Read Sumi Naga BOTHUBO 1 Bible Online

BOTHUBO 1 - Sumi Naga bible

BOTHUBO 1

¹Abothu lono Alhou no atsutsu ngo ayeghi lhoe.

²Ike ayeghiye kughukughalei eno koghekughu kuhae; eno akuzuno kuthokuzu nhape ae. Ipuzu Alhou Ghunguno azu shou vape ae.

³Ikelo Alhou no pi, “akuvu ipeghilu nani,” eno akuvu auve.

⁴Alhou no akuvu aloqhi ithulue eno pano akuzu launo akuvu kijethavetsu.

⁵Alhou no akuvu pesu “Tsukuvu” eno akuzu pesu “Tsukuzu” kuvetsu. Tino atughiu tsala kijiliu eno inaqhe shive.

⁶Tipashelo Alhou no pi, “Azu kijetha kepu shi aliho toikeu lakhi ipeghilu lo, tishianguno azuye a-a kututalo akepushi.”

⁷Ike Alhou no alihotoikeu lakhi shitsue, eno tipau qhou azu akeu ngo tipau shou akeu zu kututa shivetsu eno tishive.

⁸Eno Alhou no alihotoikeu hu pesu Atsutsu kutsu. Tino akiniu tsala kijiliu eno inaqhe shive.

⁹Tishino Alhou no pi, “Atsutsu qholo azu akeqo a-a lakhi lo hekutsuwo kumqoluve pelo, qhaike chhigha ipeghi pelo,” eno tishive.

¹⁰Eno Alhou no qhaike chhigha pesu “Ayeghi” ipi kuvetsu; azu hekutsu sawo kumqokeu pesu “Azughi” ipi kuvetsu; eno Alhou no ti aloqhi ithulue.

¹¹Ipuzu Alhou no pi, “Ayeghi pelo atsuni jeli kumtsu ipeghi pelo, alothi pukeu su tsuni eno axathi pithikeu shilo,” eno tishiluve.

¹²Ike ayeghi shou atsuni itsu ipeghive, eno atsunino pututa shelo athi pithie, pututa shelo alothi xapughi; eno Alhou no ti aloqhi ithulue.

¹³Tino akuthuu tsala kijiliu eno inaqhe shive.

¹⁴Eno Alhou no pi, “Atsutsu liho lo akuluqo ipeghi pelo, tsukuzu ngo tsukuvu kututa shitsu kepu shi. Eno tipaqo pelo atsala, ampe eno atusho huthukeu michi shilu pelo;

¹⁵tipaqono Atsutsu lo yepuvu pelo eno akuvu ayeghi shou tsu pelo,” eno tishiluve.

¹⁶Ikehu Alhou no akulu kije kini mlatsue; tsukinhe no tsukuvu tsala peitha pe aqhi no tsukuzu tsala peitha peke; pano ayepu ghi mlatsue.

¹⁷Eno Alhou no hipaqo pesu atsutsu liholo qhitsu puzu ayeghi shou akuvu tsupe,

¹⁸tsukuzu ngo tsukuvu peitha pe, eno akuvu ngo akuzu kijethave tsue; eno Alhou no ti aloqhi ithulue.

¹⁹Tino abidiu tsala kijiliu eno inaqhe shive.

²⁰Itaghi Alhou no pi, “Azu lo xu akeu lhoxu jeli kutomo chokive iqho iqi pelo, eno aghau pelo ayeghi shou, atsutsu liho lo yeiqho iqi pelo,” eno tishiluve.

²¹Ike azulo lhoxu kijeje, eno akuxu akeu lhoxu ithachekeu pututa jeli eno achishibo kupu ghau jeli kumtsu Alhou no lhoke; Alhou no ti aloqhi ithulue.

²²Tishino Alhou no tipaqo kumghatsu ghi ishi pi, “Athi pithilulo eno kighishelu puzu chhilulo eno aghauqo pelo ayeghilo ikowolulo.”

²³Tino apunguu tsala kijiliu eno inaqhe shive.

²⁴Tipashelo Alhou no pi, “Ayeghi pelo akuxu kua lhoxu tikishi, tughashi eno itikiche lhoxu pututa jeli kumtsu ipeghi pelo,” eno tishiluve.

²⁵Ikehu ayeghilo pututa shelo tughashi jeli, tikishi jeli eno itikiche jeli kumtsu Alhou no lho eno Alhou no ti aloqhi ithulue.

²⁶Tileno Alhou no pi, “Ningu julho eno ningu kimihi shighi timi mlapheni nolo eno panoqo pelo azughilo akhaqo, ayeghilo aghauqo, tikishi ngo tughashiqo eno itikiche lhoxuqo kumtsu shou qhasulupenie.”

²⁷Ikehu Alhou no pa julho lono timi pulhosue, Alhou julho shighi, pano kiptimi totimi pulhosue.

²⁸Alhou no panongu kumghatsu ghi pi, “Athi pithilu kighishe lu eno ayeghi nhakha lulo eno tipaqo mpiu shilulo; azulo akhaqo ayeghilo aghau qo eno iqho iqi ithakiche lhoxuqo kumtsu shou qhasululo.”

²⁹Alhou no pi, “Julo, ayeghi shou ayetsuni lothi akeu eno axathi lothi pithi keu subo kumtsu nongu tsuvae; tipaqoye nongu chuqupu ke.

³⁰Ayeghilo atuthu kishe lhoxu jeli tughashi, aghau eno itikiche lhoxuqo ghenguno atsuni chupenike tsu ani,” eno ti shiluve.

³¹Eno Alhou no pano mlakeu kumtsu shou jupuzu ighono palokiqi shive. Tino akutsughou tsala kijiliu eno inaqhe shive.