Read Sukuma Bible 2015 – Bibilia Ilagano Lya Kale 2015 1 Sang'weli 19 Bible Online

1 Sang'weli 19 - Sukuma Bible 2015 – Bibilia Ilagano Lya Kale 2015 bible

1 Sang'weli 19

¹Ū Saulo ūng'wīla ū ng'witūnja wakwe ū Yonasani, na a batūmami bakwe, gīkī bamūlage ū Daūdi. Alīyo ū Yonasani īkī walī antogilwe ū Daūdi,

²ūng'hūgūla ūng'wīla, “Ū baba akūkoobaga ng'wanya gwa kūkūbūlaga, na lūūlū ilang'hanage. Ī ntondo ī dilū ūlaaje hanhū ūkibise wikale kwenūko.

³Ū nene nakūfuma nū baba naje nakīmīīle nang'hwe hihī nī lipandī īlo ūkwibisīla, nahooye nang'hwe ī mihayo yako; hanuma nakūkūwīla ūmo alahayīle.”

⁴Ū Yonasani ūhooya ng'hana nū ise ū Saulo, mihayo ya kūnkumīlīja ū Daūdi; ūhaya, “Ū ntemi atizagūng'wītīla mhayo gwabūbi gīko ū ntūmami wakwe ū Daūdi, nguno ataalī kūkūkenya mhayo gose gose. Ī yose īyo akwītaga īkūkwenhelaga solobo nhaale bebe ng'wenekīlī.

⁵Ū lūshikū lwene walībūlagaga ī Līfilisiti walī wifunya gete ū būpanga wakwe; ū SEEBA ūbabeegeja būtindi būtaale no a Baisilaeli, nū bebe ūbona ūyega na kayegele kataale. Ī gīsī lūūlū mhayo kī ūyo gūlīkwenheleja ūng'wītīle būbi būtaale gīko munhū wa mhola gītī Daūdi, ūmūlage nū mhayo ndūhū?”

⁶Ū Saulo ūng'wigwa ū Yonasani, ūng'wilahīlīla alīhaya, “Nalīkwilahīlīla kūlī SEEBA mpanga, gīkī ū Daūdi atūūbūlagwa.”

⁷Hanuma ya henaho ū Yonasani ūng'witana ū Daūdi ūng'wīla pyī īyo bakīhooyela, hūna ūng'wenha nū kū būtongi bo ng'wa Saulo, wandya hangī kūbonekana ū kū būtongi bo ng'wa Saulo gīt'ūmo wītīlaga na kale dūhū.

⁸Kwimanīla wabūūka būlūgū hangī na a Bafilisiti, ū Daūdi ūja kwilwisha nabo, ūbabūlaga bingī no, abo bakasaaga būpeela nhambo.

⁹Lwise lūmò ū Saulo walī igashije mu kaya yakwe n'ichimu lyakwe mu nkono, kwimanīla gwang'wizīīla moyo gwabūbi kūfuma kūlī SEEBA; ū Daūdi wandya kūtūla ndono.

¹⁰Alīyo ū Saulo ūmponegeja ichimu ū Daūdi gīkī anchime līkakūbanīje na ndugu, ūliiliga lyūkalya ndugu ī lichimu; ūpeela ū Daūdi ūjimīīla īkī yalī būjikū.

¹¹Ū Saulo ūtūma banhū ū kū ng'wa Daūdi baje bakalang'hane hoi, balamūlage ī dilū ūlū wela. Alīyo ū Mikali ū nke wakwe ū Daūdi, ūng'hūgūla alīng'wīla, “Ūlū ūtapeelile ū būjikū wenūbū, ī ntondo ūkūbūlagwa.”

¹²Na lūūlū ū Mikali ūnsheepeleja h'idilisha ū Daūdi, ūneka ūja.

¹³Hanuma ū Mikali ng'wenūyo ūtūūla lī shiikolile a ha būlīīlī, ūlīkumba ng'wenda, ūlītūūlīkīja na booya wa mbūli ū kū ntwe.

¹⁴Ū Saulo aho watūma banhū gīkī bakandiime ū Daūdi, ū Mikali ūhaya, “Alīsaata.”

¹⁵A henaho ū Saulo ūbakomeleja a banhū benabo alībawīla, “Jagi mūkamūūkīje ū mu būlīīlī wakwe mung'wenhe aha nize namūlage.”

¹⁶Alīyo a banhū benabo aho baashika ho, būsanga līshiikolile a ha būlīīlī, na booya wa mbūli ū kū ntwe gwalyo.

¹⁷Ū Saulo ūng'wīla ū Mikali, “Bebe nibūlī wanilemba ūntolocha ū ng'wanishi wane ūpīla?” Ū Mikali ūnshokeja alīhaya, “Walī waniwīla, ‘Nilekage naje, nibūlī nose nakūbūlage?’”

¹⁸Ū Daūdi aho wapeela, ūja Lama kūlī Sang'weli, ūūkang'wīla pyī ī mihayo īyo walī wītīlwa na Saulo. Hūna ūja hamò nū Sang'weli būūkalenda Nayoti.

¹⁹Ū Saulo ūtwalīlwa mhola ja gīīkī, “Ū Daūdi alī Nayoti ya Lama.”

²⁰Ūtūma banhū baje ko bakandiime. Alīyo aho baashika ko, būbona'ibbipi lya bahangī bakūhangaga, nū Sang'weli wīmīīlaga hamò nabo akūbatongeelaga. Ū Moyo o ng'wa Mulungu ūbizīīla a banhū ba ng'wa Saulo, nabo bandya kūhanga.

²¹Ū Saulo aho wawīlwa ūtūma banhū bangī, nabo būūkahanga. Ū Saulo ūtūma banhū lūkangala lwa kadatū, alīyo nabo būūkahanga gīko dūhū.

²²Nose ūbona wibūūkīīle wei ng'wenekīlī, wahayūshika kwilambo lya Seku, ūbūūja gīkī, “A ba Sang'weli nū Daūdi ni balī halī?” Būng'wīla, “Balī Nayoti ya Lama.”

²³Na lūūlū wihuuta ajile ī Nayoti ya Lama; alīyo ū Moyo o ng'wa Mulungu ūng'wizīīla nū wei aho alī mu nzīla ajile, wandya kūhanga kūshisha ūshika ko ī Nayoti.

²⁴Nīyo ūūkazuula nī shizwalo shakwe, ūhanga nang'hwe alī ha sīlīlī ya ng'wa Sang'weli. Ū lūshikū lwenūlo ūlocha alambalalile alī dūūhū, nū būjikū ūbūkeeyula alī gīko dūhū; h'īchene a banhū bakibūjaga bakūhayaga, “Ū Saulo nang'hwe alī ūmò wa bahangi?”