būlyo, nang'wītīle mhayo gwa kūbadiimya minala pye a Baisilaeli.”

³A banamhala ba Baisilaeli būng'wīla, “Naheene twinhage ikanza lya shikū mpungatī tūgūjinje ū mhayo gwenūyū ū mu Baisilaeli; ūlū atilongile ose ose wa kūtūguna, tūkwifunya ū kūlī bebe.”

⁴Abo bakatūng'wa aho baashika ī Gibea ya ng'wa Saulo būbawīla a banhū ū mhayo go ng'wa Nahashi; bose pye būtandūka kūlīla ng'hūngū.

⁵Ī likanza lyenīlo ū Saulo nang'hwe ūsangwa alīshikīīla kūfuma kū malaale walī wakalīma; walī na nzīkū jakwe ja kūlīma. Ūbūūja, “Bīītaga kī a banhū? Nibūlī balīīlīla?” Būng'wīla ī mihayo īyo yalī yenhwa na banhū ba kūfuma Yabeshi.

⁶Ū Saulo aho wīyiigwa ī mihayo yenīyo, ū Moyo o ng'wa SEEBA ūng'wizīīla na nguzu ningī no; ūbaka gete na būpelanu.

⁷Ī likanza lyenīlo ūsola nzīkū ibīlī, ūjisīnza hama ūjibutagūla mapingili mapingili, hūna ūtūma banhū kūgasambaaja hose pyī ū mu Isilaeli, na kūhaya, “Būlī munhū ūyo atūūfuma kūja hamò na Saulo na Sang'weli, ī nzīkū jakwe jikwītwa gīko.” Lyogohya lya ng'wa SEEBA lyūbagwīla a banhū, biza pye mu būsangī bumò.

⁸Bikumingīla Bezeki; ū Saulo aho wababala bilonga bagosha shihūmbī magana adatū a ba kūfuma mu Isilaeli, a ba kūfuma mu Yuda bilonga shihūmbī makūmi adatū.

⁹Hūna būbawīla abo baalī baatūng'wa kūfuma Yabeshi, “Bawīlagi a banhū ba Yabeshi-gileadi gīkī, ‘Ī ntondo ī līīmi ūlū līlīshika mu makanza ga kūseba, mukūbiza ng'wagunanhagwa.’” Abo baalī baatūng'wa aho baajishisha ī mhola jenījo, a banhū ba Yabeshi būyega no.

¹⁰Būūkabawīla a bana Amoni, “Ntondo tūkwifunya ū kū bing'we mutwītīle gīt'ūmo mutogelilwe.”

¹¹Alīyo ū lūshikū lwa ntondo yaho lwenūlo ū Saulo wipuuna dilū ītaalī būjikū, ūbagabanhya a banhū bakwe mu mabità adatū, hūna ng'wikanza lya ngoko ja kwandya[9] ūūkabadumīla a Baamoni ū mu ng'hambī yabo, ūbisanganīja wandya kūbasengagūla shū kūshisha līīmi lyūseba. Būsaagīīla bageehu, būsalang'hana kībi, būlī ng'wene lwakwe lwakwe; yūbiza shilambu kūbona babīlī balī hamò.

¹²Hūna a banhū būmūūja ū Sang'weli balīhaya, “Baanani ng'hana abo bahayaga gīkī, ‘Ū ng'wing'wana ng'wenūyū adūgije kūtūpīja gete!’ A banhū benabo benhagi aha tūbabūlage.”

¹³Alīyo ū Saulo ūhaya gīkī “Atīho munhū nūūlū ūmò wa kūbūlagwa ī lelo, nguno ū SEEBA wabakomoolaga a Baisilaeli.”

¹⁴Hūna ū Sang'weli ūbawīla a banhū, “Tūjagi Giligaali tūkabūshikaanye ū būtemi.”

¹⁵Na ng'hana pye a banhū būja Giligaali, būūkanshikaanya kwenūko ū Saulo a ha būtemi, kū būtongi bo ng'wa SEEBA. Būfunya na shakwinha sha būsangī kū būtongi bo ng'wa Seeeba; ū Saulo na a Baisilaeli a bose būbeeja shigukulu shitaale no.