Read Sukuma Bible 2015 – Bibilia Ilagano Lya Kale 2015 1 Sang'weli 13 Bible Online

1 Sang'weli 13 - Sukuma Bible 2015 – Bibilia Ilagano Lya Kale 2015 bible

1 Sang'weli 13

¹Ū Saulo aho alandya kūbiza ntemi walī na myaka makūmi adatū, ūbasuga a Baisilaeli ikanza lya myaka makūmi anè n'ībīlī.

²Hūna ū Saulo ūsolanhya banhū shihūmbī shidatū ū mu Baisilaeli, abo shihūmbī shibīlī wikala nabo wei īpandī lya Mikimashi, na mu sī ya magūlya ga Beeseli; abo shihūmbī shimò būbiza na Yonasani ipandī lya Gibea ya mu sī ya Benjamini, a banhū a bangī ūbawīla kūshoka kaya.

³Ū Yonasani ūūkadumīla ng'hambī ya Bafilisiti yalī Geba wīkenaagūla; a Bafilisiti būgwigwa ū mhayo gwenūyo. Hūna ū Saulo ūfuula mhembe kūlwa kūkumūcha hose pyī ū mu sī; ūhaya, “Igwaagi pye a Bahebulania.”

⁴Na ng'hana pye a Baisilaeli būjiigwa ī ng'hūlū jenījo; ī gīkī ū Saulo wakenaagūlaga ng'hambī ya Bafilisiti, nī gīkī a Baisileli bakanung'ha inyema ū kū Bafilisiti. A banhū bikobya kūnondeela Saulo, būūkibilingīla Giligaali.

⁵A Bafilisiti nabo bibilinga bingī no kūlwa kwilwisha būlūgū na a Baisilaeli; baalī na magogoteni ga būlūgū shihūmbī shidatū, na bendeesha baago shihūmbī shitandatū, a bashilikale a bene baalī bingī no, gītī maseni ga ha ng'walo gwa nyanza. Būūkatūūla ī ng'hambī yabo Mikimashi, kīya ya Beeti-aveni.

⁶A Baisilaeli aho babona gīkī ī mihayo īkūbadaamīla (nguno bakogoha, būgwa ng'holò), būja kwibisa mu mahalo na mu masaka, mu mapilinga ga mawe, mu myoobo na mu makomelo.[12]

⁷Nīyo bamò ba Bahebulania būgūkīla ū mongo gwa Yolodani, būūkibisa kū sī ja Gadi na Gileadi. Ū Saulo ūshiiga Giligaali; pye a bashilikale abo banondeelaga baadetemaga no nguno ya boobà.

⁸Ū Saulo ūlindīīla ikanza lya shikū mpungatī gīt'ūmo Sang'weli walī wahelela; alīyo ū Sang'weli atizile ī Giligaali, nose a banhū bakwe ū Saulo bandya kūsambaala.

⁹Hūna ūhaya, “Ī gete nenhelagi aha ī shitambò sha kūpemvwa nī shakwinha sha būsangī.” Ū Saulo ūshifunya ī shitambò sha kūpemvwa!

¹⁰Aho wamala dūhū ū kūshifunya ī shitambò sha kūpemvwa, ū Sang'weli ūshika; ū Saulo ūja kūnsūng'wanha.

¹¹Ū Sang'weli ūmūūja, “Bebe wītaga mhayo kī ū gwenūyū?” Ū Saulo ūhaya, “Aho naabona gīkī a banhū bandya kūsambaala alīyo nū bebe ūtizaga gīt'ūmo twalī twalaganīla, hama nūūbabona na a Bafilisiti bakwikumingaga Mikimashi,

¹²nūūbona gīkī, ‘Ī gete nose a Bafilisiti bakūkīla bize ī Giligaali, banisange nataalī nūūlū kūlomba būgunanhi bo ng'wa SEEBA.’ Na lūūlū nihadīkīja ū kūfunya ī shitambò sha kūpemvwa.”

¹³Ū Sang'weli ūnshokeja alīhaya, “Wītaga mhayo gwa nyachilū ū gwenūyo, ūtashidiimile ī shilagīlo īsho SEEBA Mulungu wako walī wakwinhile; ūlū ni washidima, ī haha ū SEEBA ni wabūguzuhya ū būtemi wako; ni wakwīta ūbize ntemi wa Baisilaeli wa būja na būja.

¹⁴Alīyo ī haha ū būtemi wako būtūūsegenela, ū SEEBA wamalaga kūkooba munhū ūngī ūyo alī ha ng'holò yakwe; ū ng'wenūyo h'ūyo wansolaga kūbiza ntongeeji wa banhū bakwe, nguno ū bebe ūtashidiimile ī shilagīlo sha ng'wa SEEBA.”

¹⁵Ī likanza lyenīlo ū Sang'weli ūbūūka wīnga ī Giligaali ūja Gibea ya Benjamini, ū Saulo ūbiisaaba a banhū abo walī nabo būbiza magana atandatū.

¹⁶Na lūūlū ū Saulo nū ng'witūnja wakwe ū Yonasani hamò na a banhū abo bakashiigīīla, bakikala Gibea ya Benjamini; a Bafilisiti a bene būtūūla ī ng'hambī yabo Mikimashi.

¹⁷A Bafilisiti būtūma mabità adatū ga banhū ba kūja bakūdimaga shikolo īsho shalekilwe kūlwa kūpeela būlūgū; ibità līmò lyūlola Ofula mapandī ga Shuali.

¹⁸Līngī lyūlola Beeti-holoni, ī lya kadatū lyūjīlīīla kū lūbīmbī lwa kwipandī lyalī lilolile na ntubīlo gwa Zeboimu bbihī na kwitogolo.

¹⁹Ū mu shikū jenījo baalī batīho basuji ba shikolo sha chūma pye a hose ū mu sī ya Baisilaeli, nguno a Bafilisiti baahayaga, “Nose a Bahebulania bakūyūbeeja na shū nūūlū machimu!”

²⁰Na lūūlū pye a Baisilaeli bajaga kū Bafilisiti baakabeegejiwa kwenūko a magembe gabo nī sūlūlū, nī mbasa nī mihoolo.

²¹Ū kūbeegejiwa igembe nūūlū sūlūlū baalīpaga gulamu inaane ja shekeeli, ū kūbeegejiwa lūgoko lwa chūma nī mbasa nū kūnoolelwa ī someke baafunyaga gulamu inè ja shekeeli.

²²Nose ū mu shikū ja būlūgū, a bashilikale abo baalī hamò na Saulo nū Yonasani walī atīho nūūlū ūmò wabo ūyo walī na lūshū mu nkono nūūlū ichimu, ūlū atī Saulo dūhū na ng'witūnja wakwe Yonasani.

²³A Bafilisiti bakatūma ibità līngī lya badīīmi ba shikolo, ī lyene lyūsola nzīla ya kūbītīla kū būkīlīlo wa Mikimashi.