Read Sumi Naga BOTHUBO 22 Bible Online

BOTHUBO 22 - Sumi Naga bible

BOTHUBO 22

¹Tishive kethiu Alhou no Abraham peju ghi pa vilo pi, “Abraham.” Ike Abraham no ishi khochile, “Iye, ni hi anie.”

²Alhou no pi, “Nono kimiyeqhiyi chekeu onu Isak, ti likhi akeu sasu Moria ghakhu lo wulo eno naghuto khipau okichetsuni keno tileno pa pesu kuchopu pitikeugho shi ghi akumllagho chhelo.”

³Abraham no inaqhe itheno ithu puzu gadaha tsughada kudayive eno aqemi kini pa nu Isak ngo ishi pa gholo sawuni ke kuto. Eno kuchopu pitikeu gho ghengu lono asu ghepu puzu Alhou no pavilo wulo pikeu a-lo wue.

⁴Akuthuni Abraham no pishipuwoju kelo pipuakeu-a hu putouno ithulue.

⁵Abraham no aqemi pama vilo pi, “Nokujoye gadaha sasu hile ngo aghilo. Anu ikujono hula wuno Alhou mlla puzu nokujo lau ideghini ke.”

⁶Abraham no kuchopu pitikeu gho ghenguno asu puchekeu ikhipe pa nu Isak xapipe eno pano pau lono ami ngo azuta ishi pe puzu pama kumtsa wuve.

⁷Ike Isak no papuh vilo pi, “Ipuo!” Abraham no khochile pi, “Iye, inu?” Isak no iniju, “Le ami ngo asu ishi pecheni ikemu kuchopu pitikeu gho ghenguno bheritiye khile ani kya?”

⁸Tile Abraham no pi, “Anu, Alhou no kuchopu pitikeu gho ghenguno bheriti lakhi kutotsu nanie.” Ike pama kumtsa chesu wue.

⁹Alhou no kichetsu puakeu-alo pama no wo-tolu kelo, Abraham no tile akumllagho kipti-a lakhi mlae eno tipa shou asu kithikiyi qhie. Pano pa nu Isak aphi au phevetsu eno akumllagho kiptia lo asu shou beve.

¹⁰Abraham no pa nu ghiqhiniye pau chhopuwo azuta ikhilue.

¹¹Ikemu atsutsu lono AMPEU kungumi lakhino ishi pa ku: “Abraham!” Pano ishi khochile, “Iye, ni hi anie.”

¹²Kungumi huno pi, “Onu pithi kevilo momu pa shou kiumu shikevilo, kughengu noye Alhou gholu cheni kepi ino ithivae; Noye anu lakhi likhi akeu ghi pesu itsuveni keu suchilemoe.”

¹³Abraham no tsughuwo jukelauye, pa thikhau bheritsu lakhi asuminipho lo akibono kunakufu pesu aghike ithulue. Pano wu puzu bheritsu hu sawo pa nu zuqhulo kuchopu pitikeu-gho lakhi akumllagho mllae.

¹⁴Abraham no tipa-a pesu “AMPEU no Kutotsue”[5] ipi kuvetsue; eno ishi kutolo hi picheni: “AMPEU wu naghuto lono hi kutotsue.”

¹⁵AMPEU wu kungumi no atsutsu lono ghuthu akiniu ghi Abraham ku puzu ishi pi,

¹⁶AMPEU no pikeu no, “Ino ilikhi ije lono tushoqhi anie, onu lakhi likhi akeu ghi suchilemo puzu no hitoi shikeu ghenguno

¹⁷ino shishe okumghatsuni eno oti kughukoqo shishe kighishe tsunie. Panongu ye atsutsulo ayepu je-jehi eno azughi mukulo asaye je-jehi shi nani. Oti kughukoqono aghumi liwo khasulu nani:

¹⁸Ayeghiqhalo ashiayeh kumtsuno ino oti kughuko kumghavetsu ke toi kumghatsulo pi nani eno tiye nono igholu keu ghenguno ke!”

¹⁹Abraham no pa qemi pama lau idewo eno panongu kumtsa Bersheba lo wove no paye tilau kughuna ache.

²⁰Ado ta wovekethiu, Abraham no pa thikuzuu Nahor nipu Milka no anuli punue pi chilu:

²¹Anoghiu no Uz eno Buz no pa thikuzuu, pa shelo Kemuel paye Aram papuke

²²eno Khesed, Hazo, Pildas, Yildafu, Bethuel, ishi.

²³Bethuel ye Rebeka papuh ke. Abraham thikuzuu Nahor nipu Milka no anu hipano tache punue.

²⁴Eno Nahor nipu kishe Reuma ghi Theba, Gaham, Thahas ngo Maaka ishi punu.