Read Sukuma Bible 2015 – Bibilia Ilagano Lya Kale 2015 1 Sang'weli 9 Bible Online

1 Sang'weli 9 - Sukuma Bible 2015 – Bibilia Ilagano Lya Kale 2015 bible

1 Sang'weli 9

¹Walīho ngosha nsabi, wa mu lūganda lo Benjamini, lina lyakwe witanagwa Kishi, ng'witūnja o ng'wa Abieli, ng'witūnja o ng'wa Zeloli, ng'witūnja o ng'wa Bekolaati, ng'witūnja o ng'wa Afia, ūmò wa banhū ba lūganda lo ng'wa Benjamini.

²Walī na ng'witūnja witanagwa Saulo, nsūmba wawiza ūyo walī atī na wa kūlenganījiwa nang'hwe ū mu Baisilaeli; hama ngololoku nīhu kūbakīla pye a banhū.

³Na lūūlū ū Kishi ū ise o ng'wa Saulo akajimīīja nzobe jakwe, hūna ūng'wīla ū ng'witūnja wakwe ū Saulo, “Bebe solaga nsūmba ūmò wa batūmami ūje nang'hwe mukajikoobe ī nzobe.”

⁴Ng'hana ūbūūka, ūja akūbīta bītaga kū magūlya ga mu sī ya banhū ba lūganda lwa ng'wa Efulaimu, na mu sī ya Shalisha; alīyo batajipandīkile. Bīnga ū kwenūko būja mu sī ya Shalimu, nū kwene jalī jitīko. Hama ūgalūka kwiza mu sī ya lūganda lwa ng'wa Benjamini, nū ng'wene būjigayiwa.

⁵Aho baashika mu sī ya Sufu, ū Saulo ūng'wīla ū ntūmami ūyo walī hamò nang'hwe, “Tūshokage ī gete, nguno nose ū baba akooya ū kūjiiganika ī nzobe, andye kūkoya ū mu maganiko kūlwa nguno yise.”

⁶Alīyo ū ntūmami ūng'wīla, “Bebe ū mu nzengo gwenūyū akabizaga alīmo munhū o ng'wa Mulungu akūjiwe na banhū, nguno būlī mhayo ūyo ūgūhaya gūkashikīīlaga. Tūjage ho, hamo adūgije kūtoolekeja ī nzīla īyo shiigelile twīsole.”

⁷Ū Saulo ūng'wīla ū ntūmami wakwe, “Ūlū tūlaaje ū kūlī munhū ng'wenūyo, tūkūjūng'winha kī, īkī twamalaga ī shilīwa ū mu mfuko gwise? Tūtī na sha kūng'winha ū munhū o ng'wa Mulungu; ī gīsī tūlī na kī?”

⁸Ū ntūmami ūnshokeja ū Saulo ūng'wīla, “Alilolaga aha, nalī na feza ngehu ja būdito wa kwegeela ha gulamu idatū. Nakūng'winha ū munhū o ng'wa Mulungu atūwīle ī nzīla īyo shiigelile twīsole.”

⁹(Ī kale ū mu Baisilaeli ūlū munhū ūja kūbūūja kūlī Mulungu, wahayaga, “Tūjage kūlī moni,” nguno ū munhū ūyo akwitanagwa ng'hangi ī haha, ī kale witanagwa moni.)

¹⁰Na lūūlū ū Saulo ūng'wīla ū ntūmami wakwe, “Watūngīlīja ī gete tūjage ng'hana wa.” Hūna būgoloola bajile ū kū nzengo ūyo walī ū munhū o ng'wa Mulungu.

¹¹Aho balī ū mu lūgendo bajile, būsanja na bashīke balītulumenha kūja kūdaha minzī; būbabūūja, “Bing'we bamayū, ū moni alīho?”

¹²Būbashokeja būhaya, “Alīho alīko dūhū ūko mujile kwenūko; ihuutagi mukūnsanga ko; nīyo washika lelo īyī dūhū ū mu nzengo gwise. Nguno a banhū balīfunya shitambò ū kwigūlya ū kwipandī lya kūlamīja.

¹³Ūlū mulashike ū mu nzengo mukūmona aho ataalī kūja ū kwipandī lya kwigūlya kūjūūlya shilīwa. A banhū batūdūla ū kwandya ū kūlya aho ataalī ū kūshika, nguno hū wei ū wa kūshilombela ī shitambò. Hanuma abo balaalīkilwe hū bakūlya; linhagi muje ko, a makanza aya hū gene a ga kūnsanga.”

¹⁴Būlinha bajile ū kū nzengo, aho balingīla mo dūhū ī gīkī, ū Sang'weli nang'hwe ūūyū; aliiza kūdimana nabo alīlinha ajile ū kwipandī lya kwigūlya.

¹⁵Alilūūlū, ū lūshikū lwigolo yaho, ū SEEBA walī wang'olekeja ū Sang'weli ū mhayo gwenūyo; ūng'wīla gīkī,

¹⁶“Ī ntondo makanza gītī genaya nakūkūtūmīla munhū wa kūfuma mu sī ya lūganda lwa ng'wa Benjamini; ū ng'wenūyo ng'witīīlage maguta abize ntongeeji wa banhū bane a Baisilaeli. Akūbapīja a banhū bane kūfuma ū mu nkono gwa Bafilisiti; nguno naababonile a banhū bane, nū kūlīla kwabo kwanipandīkile.”

¹⁷Hūna lūūlū ū Sang'weli aho wamona ū Saulo, ū SEEBA ūng'wīla, “Ū ng'wenūyū h'ū munhū ūyo nakakūwīla mhola jakwe; h'ūyo akūbiza ntongeeji wa banhū baane.”

¹⁸Ī likanza lyenīlo ū Saulo ūng'wegeela ū Sang'weli aho baashika ha mita; ūng'wīla, “Baba nalīlomba ūnoolekeje ūko īlī ī numba ya moni!”

¹⁹Ū Sang'weli ūnshokeja, “Ū nene hū nalī ng'wene ū moni, tongelaga tūje ū kwipandī lya kwigūlya, nguno ī lelo ūkūlya hamò naane, ntondo dilū nakūkūwīla pyī īyo īlī mu ng'holò yako, hūna nakūlage ūje.

²⁰Ī ya nzobe ījo jashishaga shikū idatū jijimīīlile, ī yene ītizūkūkoya nguno jilongile. Ī gīsī ng'hana, īyo banhū bingī bayikūmbilwe ū mu Isilaeli ībīkilwe kūlwa nguno ya ng'wa nani, ūlū ītī kūlwa nguno yako na numba ya ng'wa so?”

²¹Ū Saulo ūshosha, “Ū nene natī munhū wa lūganda lwa ng'wa Benjamini ūlo lūlī lūdo ū mu ng'anda jose ja Baisilaeli? Ū lūdūgū ūlo nafumile nalo lūtī lūdo lwa bado ū mu ndūgū ja lūganda lwa ng'wa Benjamini; mhayo kī gwakwenheleja nose ūniwīle mihayo īlī gīko?”

²²Hūna ū Sang'weli ūnshisha ū Saulo nū ntūmami wakwe ū mu numba īyo baalīīlaga shilīwa, ūbatūūla kwigasha h'ipandī lya bakūjiwa kūtinda bose abo baalīmo, banhū gītī makūmi adatū gīko.

²³Hanuma ū Sang'weli ūng'wīla ū nzugi, “Yenhage aha ī nyama īyo nakakūwīla kwībīka ha mhūjo.”

²⁴Ū nzugi ūgwenha ū gūlūmbū, nī shisho shalī hamò nago, ūntengela ū Saulo. Ū Sang'weli ūng'wīla, “Ī yenīyī hū'īyo walī wabīkīlilwe bebe. Lyaga nguno yalī ītūūlilwe kūlwa nguno yako kūlw'ikanza lyenīlī, kūfuma aho nakahayīla gīkī, ‘Nakūbiza na bageni.’” Ū Saulo ūlya shilīwa hamò na Sang'weli ū lūshikū lwenūlo.

²⁵Aho bika ū kūfuma ū kwipandī lya kwigūlya baashika ū mu nzengo, ū Sang'weli ūhooya nū Saulo kwigūlya ya numba yakwe.

²⁶Ntondo yaho ī dilū aho baamisha, ū Sang'weli ūng'witana ū Saulo ū kwigūlya ya numba ūko walī; ūng'wīla, “Bebe igolanyage koi wangū nakūshindīkīle.” Ū Saulo aho wamalamaja, wika būfuma bajile nū Sang'weli.

²⁷Bahayeegeela kūgūkīla ū nzengo, ū Sang'weli ūng'wīla ū Saulo, “Ng'wīlage ū ntūmami wako atonge hado, ū bebe ūshiige hanuma hamò nane nakwinhe mhayo gwa kūfuma kūlī Mulungu!”