Read Sukuma Bible 2015 – Bibilia Ilagano Lya Kale 2015 1 Sang'weli 6 Bible Online

1 Sang'weli 6 - Sukuma Bible 2015 – Bibilia Ilagano Lya Kale 2015 bible

1 Sang'weli 6

¹Ī lisandīko lya ng'wa SEEBA līkamala myeji mpungatī ū mu sī ya Bafilisiti.

²Hūna a Bafilisiti būbitana pye a bagabīji babo na a bataale ba dini; būbabūūja, “Tūlyītīle mhayo kī ī lisandīko lya ng'wa SEEBA? Toolekejagi ī mbika ya kalītwalīle ūko līkikalaga.”

³Būbawīla, “Ūlū mulītogwa kūlītwala ī lisandīko lya ng'wa Mulungu wa Baisilaeli, yaya ū kūlītwala līlī dalali; shiigelile muntwalīle shakwinha kūlwa kwihīga. A henaho hū mukūpīla, hama hū mukūdeeba nibūlī ū nkono gwakwe gūtaalī ū kūng'wīngīla.”

⁴A Bafilisiti būbūūja, “Ī gīsī tūntwalīle shakwinha kī ī sha koolecha ū kwihīga kwise?” Būbashokeja būhaya, “Mabaale ga zahabu atanò, na ngoso ja zahabu itanò, kūlenganīla nī lisaabu lya basugi ba Bafilisiti, nguno a mahūūya genayo gaalūmukoyaga a bing'we hamò na a basugi bing'we.

⁵Na lūūlū beejagi shiikolile sha mabaale ayo galīmukoya, na a ga ngoso ījo jikwīkenaagūlaga ī sī ying'we.

⁶Ni būlī mulījilambya gīko ī ng'holò jiing'we, gīt'ūmo akīītīla Falao na bana Misili? Alīyo aho wabaluhya, angū, batabalekelile nose dūhū a Baisilaeli būja, bīnga ū mu sī yabo?

⁷Alilūūlū, beejagi igogoteni ipya mulīgaliile chiza, mupandīke na ng'ombe ibīlī jibyalile, ījo jitaalī kūtūngwa ijoki. Ī ng'ombe jenījo mujitungīlīje ī ligogoteni, alīyo a baana baajo mujīngīje mubalugalīle mu kaya.

⁸Hūna mulīsole ī lisandīko lya ng'wa SEEBA mulītūūle a higogoteni, mutūūle na kasandīko kangī a ha mhelo yaalyo; kalī nī shikolo sha zahabu īsho mulīntwalīla kūbiza shakwinha kūlwa kwihīga, hanuma mulīshindīkīle līje līng'wīngīle.

⁹Kwike lolagi chiza ūko lījile, ūlū lyūlongola lījile kū sī yaalyo, ī Beeti-shemshi, a henaho tūkūdeeba gīkī ū SEEBA hū ng'wene ūyo watwenhelile ū būkenaagūji ū bose ūbū. Alīyo ūlū ītī chene, numho tūkūmana gīkī gūtī nkono gwakwe ūyo gwatūtūlile, īkūbiza yatūgwīlile dūhū nayo ī yenīyo.”

¹⁰Hūna lūūlū būgwīta ū mhayo gwenūyo, būsolanhya ng'ombe iblīlī gīt'ūmo bakalangīīlīlwa, būjitungīlīja ī ligogoteni, a baana baajo būbalugalīla mu kaya.

¹¹Ī lisandīko lya ng'wa SEEBA būlītūūla a higogoteni, hamò na a kasandīko ako kaalī na shiikolile sha zahabu, ī sha ngoso nī sha mabaale.

¹²Ī ng'ombe jenījo jūūlongola jijile Beeti-shemeshi; jaja jikūkumbaga, alīyo jitīngile ū ng'wikūūwa, jitagalūkile kūja kū būlyo nūūlū kū lūmoso. A basugi ba Bafilisiti būjilondeela kūshisha kū lūbīmbī lwa Beeti-shemeshi.

¹³A bana Beeti-shemeshi būsangwa bakūgesaga ngano jabo mu malago, bahayūbūūcha a miso būlībona ī lisandīko, bakayega no ū kūlībona.

¹⁴Ī ligogoteni liza kūshisha ng'wilaale lya ng'wa Yoshwa wa mu Beeti-shemeshi ng'wenūmo; aho lyashika bbihī niwe itaale lyīmīīla henaho. A banhū ba kwenūko būlīpandagūla ī ligogoteni kūlwa ng'hwi, ī ng'ombe būjisīnza būjifunya kūlī SEEBA kūbiza shitambò sha kūpemvwa.

¹⁵A bagabīji būliicha ī lisandīko lya ng'wa SEEBA, na a kasandīko ako kaalī nī shiikolile sha zahabu; a masandīko būbīlī wago genayo būgatūūla a hiwe itaale henaho. Ū lūshikū lwenūlo a banhū ba Beeti-shemeshi būmfunīja ū SEEBA shitambò na shitambò sha kūpemvwa.

¹⁶A basugi ba Bafilisiti biiloleela aho īkwītagwa pyī ī yenīyī, hūna būshoka kaya Ekuloni, lūshikū lwenūlo dūhū.

¹⁷Ī shiikolile sha mabaale ga zahabu ayo Bafilisiti bakantwalīla SEEBA kūbiza shakwinha kūlwa kwihīga, shalī gīkī, shiikolile shimò kūlwa Ashidodi, shimò kūlwa Gaza, shimò kūlwa Ashikeloni, shimò kūlwa Gaasi, na shimò kūlwa Ekuloni.

¹⁸Nī lisaabu lya ngoso ja zahabu lyaalī līlenganīlile nī mizengo ya basugi batanò a ba Bafilisiti, kūlenganīla nī mizengo īyo yalī īpīndīlījiwe ndugu na a magūngūli gayo. Ī liwe ī litaale aho bakalītūūla ī lisandīko lya ng'wa SEEBA, nī lelo īyī līlīho kūlwa būkaanīji ū ng'wilaale lya ng'wa Yoshwa wa Beeti-shemeshi.

¹⁹Kwike ū SEEBA akabatūla bagosha bamò na bamò ba Beet-shemeshi, ūbabūlaga banhū makūmi mpungatī, kūlwa nguno ya kūlola ū ng'wisandīko lya ng'wa SEEBA. A banhū būlīla ng'hūngū, nguno ū SEEBA akabatūla katūlīle kataale no.

²⁰Hūna a banhū ba Beeti-shemeshi bibūūja, “Nani ūyo adūgije kūgima kwīma kū būtongi bo ng'wa SEEBA, ū Mulungu ng'wela ng'wenūyū? Gīsī ī lisandīko lyenīlī ūlū līlīnge a henaha, līkūja kū ng'wa nani?”

²¹Būtūma banhū baje Kiliati-yelimu kūbawīla, “A Bafilisiti balyenhaga ī lisandīko lya ng'wa SEEBA, nzūgi mulīsole muje nalyo kū bing'we.”