Read Sumi Naga BOTHUBO 20 Bible Online

BOTHUBO 20 - Sumi Naga bible

BOTHUBO 20

¹Abraham no hule-hile ngo susu Negeb lo iqesu wu no Kades ngo Shur kuma dolo acheke, eno Gerar lo inami shi izuche.

²Abraham no pa nipu Sara pesu “Liye ichepu ke,” ipiche, ike lo Gerar lo akukau Abimilek no timi puwu puzu Sara sawuvetsue.

³Ikemu putholo Abimilek samouno Alhou no ighieno pa vilo pi, “Julo, noye thini akene, totimi nono saghi keu hu timi nipu ke.”

⁴Abimilek ye li kupunu wumphi ikehu pano pi, “AMPEU, noye muzuchoi akemiqo[4] ghi pithiveni kesha?

⁵Abraham no pikeuno liye pa chepue pike eno li ghi Abraham ye li peue pike. Imlolo kiumu kupuna kupugha keu kuha eno niye kiumu mthano li saghivae.”

⁶Alhou no asamouno pa vilo pi, “Iye, noye omlo kiumu kupuna kupugha keu kuhano li saghi kepi ino ithi anie, kughengu opelo ishou axine shipemoni aye nighi osuchileluve anike tighenguno ino opelo li bupe moveke.

⁷Mtazu totimi hu li kimi lau tsuchilevelo kughengu timi huye tungkupmi lakhie pano oghenguno inikhutsu aye noye thimo nani. Nono li tsuchileve monapi aye no eno ogholo akemi kumtsu thini putsa kepi ithilo.”

⁸Tighenguno Abimilek no inaqhe itheno ithu puzu pa qemi kumtsu ku kutsuno panongu vilo hipaqo kumtsu pike lauye panonguye shishe msave.

⁹Abimilek no Abraham ku saghi no ishi iniju, “Noye ni shou hiye kiu shivetsu ani kya? Niye oshou kiu kipimi shive keno noye aghimepu kije ilau eno ikukaqhalo saghi ani kya? Noye shimokepu kumlapu ishou shivae.”

¹⁰Abimilek no Abraham vilo highi pi, “Noye kiu ithulu keno hitoi shive kya?”

¹¹Abraham no ishi khocile, “Hipa-a loye Alhou sumsachekemi khumu kuha eno inipu luveni aye iheqhi pithive nani kepi ino kumsuveke.

¹²Kuchouno pini aye, liye ichepuke, liye ipuno ngake, ikemu iza nga kumoe, ike ino li sasu akibo shike.

¹³Ike kughou Alhou no ipu kilono ipelo inami yeghilo itsu itsuwuvepe keno ino li vilo ishi pie, ‘Nono iqhoqhu keu ipiyeni aye hino kene: khilekhile wu namu niye opeu kepi nono pimayesa kene.’ ”

¹⁴Tile Abimilek no Sara sachile sawo Abraham tsuve eno tipa gholono bheri, amshi, aqepumi eno aqelimi ishi pesu Abraham tsue.

¹⁵Abimilek no pi, “Hi ithuluake qha kumtsu iyeghike, nono khile pulo keno tile kughuna lo.”

¹⁶Pano Sara vilo ishi pi, “Ino opeu ghuka 1000 tsuve ake, tishianguno nowu timiqo zulo noye kujomzakepu kuhae ipi ithive peniye ke eno noghi pimi puamopi kumtsupelono ithive peniyeke.”

¹⁷Abraham nipu Sara ghenguno Alhou no Abimilek kibo lo totimi akeqo kumtsu pelo mishi mla kepu shivetsuke. Ike Abraham no Alhou vilo inikhutsu kelono Alhou no Abimilek ngo pa nipu ngo pa qelimiqo shipivitsu eno panonguye atianuli punu luwuve.