Read Sumi Naga BOTHUBO 23 Bible Online

BOTHUBO 23 - Sumi Naga bible

BOTHUBO 23

¹Sara ye ampe 127 xupuzu thive.

²Liye Kanan yeghilo Hebron lono thive. Abraham no li kumsuno mloqa ae.

³Kumsuno pano li kumo tishi puaghino wupuzu Hatimi putsaghi pi:

⁴“Niye inami eno kupokichemi shi nongu gholo acheni. Inipu kumo qhonike ghenguno ayeghi a-a lakhi ivilo jesu tsulo.”

⁵Panonguno Abraham khochile ghi ishi pi,

⁶“Hi inijutsulo, akijeu noye ningu gholo akughushu kukami lakhi ke ningu kumoki chhupuakeu akiviulo onipu kumo qholulo. Ningu gholo akumoki aghikeuye khuu nomu otsumokeu shimo nani eno opelo onipu kumo qholupe nanike.”

⁷Tile Abraham no puthughove eno panongu zulo itsaiqi

⁸no pi, “Nonguno ipelo inipu kumo qholu peni shi aghiaye, hi initsulo. Zohar nu Efron wu

⁹Makpela lo atuki akeu ivilo jesutsu penike inijutsulo, tiye pa lu phelo anike. Nongu nhekithe lono ipelo akumokilive-a shilupenike kiu me shiaghini keno ivilo jesutsulo pilo.”

¹⁰Efron ye Hatimiqo gholo ngo aghi, eno tile Hatimiqo aphu liwolo kumqo kuhoake zulono pano ishi Abraham vilo pi,

¹¹“Akijeu, kumukumoke, alu hu ino otsunie eno tile atuki akeu ghi otsunie. Onipu kumo qholu penike, ni timi hipaqo zulono ino otsu anie.”

¹²Ikemu Abraham no timiqo zulo itsaqipiye

¹³eno kutami kumtsuno chilukepushi ghi Efron vilo pi, “Nono kuchouno ti tsuniepi aye, hi inijutsulo! Ino alu ghenguno ame otsuni ke ti lutsulo eno ino inipu kumo qhonie.”

¹⁴Tile Efron no pi,

¹⁵“Akijeu, ayeghi tipauye ghuka 400 meke, ikemu nikujo dolo tino kiu piania? Tile onipu kumo qholulo.”

¹⁶Efron no ame pikeulo Abraham ghi pulove. Hatimiqo zulono ame pikeu toi Abraham no ghuka 400 kihi pesu Efron tsuve. Hiye alhikishimi no akimighi pepimhe chekeu kiqi lono kihipe tsue.

¹⁷Hitoi shi keu lono Mamre phu kipela kudau Makpela lo Efron yeghi akeu tile alu, atuki, alulo asubo akeqo eno tipa sukumxalo akeqo kumtsu Abraham wu shiluve.

¹⁸Hatimi khijehi aliwolo kumqo akeno tile ighikemiqo zulono hipaqo kumtsu Abraham wu shive.

¹⁹Tipathiu Abraham no pa nipu Sara kumo Makpela tukilo qhove, tiye Mamre phu kipelau, Kanan yeghilo Hebron loke.

²⁰Ikehu Hatimi launo alu ngo atuki qhulukeu pesu akumo kilivea shinike Abraham no pa mheghi shiluve.