Read Sumi Naga BOTHUBO 18 Bible Online

BOTHUBO 18 - Sumi Naga bible

BOTHUBO 18

¹Mamre lo achine subo phivi lono AMPEU no Abraham lau ipeghipiye. Atsala shukuthuyi akelo Abraham no pa phiki khalalo iqa ae,

²ike pano pa gi peqhe ithu juke lauye pa phivilo timi kuthu puthugho aghi. Pano panongu ithulu kemtsa ithu puzu panongu sasu kushonike pa phiki hukikha lono posusu wue eno pano itsaiqi puzu pi,

³“Impeu, tsala ogizulo ino akuzupu shi aghi aye, ino oqhuiniju ani, wuvetsu kevilo.

⁴Azu sughino nongu pukhu qhuvetsu pelo eno asubo kicheqholo akulho qhi aghilo.

⁵Ino achuqupu sughino nongu loponiyilu peni tithiuno nonguno chewu kepushi. Kughengu nonguye hi hechesu wucheni keke niye nongu huthunie. Panonguno khochile,” “Tishiaye, nono pikeu toi tishilo,” ipi.

⁶Ike Abraham no mighimghayi aphikilo wu puzu Sara vilo pi, “Mutazu ashomukhu akiviu jolabo kichhi lakhi lupuzu kunupe asho shilo.”

⁷Tishieno pano atsuaqu gholo powu puzu amshiti atha pubelei keu lakhi kishepesu aqeu lakhi tsu, pano mutazu ti kishekulu kutoe.

⁸Pano akichhizu kiqhi, akichhizu anile eno ashi ngo ishi kuto pewo timi pano kuthu zulo qhitsue. Panonguno chu akelo paye panongu phivilo asubo qholo puthugho ae.

⁹Tile panonguno ishi pa iniju, “Onipu Sara ye khile ani kya?” Pano khochile pi, “Hula aphikilo anie.”

¹⁰Inami huno pi, “Toku hipa ghulo kilo ino olau ideghini putsa eno onipu Sara ye anu lakhi aniae.” Sara no aphiki hukikha lono ti chiluve, kughengu liye tipau phivilo ngoae.

¹¹Abraham ngo Sara pamaye ighono kitemi shive eno Sara ye atianuli punulu kepu mipedo vecheve eno Sara ye totimi no aqhilo aji pochekeu shimovea.

¹²Ikehu Sara no li mulo kutouno nu-ghi pi, “Niye kitemi shive keghi ashi aji zukuvupu alunani kesha? Eno ikimi ghi kitemi shiveamu sha?”

¹³Tile AMPEU no Abraham vilo pi, “Kushiye Sara ye nu-ghi kuchouno niye kitemi shivekethiu ghi anga punulu nani ke shela! ishi pi kya?

¹⁴AMPEU ghenguye kiu kiumu kushokutsu ani kesha? Ado achipi shi akelo toku hipa ghulokilo ino olau ideghi nani eno Sara ye anga lakhi aniae.”

¹⁵Sara ye ighuve kehu miki ghi pi, “Niye nu-moe.” Ikemu pano pi, “Tsaquino noye nuvae.”

¹⁶Timi tipaqono tipa-a lono ithu puzu Sodom lo jupiqi kulupu alo chesusu wu eno ala lono pheveniye Abraham no panongu sasu wu.

¹⁷Ike AMPEU no palikhi pa lolono ishi pi, “Ino kiu shiniye anikeno Abraham launo niye kusuvemlae.

¹⁸Abraham ye ashiayeh kije eno akumto shi nani eno ayeghilo ashiayeh kumtsuno pa kumghatsuke toi kumghatsulo pi nani.

¹⁹Kughengu ino pa ithi ani, ike pano pa nuliqo eno pa lagha ahza tsu keu shilu nani, panonguno AMPEU laghi pelu nani eno amikucho ngo achipiu lono kughatha keu shi nani. Tishianguno AMPEU no pa ghenguno piqhipuakeu Abraham shou pano shikuputsu nani.”

²⁰AMPEU no pi, “Sodom ngo Gomora shou ngukube keu kije anie, panongu xineye shishe ihulokeu shivae.

²¹Mutomushukeu ilau ighi akeu toi ino iqino panonguno tipau mla puani kemo keno ino juni eno tishi kemo keno ino ithi nani.”

²²Timi kini huye tipa-a qhiveno Sodom kudau wuve ikemu AMPEU ye Abraham sasu ngove.

²³Abraham no AMPEU kupunu ighi no iniju, “Noye kuchouno amikuchomi alhoksami gholono pukahveni kesha?

²⁴Tsalatsa aphughi hupaulo amikuchomi lhopungu aghiaye, tipaqo ghengu lonomu aphughi qhi tsumono noye tipau pukahvetsuni kesha?

²⁵Tikithipu shinikeu tiye olauno putosu ape kepue: amikuchomi pesu alhoksami paphi shikeuye olauno putosu apekepue. Ayeghi kumtsu shou kughakuthauye achipiu shimoni kesha?”

²⁶AMPEU no pi, “Sodom phughilo amikuchomi lhopungu aghikeu ino phulu aye, panongu ghengu lono aqha kumtsu qhipuatsunie.”

²⁷Abraham no itaghi pi, “Niye ayeghi mukhu eno ayevu kemu AMPEU sasu kinheqhe kuptsa akeu shi auveana hio!

²⁸Tsala amikuchomi lhobidi pungu likhi aghive aye, mipungu no kupumoke ghengu lono aphughi pukahvetsuni kesha?” AMPEU no khochile pi, “Ino amikuchomi lhobidi pungu phulu aye niye khilemu aphughi pukahvetsu moe.”

²⁹Abraham no itaghi pa putsa kithe ghi pi, “Tsala tile lhobidi phulu ayeo?” Pano pi, “Lhobidi phulu aye panongu ghengu lono ti pukahvetsu moe.”

³⁰Abraham no pi, “Aghaide tsukevilo, AMPEU ino itaghi pinike. Tsala shighi phulu ayeo?” Pano pi, “Ino shighi phulu aye niye ti pukahvetsu moe.”

³¹Abraham no pi, “Ino AMPEU sasu ishi kinheqhe kuptsa auveana hio! Tsala hule muku phulu ayeo?” Pano pi, “Niye ti muku ghengu lono aphughi puhavetsu moe.”

³²Abraham no pi, “O AMPEU agha idetsu kevilo ipelo hilikhi pilu pelo. Tsala michighi phulu ayeo?” Pano pi, “Michighi phulu aye panongu ghengu lono ti pukahvetsu moe.”

³³Pano Abraham putsa tave kemtsa AMPEU ye pa lalo cheve eno Abraham no pa kilo idewove.