Read Sumi Naga BOTHUBO 37 Bible Online

BOTHUBO 37 - Sumi Naga bible

BOTHUBO 37

¹Jakob ye papu no inami shi achekeu Kanan yeghilo xu ache.

²Hipaqono Jakob ti kughukoqo. Josef ye ampe chighi tsuni shiuve kehu pamunoqo papu nipu Bilha ngo Zilpa nuliqo sasu bheriloji khe ache. Pamunoqono alhoksa kumla shikeu pano pewo panongu papu vilo piche.

³Ike Israil no panuliqo kutami kumtsu nguno alau Josef kimiyekeu ae kughengu pano kitemi shive kethiuno punu keu nu kehu. Pano Josef ghenguno aphikuzu ayeh shisu eno chijebobo keu lakhi shitsu.

⁴Kughou papuhno kutami kumtsu nguno alau Josef kimiyekeu pamunoqono ithuluve keno panonguno Josef mithiuve eno agholauno pa putsakeu kuhave.

⁵Ghuthu lakhi Josef no asamo lakhi pumo eno pano pamunoqo vilo lhe kelauye panonguno alaushi pa mithi kitheuve.

⁶Pano panongu vilo pi, “Ino pumokeu samo hipau iniju tsulo.

⁷Ninguye alulo aghi ghoqhi puakeu piqhekumqo aghicheke, ikelauye ino piqhepuakeuno ithuve eno muzuchoi puthughove eno nongu ghi kipiqheqono tipau vehope puthugho eno itsaiqi ighi kipiqhe zulo qhoqhu aghi che ke.”

⁸Pamunoqono pa vilo ishi iniju, “Noye kuchouno ni shou akukau shinani pi ani kesha? Noye nishou ayeh peni pi ani kesha?” Ikehu pano pa samo lhekeu ghenguno panonguno alau shi pa mithi kitheuve.

⁹Josef no itaghi asamo kutau lakhi pumoe eno pano pamunoqo vilo tipau lheghi pi, “Itaghi niye asamo lakhi pumoe ike tsukinhe, aqhi eno ayepu chighi qhaqhi ishino itsaiqi qhoqhu itsucheke.”

¹⁰Papu vilo ngo pamunoqo vilo hi lhe, ike papu no palomi pi, “Noye kiu samo pumo cheni kya? Kuchouno oza ngo ni ngo omunoqoye ozulo itsaiqi oqhoqhu nanipi ani kesha?”

¹¹Pamunoqono paju anheshuve ikemu papu ye pano piqhikeu kumsukutoju ache.

¹²Josef pamunoqoye panongu papuh wu bheri loji sasu achukumzaniye Shekem lo wuve.

¹³Ike Israil no Josef vilo pi, “Omunoqoye Shekem lo bheri loji sasu achukumza anike hilaghilo, ino opelo panongu lau wupenike.” Josef no khochile, “Alo, tishini thono,” ipi.

¹⁴Papuno pavilo pi, “Wu puzu omunoqoye akivishi anikemokela julo eno bherilojiye akivishi anikemokela julo, tishino ideghi puzu ivilo pilo.” Ikehu papuno Hebron bokhuqa lono pa phepuwuve. Kughou Josef no Shekem to keno,

¹⁵pano aluzalo itsuchekelo timi lakhino pa sasu kusho eno timi huno pavilo ishi iniju, “Noye kiu phucheni kya?”

¹⁶Pano khochile pi, “Niye imunoqo phuchenike, panonguye khile bheri loji sasu achu kumza ani kela ivilo pitsunima?”

¹⁷Timi huno pi, “Panonguye cheveake, kughengu panonguno Dothan lo wuniepi akeu ino chiluake.” Ike Josef no pamunoqo phususu wue eno Dothan lono panongu phulue.

¹⁸Josef no putou chephi lono panonguno pa ithuluve eno pano panongu kupunu ighi mphi lono panonguno kuchughu puzu pa heqhivenikeu shi kughave.

¹⁹Panongu lakhino lakhi vilo ishi pi, “Julo, hi asamo kupumou hu chenie.

²⁰Ishino kutovetsunie, ighilo ningu pa heqhiveno aqoh kuchhu lakhilo pakumo vesuvenie eno tughashi lhoksano pa tsuve kena ipi ninguno pivenie, eno pa samo hu kiu shiluniala ninguno junie.”

²¹Ruben no ti chilu puzu panongu ulono Josef hakholuveniye shie eno pi, “Ninguye pa kuxu lutsu kepu kumoe.”

²²Ruben no panongu vilo pi, “Pa ghiqhi kevilo, ikemu aghasalo aqoh chhupuakeu hipaulo pa vesuvelo eno pa ghuza kevilo.” Tishianguno pano panongu ulono pa xaphe pesu papu lau pa sachile sawoniye hipau kupughu shike.

²³Kughou Josef no pamunoqo lau ighi keno panonguno pa phikuzu ayeh shisu eno chijeboboi keu pano uchekeu xaluve

²⁴eno pa kughape aqoh lakhilo vesuve. Aqoh huye kumsa eno tile azu kuhae.

²⁵Tishieno panonguno achuqupu chuniye iqae eno panonguno pishipuwo jukelauye Gilead kudauno Ismaelmi aqo lakhi cheghi. Panongu wu kemel ye musughuta ngo axokutsungu mukhu xapusu Ijip lo iqicheghike.

²⁶Juda no pa thikuzumi vilo pi, “Ninguno ningu thikuzuu ghiqhive puzu pa ghiqhi keu kusuvekeuno kiu ala shiluni cheni kya?

²⁷Ningu pa kughape hi Ismaelmi vilo jesuvenie, eno ningu u pashou bemonie kughengu paye ningu thikuzuu eno ni shi ni jike.” Pa thikuzumiqono pagholo pulokuqhaluve.

²⁸Ike Midiami alhikishimino ti vecheighi kelo panonguno aqoh lono Josef sunhephe eno Ismaelmi vilo pa kughapesu tsandiyi muku meshighi jesuve, eno tipaqono Ijip lo Josef sasu wuve.

²⁹Kughou Ruben no aqoh lo ideghiju keno Josef ye tile aghimove kehu pamlo ghime launo pa phimini suxue.

³⁰Pano pa thikuzumiqo lau ideghi puzu pi, “Appu kuhavea puzu niye kiu shivelopi kya?”

³¹Tile panonguno aneti lakhi heqhi eno Josef phikuzu ayeh shisuno chijeboboi keu hu tipau jilo putsu.

³²Panonguno ayeh shisu eno chijeboboi keu phikuzu kichepesu panongu papu lau peighi no pi, “Ninguno hi ithuluke, hiye onu phikuzu kemo keno michi julo.”

³³Pano ti michiluve eno pi, “Iye, hiye inu phikuzuke; tughashi lhoksano pa tsuvea kena! Josef ye mtsuqheino yithapini veakena!”

³⁴Jakob no pa mlo ghime launo pa phimini suxu piniyive eno aphi tsubuyi keu pesu papo hekuxapu, eno ado kushuwa panu Josef ghenguno mlo-qa ache.

³⁵Panuliqo kiptimi eno totimi kumtsuno pa lokughuno tsuniye ighi ikemu pano miliveno pi, “Ino kithila lono pa sasu kushomo ke kuto niye inu ghenguno mloqa anie.” Tishi papu no Josef ghenguno mloqa.

³⁶Tishi akelo Ijip loye Midiamino Josef kughapesu Potifar vilojesuve. Potifar ye Farao wu kijemi lakhi eno kukaki ghukhemiqo shou keptein lakhie.