Read Sumi Naga BOTHUBO 21 Bible Online

BOTHUBO 21 - Sumi Naga bible

BOTHUBO 21

¹AMPEU no puzu-uno pi puakeu toi pano Sara kumghatsue.

²Alhou no Abraham lau kihithatsu keu do lono kitemi shiveke thiumu Sara no mishilu puzu anu lakhi punutsue.

³Sara no anu punu keu je pesu Abraham no Isak kutsue.

⁴Alhou no ahza tsuke toi kughou Isak no atsala tache shi akeno Abraham no pa phighu yiko ghave tsue.

⁵Isak punu kelo Abraham punu mpeye 100 shiae.

⁶Sara no pi, “Alhou no ipelo nu kuzupu shive tsuae eno hi chilukemi kumtsuno igholo nusu niae.”

⁷Tishino lino pi, “Khuno Abraham vilo Sara ye atianuli akichhi pini nicheniepi piniche kya? Ikeghi pano muchomi shive kethiuno anu lakhi ino punu pe pa tsu anie.”

⁸Isak no thuwuve eno pa khoke tsalani Abraham no aghulhu kije lakhi shie.

⁹Ghulo lakhi, Ijipmi Hagar no Abraham lau anu lakhi punu tsukeu Ismael huno Sara nu Isak sasu junu ghi ili ae.

¹⁰Sara no ti ithuluve puzu Abraham vilo pi, “Aqeliu hipau ngo panu pama hapheve lo. Aqeliu nu hipau pelo khilemu inu Isak sasu amheghi ighi pemla nani.”

¹¹Ike Abraham zulo tiye ighono amlo kughujupu shive kughengu Ismael ghi panu kehu.

¹²Ikemu Alhou no Abraham vilo pi, “Anu ngo aqeliu pama ghenguno omlo sakevilo. Sara no kiu ovilo pive akeno li tsa inivelo kughengu Isak vechewono opiti kepi kihi wonie.

¹³Aqeliu nu ghi ino ashiayeh lakhi shilu pe nani kughengu pa ghi onu ke.”

¹⁴Abraham no thoghiu inaqhe itheno ithu puzu asho ngo azu ahughi lakhi ishi pesu Hagar tsue eno pano panu khape li muqalo xapipe puzu li puwuve. Lino chesusu Bersheba lo asutsuni kughutsu kumo qhalo itsuche.

¹⁵Kughou ahughilo azu kuhave keno liye asutsuni bo lakhi qholo anu qhive;

¹⁶eno li no alu ache lakhi-a kupuju tohilo wupuzu li likhi iqa ae. Lino ishi pi, “Anu kithi ju amlae!” Lino tilau iqa ake lauye, anu no qa ithuve.

¹⁷Alhou no anu no qa akeu chiluve eno atsutsu lono Alhou wu kungumi no Hagar ku puzu li vilo pi, “Noye kiu shilusa ani kya? Msa kevilo. Alhou no anu no khileno qa anikeno chiluvae.

¹⁸Ithu puzu anu khape lulo eno pa lopiqi tsulo. Ino pa pelo ashiayeh kije shilu penanie.”

¹⁹Tileno Alhou no li nhethi xukhotsue eno lino azukikhe lakhi ithulue lino wupuzu ahughilo azu pililuve eno azu anu piyelue.

²⁰Alhou no anu gholo ae, eno paye thuwuve. Paran lo agha itsumokeu qhalo ache, paye asuzu pekeulo shitsa shive.

²¹Pa zano Ijip yeghi lono anipu lakhi lusaghitsue.

²²Ike tipa ghulokilo Abimilek no pawu ghushimi shou akijeu Phikol sasu ighi eno Abraham vilo pi, “Nono kiu kiu shikeno ti kumtsulo Alhou no osasu chenie.

²³Tishi aye noye ni na, inuli na, itikughuko namu pishimo naniepi Alhou zulono tushoqhilo. Ino olau kikimiye kumla mla kehu toi noghi ni eno nono inami shi akeu yeghi shou kimiyekeu mla tsulo.”

²⁴Ike Abraham nopi, “Ino tushoqhi anie.”

²⁵Abraham no Abimilek vilo muchhoe kughengu pa qemiqo no anguka lono akuchhu zukikhe luvetsu ke.

²⁶Abimilek no pi, “Khuno ti shi kela niye mtha na, noghi ivilo mu pimo eno ti khilemu chimla aphie, ishino thono.”

²⁷Tile Abraham no bheri hami eno amshi hami hapesu Abimilek tsue eno pama visho lakhi shie.

²⁸Abraham no patsu-aqu loji lono bheriti tsuni hatha pesu qhie.

²⁹Abimilek no pa iniju, “Noye kushiniye bheriti tsuni kutashi hatha pesu qhi ani kya?”

³⁰Abraham no pi, “Noye bheriti hipano tsuni ilauno lutsumasae tishianguno azukikhe hipauye ino chhu kepi hipaqono ishepe shipenie.”

³¹Ikehu tipa-a pesu Bersheba ipi kutsue, kughengu tileno pama kinikujo ashoqhi shie.

³²Pama no Bersheba lo visho lakhi shive eno Abimilek ngo ghushimi shou akijeu Phikol ngo ishiye Filistiyami yeghilo idewove.

³³Abraham no Bersheba lo tamarik subo shosue eno AMPEU, shekhaha Lhou je ku-ghi mllae.

³⁴Abraham ye Filistiayami yeghilo ado kushuwa inami shi ache.