Read Sumi Naga BOTHUBO 19 Bible Online

BOTHUBO 19 - Sumi Naga bible

BOTHUBO 19

¹Kungumi kini huno avelau Sodom lo ighi kelo Lot ye aphughi liwolo iqaghi ae. Pano panongu ithulu kemtsa panongu sasu kushoniye puthughove eno pagi pishiqho pe panongu zulo itsaiqi

²no pi: “Akijeu nokujo, niye nokujo huthunike hile anie, idewo ikilo iloghi tsulo eno nokujo pukhu qhulo eno puthoye hila ngovelo. Inaqheno ithuno khilau wucheni kela wukepushi.” Ikemu pamano khochile pi, “Moe, ikujoye putholo alaghilalo ngonie.”

³Ikemu pano tsuikhomo pama iniju auvekehu pamano pakilo wuve. Lot no kholaqhi sumokeu sho shi puzu kuchukusho shipe pama tsue no pamano ti chu.

⁴Panonguno zuwunicheke zulo, Sodommiqono aki suholuve. Aphughi tipaulo kiptimi akeqo kumtsu, apumi muchomi pimono tile ae.

⁵Panonguno Lot ku no pavilo ishi pi, “Itiji ogholo ngoniye ighikemiqo hu khile ani kya? Pama nilau saipeghilo eno ninguno panongu sazunie.”

⁶Lot no panongu lau ipe puzu khalacheuno ahukikha khave

⁷no pi, “Athikuzumiqo, ino nongu qhuiniju ani lhoksakugha shi kevilo!

⁸Julo, inga kini ani, pamaye ililhothe aphike. Ipelo pama nongu lau saipeghi pelo eno nonguno pama kughape nongu gho apulou shilulo, ikemu timi hu pama lau kiumu shitsu kevilo, pamaye iki kicheqholo ighiveake, niye pama shokhalu masae.”

⁹Ikemu panonguno pi, “Hulave chhe.” Panonguno hi ghi ishi pi, “Timi hipauye inami shisu ni gholo ighi puzu kughakuthau shi aniye kuto anino-oe, hulave chhe, moaye hupama nguno oshouno alhoksa alau shiveni cheni no-oe,” ipi puzu ighive.

¹⁰Ikemu timi pama huno a-u chhopipe no aki alou Lot sunhesuluve eno ahukikha khave.

¹¹Eno pamano timi ahukikha philo khalau akeqo kijemi na kitilami namu kumtsu nhethi kighichevetsu kehu panonguye ahukikha phujupuhano auve.

¹²Timi pama huno Lot vilo ishi iniju, “Hipa phughilo obolomi kutami anima? Amakishiu na, anu noqo na anga noqo na eno abolomi kutami khuu khuu aghi namu hipaa lono sasu ipelulo,

¹³kughengu ninguye hipa phughi puhavetsuni chenie. Timi hipaqo ngukube keu shishe AMPEU tovae eno AMPEU no Sodom kutsave penike nikujo puwuke.”

¹⁴Ike Lot no ipe puzu pa makishiu shiniye akeqo vilo pi, “Ithulo eno hipau-a lono polulo, kughengu AMPEU no hipa phughi pukahveni cheni.” Ikemu paye ghavashi ani kughashi panongu no kumsuve.

¹⁵Kughou tsutho ipeghive keno kungumi pamano Lot hakiteghi pi, “Ithulo, onipu ngo onga hile akeu pama sasu ipevelo; tishi maye aphughi hipau puhake lono okuxu ghi puhavetsu nosake.”

¹⁶Lot ye kunachope ake. AMPEU no pa kimiyekeu akehu timi pamano Lot ngo panipu eno panga kini ishi au lono sunhe sasu aphughi kubalau sape puzu panongu phepuwuve.

¹⁷Pamano aphughi kubalau sapeghive no ishi pi, “Pututa kuxu ghenguno polulo! Athiu idewo jukevilo eno aqa lomu ngokevilo, ikemu nongu pithive nosake naghuto lo polulo!”

¹⁸Tile Lot no pama vilo pi, “O Akijeu, nipelo tishi pekevilo.

¹⁹Nokujono shishe ikupu ikimiye keuye ikuxu xalutsu keu huno pephe piyevae. Itehi, niye naghuto loye iqhomlae kutsakungo keuno ihaluve nani eno ino ti tomphi lono thivenosae.

²⁰Aphu kitila hu akeu julo, eno tile powukulupu shi kupunu ani eno tiye aphu kitila ke. Ipelo hule powulu pelo, tiye ighono kitilake eno tishiaye ikuxu xaluni ae.”

²¹Ikelo pa vilo ishi pi, Niye ti pulovetsuae, nono piakeu phu hu niye pukahvetsu mae.

²²Noye mtazu hule polulo. “Nono hule tolu miphi kutolo niye kiumu shimo ake.” Lot no tipa phu aghulo ipike ghenguno tipau je Zoar ipi kutsue.

²³Lot no Zoar tokelo tsukinhe ipeghive.

²⁴Tile AMPEU no Sodom ngo Gomora shou atsutsulo AMPEU launo alkatra kipti ngo ami ishi ghuqhi pukue.

²⁵Pano aphughi, abokhuqa, aphughiqolo kughunakuami eno ayeghilo lhoipeghi aghikeu kumtsu kutsavetsue.

²⁶Ikemu Lot nipuye pa thiu chekelo ighowo athiu juve ke lono liye amti tsukucho lakhi shive.

²⁷Abraham ye inaqhe no ithu puzu khile pano AMPEU zulo puthughoa keno tipa-a lo wue.

²⁸Pano Sodom ngo Gomora kudau aluzaqha lo jupuwu kelauye, tipaqha lono alu quakelo toi amchhi phobolei ipeghi aghikeu ithulue.

²⁹Abokhuqa lo aphughi akeqo kutsa akelo Alhou no Abraham kumsuchilelue. Eno Lot no achekeu phughi puhavetsu akelo pano Lot xaphelue.

³⁰Lot ye Zoar lo ngonike musave kehu pa nga pama sasu naghutolo iqhove eno panongu atukilo ache.

³¹Ike anga anoghiuno ayitiu vilo ishi pi, “Nikujo papuh ye muchomi shiwochea eno ayeghilo timi lakhimu ningu lau ighi puzu timi kuxu ayehlo shichekeu toi shiluni chemova.

³²Ighilo, nikujo papuh aji shokumzuni nolo, eno nikujo no pa sasu zunie, tishianguno nikujo papuh piti kughuko tsunie.”

³³Tipaji pamano aji pa shokumzuve eno anga anoghiuno papuh sasu ashiaji kuqha, ikemu Lot ye shomzu pesu akelono kehu lino kughono zu eno kughono ithuve kela mthae.

³⁴Thoghiu shikelo anga anoghiuno ayitiu vilo pi, “Ijino ino ipuh sasu ashiaji kuqha, ike nikujo itiji ghi aji pa shokumzuni nolo eno nono pa sasu ashiaji kuqhalo, tishianguno nikujo papuh piti kughuko puatsu kepushinie.”

³⁵Pamano tipaji ghi pama papuh aji shokumzu eno ayitiuno li papuh sasu ashiaji kuqhae. Ikemu paye shomzu pesu ake lono kehu lino kughono zu eno kughono ithuvekela mthae.

³⁶Tishikeu lono Lot nga kini kujo pama papuh no kimshive.

³⁷Ike anga anoghiuno anu lakhi punue eno paje Muab kutsue. Tipauno ishi thoghilo Muabmi ipichekeqo pasuf ke.

³⁸Anga ayitiu ghi anu lakhi punue eno paje Benam kutsue. Tipauno ishi thoghilo Amunmi ipi chekeqo passu ke.