Read Sukuma Bible 2015 – Bibilia Ilagano Lya Kale 2015 1 Sang'weli 5 Bible Online

1 Sang'weli 5 - Sukuma Bible 2015 – Bibilia Ilagano Lya Kale 2015 bible

1 Sang'weli 5

¹A Bafilisiti aho baalīdima ī lisandīko lya ng'wa Mulungu, būlyīnja ī Ebenezeeli, būlītwala Ashidodi.

²Hūna ī lisandīko lya ng'wa Mulungu būlītūūla mu hekalu ya ng'wa Dagoni.

³A banhū ba Ashidodi aho baamisha ī dilū, būmonela hasī ū Dagoni, wagwaaga abundaalile ū kū būtongi walyo ī lisandīko lya ng'wa SEEBA! Būmūūcha ū Dagoni, būng'wīmīīlīcha hangī a h'ipandī lyakwe.

⁴Alīyo aho baamisha hangī ī dilū ya lūshikū lwa ntondo yaho, būmonela hasī hangī ū Dagoni, wagwaaga abundaalile ū kū būtongi walyo ī lisandīko lya ng'wa SEEBA, ū ntwe gwakwe gwabbudīkaga, pye na a makono gakwe; shūgwa hasī a ha nyango henaho, gūūlekeelwa dūhū ū mīlī gwakwe.

⁵H'ī nguno yene kūshisha lelo a bagabīji ba ng'wa Dagoni na a banhū a bangī abo bakingīlaga ū mu hekalu ya ng'wa Dagoni ī Ashidodi, batapandaga a ha mbaawa ja ha nyango.

⁶Ū nkono go ng'wa SEEBA gūkabadidohela no a bana Ashidodi na a magūngūli ayo gaalī gīpīndije; ū SEEBA ūbenhela būkenaagūji būtaale no, ūbagwisīja makoye ga mabaale.

⁷Na lūūlū a banhū ba Ashidodi aho babona īlīja gīko ī mihayo, būhaya; “Yaya ū kwikala ng'wenūmu ī lisandīko lya ng'wa Mulungu wa Baisilaeli, nguno ū nkono gwakwe gwatūbuna no a bise benekīlī nū Mulungu wise ū Dagoni.”

⁸Hūna būbitana pye a basugi ba Bafilisiti būbabūūja, “Tūlyīte kinehe ī lisandīko lya ng'wa Mulungu wa Baisilaeli?” Banhū būhaya, “Līsaamījagi Gaasi ī lisandīko lya ng'wa Mulungu wa Baisilaeli.” Ng'hana būlīsaamīja Gaasi ī lisandīko lya ng'wa Mulungu wa Baisilaeli.

⁹Alīyo aho baalīsaamīja koi, ū nkono go ng'wa SEEBA gūūbalemeela nabo a banhū ba mu nzengo gwenūyo; būzwangana na kazwanganīle kangī nako nīyo. Ūbatūla a banhū ba nzengo gwenūyo, bataale na bado būyūgulumūkīlwa mabaale.

¹⁰Būlyīnja nū kwene ī lisandīko lya ng'wa SEEBA būlītwala Ekuloni. A bana Ekuloni būyoganya balīhaya, “Batwenhela kūūnū ī lisandīko lya ng'wa Mulungu wa Baisilaeli, kwiza kūtūmala na a banhū bise!”

¹¹Na lūūlū bikobya pye a basugi ba Bafilisiti; būhaya, “Lyīnjagi ī lisandīko lya ng'wa Mulungu wa Baisilaeli; līlekagi līje ūko līkikalaga, ūlū ītī chene līkūtūmala pye na a banhū bise.” Nguno ī licha līkabazwanja a banhū ba mu nzengo gwenūyo.

¹²Abo bakapūlūgūka ū kūcha būyūgulumūkīlwa mabaale; ū kūlīla kwa banhū ba mu nzengo gwenūyo kūshika ng'wigūlū.