Read Sumi Naga BOTHUBO 26 Bible Online

BOTHUBO 26 - Sumi Naga bible

BOTHUBO 26

¹Puzuu Abraham ghulokilo puqumiye ighikeu toi itaghi puqumiye keu tipa ghakhulo ighie. Ike Isak no Gerar lo Filistiyami kukau Abimilek lau wue.

²AMPEU no Isak lau ipeghino pi, “Ijip yeghilo iqi kevino ino ovilo pipuakeu yeghilo ngolo.

³Hipau ghakhulo ngolo, ino osasu ani eno okumghatsunie. Kughengu ino otikughuko lau hipa ghakhu kumtsu tsuni eno ino opu Abraham lau piqhi puakeu shoqhi ino shikuputsunie.

⁴Opiti pelo atsutsu lo ayepu qo toi kighishe wolu peni, eno hipa ghakhu kumtsu otikughukoqo tsunie. Ayeghilo ashiayeh kumtsuno ino otikughuko kumghavetsu ketoi panongu kumghatsulo pinani.

⁵Hi kumtsu Abraham no igholu, ino shilopi keu shi, bethatsu keu pape eno ahza tsukeu peluke ghengunoke.”

⁶Ikehu Isak ye Gerar lo ache.

⁷Tipa-alo kuamino pa nipu vehu iniju kelo pano ishi pi, “Liye ichepue,” kughengu pano “Liye inipue” ipini keu msave, tile kuamino pa ghiqhiveno Rebeka luve nosa kehu, kughengu liye ighono juvike.

⁸Isak no tilau ado kushuwa ngove kethiu, ghulo lakhi Abimilek, Filistiyami kukau huno alashe lono jupipe kelauye Isak no panipu Rebeka sasu allokile aghikeu ithulue.

⁹Abimilek no Isak kupuwu puzu pi, “Kuchouno liye onipu keghi noye kishi puzu liye ochepue pi kya?” Isak no khochile pi, “Ino kumsukeuno liye inipu ke ipi aye li ghenguno ipithive nosakehue!”

¹⁰Abimilek no pi, “Noye ni pelo hiye kiu shive peniye ani kya? Ningu gholo khualano mulalei onipu shiputhave aghiaye ni shou angsu ikughini cheke.”

¹¹Abimilek no timiqo vilo hipau zah tsue, “Khuuno timi hipau momu pa nipu shou aubeni keno, timi tipauye pithiveni putsae.”

¹²Isak no tipau yeghilo apiti qusu keu mpelo ghuthu aqhe kighishe shi alau ithulu eno AMPEU no pa kumghatsue.

¹³Paye kinikulu shikithe wuve eno ighono kinimi shiluve.

¹⁴Kughengu pano bheri, amshi eno aqemi kutomo pighiche kehu Filistiyamino paju anheshuwuve.

¹⁵Ikehu, papuh Abraham kuxu lono azukikheqo chhukeu hu Filistiyami no tipaqo lakhavetsuno ayeghi pesu jonhave tsue.

¹⁶Tile Abimilek no Isak vilo pi, “Ni qhiveno chevelo, kughengu noye ningu nguno shishe akumtou shiauvae.”

¹⁷Ike Isak no tipa-a lono wuve eno Gerar bokhuqalo pa phiki shisuno tile acheuve.

¹⁸Abraham kuxu lono azukikhe chhukeu pano thivekethiu Filistiyami no lakhavetsu keqo hu Isak no itaghi chhukithe. Eno papuh no tipaqo je kiu kutsu keno paghi tipaqo je ti kutsue.

¹⁹Isak qemiqono abokhuqalo azukikhe lakhi chhue eno tiye azupuki akeu zukikhe shiaghie.

²⁰Ikemu Gerar lo amshi khemino Isak qemi sasu muto eno azuye panowu kepi pie. Ikehu Isak no tipa zukikhe je pesu Esek[7] kutsue, kughengu panonguno tile pa sasu muto kehu.

²¹Isak qemino azukikhe kutau lakhi chhue eno tipau loghi mutoe, ikehu pano tipau je pesu Sitna[8] kutsue.

²²Tipa-a lono kutau pano iqesusu wuve eno azukikhe kutau lakhi chhue. Tipau ghenguye panonguno mutomoe, ikehu pano tipau je pesu Rehobot[9] kutsue. Isak no pi, “Itehiye AMPEU no ningupelo ililayi luve ape eno ninguye ayeghilo kinikulu shiluniae.”

²³Isak no tipa-a lono Bersheba lo iqhoe.

²⁴Tipaji AMPEU no pa lau ipeghi no pavilo pi, “Niye opu Abraham Lhou. Ino ogholo ani ke musa kevilo. Iqeu Abraham ghenguno, ino okumghatsuni eno oti kughuko tsunie.”

²⁵Isak no tile akumllagho kipti-a lakhi shie eno AMPEU je kughi mllae. Tile pa phiki shipe qhie eno tileghi pa qemino azukikhe lakhi chhue.

²⁶Abimilek no Gerar lono pa kusau Ahuzat ngo pawu ghushimi shou atou Phikol ishi sasu Isak lau ighie.

²⁷Ikelo Isak no panong vilo pi, “Nonguno imthi puzu nongu gholono ipelo wuvepeke kushiniye ilau ighi ania?”

²⁸Panonguno pi, “Ninguno mtsuqhei ithulu keuno AMPEU ye ogholo anie, eno ningu no kumsulu keuno no eno ningu dolo ashoqhi lakhi qhimayesae. Ningu pelo osasu puloshoqhi lakhi shipelo,

²⁹ike nino obumo ke hutoi noye nishou alhoksa shipemonie. Ninguno olau akivi likhi shi eno opelo aloino wupe kehu itehiye AMPEU no okumgha vetsuae.”

³⁰Isak no panongu ghenguno aghulhu kuto tsue eno panonguno chuqu kusho shie.

³¹Panonguno inaqhe itheno ithu puzu lakhino lakhi vilo tushoqhikile. Isak no panongu vilo ilenowolo pive eno panonguno aloinoghi pa launo idewove.

³²Tipani aqemino ighino Isak vilo panongu no azukikhe chhukeu vehu pie. Panonguno pi, “Ninguye azu chhupheluvae.”

³³Pano azukikhe je Sheba kutsue. Tighenguno ishi kutolo tipa phu je Bersheba[10] ipi cheni.

³⁴Esao no ampe lhobidi shi akelo pa nipu shipeniye Hatimi Beeri no nga Yudit ngo Hatimi Elon no nga Bashemat ishi lue.

³⁵Tino Isak ngo Rebeka pama mlo shikighimeve.