Read Sumi Naga BOTHUBO 17 Bible Online

BOTHUBO 17 - Sumi Naga bible

BOTHUBO 17

¹Abram no ampe lhotoku toku shi akelo, AMPEU no pa lau ipeghino pa vilo pi, “Niye Tuchomujokulu Lhoue,[3]

²nikujo dolo iwu puloshoqhi ino tsunike eno kumzapu shi oti kughuko tsunie.”

³Tile Abram ye qhoqhu nhepe pagi pishiqholuve eno Alhou no pa putsa ghi pi,

⁴“Ni ampino i-u puloshoqhi osasu shi anie eno noye ashiayeh kutomo papu shi nani.

⁵Hinguno hilauye oje ghi Abram ipi ku-mae, ikemu ojeye Abraham ipini, kughengu ino opelo ashiayeh kutomo papu shivetsuae.

⁶Ino oti kutomo shi tsuni eno olauno ashiayehqo kughukowo tsuni eno olauno kukami ipeghi penie.

⁷I-u puloshoqhi lakhi nikujo dolo eno opolo kughuko chekemi tiqhelino tiqheli kutolo shini tiye ipelo olhou shipeni eno panoqo Lhou shipeni keu puloshoqhi ke.

⁸Nono itehiye inami shi ghi akeu yeghi hu ino no eno othiu otianuliqo tsunie. Kanan yeghi qha kuchopu pulhapuju sala shi nongu wu shive nani, eno ino panongu Lhou shive nani.”

⁹Alhou no Abraham vilo pi, “Tighenguno no eno oti anuli ghi pano tiqhelilo iwu puloshoqhi pelulo.

¹⁰No eno oti anuli qono ni eno nongu dolo iwu puloshoqhi hipau pulokuqha pelulo: nongu phighu yiko ghalo eno tino ni eno nongu dolo puloshoqhi michipu lakhi shiveniae.

¹¹Nongu gholo kiptimi thaqhuye, okughuko kumono aqu axemi nongu gholo ake lono punukemi shi aghina momu inami launo qhulukeqo shi aghie pinamu tiqheli atsu tsulo, punuwo atsala tache shi akelono aphighu yiko ghavelo.

¹³Ogholo ake lono punukemi na inami launo qhulukeu shi aghi pinamu mutsuqheino aphighu yiko ghave masa nani, tishianguno iwu puloshoqhiye shekhaha ghengu kepi nongu philo amichipu apenike.

¹⁴Eno kiptimi khuuno aphighu yiko ghamoni keno timi tipauye pa no timi launo hathavelo, kughengu pano i-u puloshoqhi hebideve anike.”

¹⁵Alhou no Abraham vilo pi, “Onipu je Sarai ipi kukevilo ikemu li jeye Sara ipilo.

¹⁶Ino li kumghatsu ni,eno li pelo anu lakhi punu otsu peni. Ino li kumghatsuni eno liye ashiayehqo paza shilupe nani eno li tikughuko launo kukami ipeghi nani.”

¹⁷Tile Abraham no pagi pishiqholuve puzu pa mulolo ishi kumsu ghi nuae, “Timi ampe aqhe shive kemi pelo ghi anga shilupe nani kesha? eno Sara ye ampe lhotoku shive keghi mishilu ni kesha?”

¹⁸Pano Alhou vilo pi, “Ismael pelo ozulo xu penima!”

¹⁹Ikemu Alhou no pi, “Kuchouno onipu Sara no anu lakhi punu otsu nani eno paje Isak kutsulo. Ino pa sasu eno pa tikughuko sasu puloshoqhi lakhi qhitsuni, tiye shekhaha puloshoqhi ke.

²⁰Eno Ismael ghenguye ino osutsa chiluvae, ike ino pa kumghatsuni, pa pelo atianuli kutomo ithulupe eno pa tikughuko tsu nani. Paye kijemi chighikini papu shi nani, pa pelo ashiayeh kije shilupe nani.

²¹Ikemu i-u puloshoqhiye Isak lau qhi nani, toku hipa ghulokilo Sara no pa punu nani.”

²²Alhou no Abraham sasu kuptsa tave kethiu pa launo wuve.

²³Tipani no Alhou no pa vilo pike toi Abraham no pa nu Ismael ngo pa qepumi kiptimi pa gholo akemi kumtsu sawo aphighu yiko ghave tsu, pa gholo ake lono punu kemi na pano inami vilo qhulukeu shi aghinamu.

²⁴Abraham ye ampe lhotoku toku shi ake lono pa phighu yiko ghave.

²⁵Panu Ismael ye ampe chighi kuthu shiake lono pa phighu yiko ghave.

²⁶Tipa tsalani no pama kinikujo ayiko ghaveke.

²⁷Pa gholo ake lono punu kemi na inami launo qhulu kemi namu kiptimi kumtsu pa gholono ayiko ghaveke.