Read Sukuma Bible 2015 – Bibilia Ilagano Lya Kale 2015 1 Sang'weli 12 Bible Online

1 Sang'weli 12 - Sukuma Bible 2015 – Bibilia Ilagano Lya Kale 2015 bible

1 Sang'weli 12

¹Hūna ū Sang'weli ūbawīla a Baisilaeli, “Ū nene naang'wigwile ūmo ng'wahayīlile, nīīta gīt'ūmo mukaniwīlīla, nūūmupandīkīla ū ntemi.

²Na lūūlū ī haha mulī nang'hwe ū ntemi wa kūmutongeela. Alīyo ū nene mulīnibona ūmo naanamhalūkīlile, neelile pe ū mu ntwe; na a baana bane balī hamò ning'we aha. Jakwīlaga ī shikū nakūmutongeelaga ū nene; nguno īlī kūfuma ha būsūmba wane kūshisha lelo.

³Ī haha ūūyū nīmīīlaga aha; nikaanīlījagi kū būtongi bo ng'wa SEEBA na ng'witīīlwa wakwe wa maguta. Naasola ng'ombe ya ng'wa nani? Nūūlū nzobe ya ng'wa nani? Nani ūyo naanyeekeja shose shose? Nūūlū halī aho munhū ose ose ūyo naang'wiboneela? Nanukūla būhongwa wa kūnibbokuja miso gane kūfuma kūlī nani? Ūlū nīīta mhayo nūūlū gūmò ū mu yenīyī nakūgūgoloola.”

⁴Būnshokeja būhaya, “Ūtaalī kūtūnyeekeja nūūlū kūtwiboneela; ūtaalī kūsola shikolo shose shose kūfuma mu nkono go ng'wa munhū nūūlū ūmò.”

⁵Na lūūlū ū Sang'weli ūbawīla, “Ū SEEBA nkaanīji wing'we, nū ng'witīīlwa wakwe wa maguta wamukaanīla ī lelo yenīyī, ūmo ng'wahayīla gīkī mutaalī kūbona shilingo kūfuma mu nkono gwane.” Būhaya, “Na ng'hana alī nkaanīji wise.”

⁶Hūna ū Sang'weli wandya kūbizūkīja a banhū; ūbawīla, Ū SEEBA hū ng'wene ūyo akabasola ba Musa na Alooni, būbīnja a bakūlūgenji bing'we ū mu sī ya Misili.

⁷Na lūūlū ī haha īmīīlagi mulembeele nang'wizūkīje kū būtongi bo ng'wa SEEBA, ī shītīle shakwe ī sha būtūngīlīja īsho wang'wītīla a bing'we na a bakūlūgenji bing'we.

⁸Ū Yakobo akasaamīla Misili, a bakūlūgenji bingwe būnīlīīla ū SEEBA gīkī abagunanhe, ū SEEBA ūbatūma a ba Musa nū Alooni kūbafunya a bakūlūgenji bing'we ū mu sī ya Misili, biza būbatūūla ū ng'wipandī īlī.

⁹Alīyo būng'wība ū SEEBA Mulungu wabo, na lūūlū ūbajinja mu nkono go ng'wa Sisela, ūyo walī ntaale wa mabità ga ng'wa Hazooli, na mu makono ga Bafilisiti, na ga ntemi wa Moabu, ūlwa nabo būlūgū.

¹⁰Būnīlīīla hangī ū SEEBA balīhaya, “Twahūbile nguno twanekile ū SEEBA twandya kūtūmamīla Maabaalī na Maashitoleti, alīyo ī haha tūlīkūlomba ūtūpīje ū mu makono ga banishi bise, tūkūkūtūmamīla bebe.”

¹¹Na ng'hana ū SEEBA ūmutūmīla ba Yelubaa,[10] Balaaka,[11] Yefuta na Sang'weli; ū mu nzīla yenīyo ūng'wīnja ū mu makono ga banishi bing'we hose hose, ng'ūbiza mu mhola.

¹²Alīyo aho ng'wamona ū ntemi Nahashi wa Baamoni aliza kūng'ūūbūkīla gīkī alwe ning'we būlūgū, ng'ūniwīla, “Yaya lūūlū ī gete tūpandīke ntemi wa kūtūsuga; nūūlū īkī ū SEEBA Mulungu wing'we hū ng'wene ū Ntemi wing'we.

¹³Alilūūlū, ī haha ūūyū ū ntemi ūyo ng'walūng'wigongejaga, ūyo ng'walombile kwinhwa; mulībona gīkī ū SEEBA wamutūūlīlaga ntemi.

¹⁴Ūlū ng'ūng'ogoha ū SEEBA ng'ūntūmamīla na kūng'wigwa we, ng'ūleka ū kūshigomela ī shilagīlo shakwe; nīyo ūlū gīkī a bing'we nū ntemi wing'we ūyo alīmusuga mukūnondeela ū SEEBA Mulungu wing'we, īkūbeelela no!

¹⁵Alīyo ūlū ng'ūlema ū kūng'wigwa ū SEEBA, ng'ūshigomela nī shilagīlo shakwe, a henaho ū nkono gwakwe gūkwilwisha ning'we, gīt'ūmo gwilwisījaga na a bakūlūgenji bing'we.

¹⁶Na lūūlū ī haha lembeelagi gete ūmo ng'wīmīīlīlaga gīko, mugūbone ū mhayo ū ntaale ūyo SEEBA alīhaya kūgwīta kū būtongi wing'we.

¹⁷Ī likanza īlī lītī lya kūgesa ngano? Nanombe ū SEEBA ī haha wenhe mbula ya kūpalalūka. Hū mukūbūdeeba ū būbi ūbo ng'wawītile ū kūlī SEEBA ū mu kūlomba ng'winhwe ntemi.”

¹⁸Hūna ū Sang'weli ūnomba ū SEEBA, na ng'hana lūshikū lwenūlo dūhū ū SEEBA wenha mbula ya kūpalalūka. Na lūūlū a banhū būng'ogoha noi ū SEEBA nū Sang'weli.

¹⁹A banhū būng'wīla gīkī ū Sang'weli, “Balombelage a batūmami bako ū kūlī SEEBA Mulungu wako tūtizūūcha, nguno a higūlya ya būkenaagūji wise ūbo tūlī nabo kūfuma kale, tongelelegije ho nū wa kūlomba kwinhwa ntemi.”

²⁰Ū Sang'weli ūbawīla, “Mutogohage na ng'hana ng'wītile ī yabūbi ī yose yenīyī; kwike ilang'hanagi mutizūgalūka mukaneka ū SEEBA. Alīyo ntūmamīlagi SEEBA na ng'holò jing'we jose.

²¹Yaya ū kūgagalūkīla hangī a maashiikolile ayo gatī na ngofyoolo nūūlū hado. A genayo gatūmugunanha mhayo gose gose, gatūdūla nūūlū kūmupīja; nguno gatī na shose shose nūūlū hado.

²²Nīyo īkī ū SEEBA akayega kūng'wīta a bing'we kūbiza bakwe, ū wei atīko ū kūbaleka a banhū bakwe, nguno ī lina lyakwe līl'itaale no.

²³Hama nūūlū ū nene ū kūleka ū kūmulombela, nose nang'hūbe ū SEEBA, gwene gūlī ngilo gete; nīyo nakūmulanga nī nzīla ī yawiza īyo ītūngīlīgije.

²⁴Kwike īng'wigeleelilwe kūng'ogoha ū SEEBA na kūntūmamīla mu wishigwa na ng'holò jing'we jose. Yizūkagwi ī mitaale mitaale īyo wang'wītīla.

²⁵Alīyo ūlū ng'wikale mukwītaga yabūbi, mukūkenaagūlwa pyī nū ntemi wing'we.”