Read Sumi Naga BOTHUBO 4 Bible Online

BOTHUBO 4 - Sumi Naga bible

BOTHUBO 4

¹Tithiu Adam no panipu Eva sasu ashi aji kuqhae eno lino mishilu puzu Kain punu, eno pi, “AMPEU kukuphu lono ino anu lakhi lhoqhi luvae.”

²Tipathiu itaghi pa thikuzuu Abel punue. Ike Abel ye bherikhemi ikemu Kain ye alukichimi.

³Tipa tikhau akumllagho lakhi AMPEU tsunike Kain no pawu tuxatini peighi.

⁴Abel ghi pawu bheri piti tughiu atha kupu peighi. AMPEU no Abel eno pa kumllagho shou amlo kiqishive,

⁵ikemu Kain eno pa kumllaghoye ikhilutsumove. Kain ye ighono amlo shimove eno pagi pishiqholuve.

⁶Tile AMPEU no Kain vilo pi, “Noye kushiye amlo shimo ogi pishiqhope ani kya?

⁷Nono akivi mula puaghi aye no ikhilu moni kesha? Eno nono akivi shipuaghimo napi aye, axine no ahukikha ijepe anie. Tino oshou kaluve nishi anie, ikemu noye ti theqhiluve masae.”

⁸Tithiu Kain no pa thikuzuu Abel putsa ghi pi, “Nikujo iliwunie.” Ike pama kumtsa aluzalo chekelo Kain no pa thikuzuu Abel tukulu puzu pa heqhi pithive.

⁹AMPEU no Kain iniju, “Othikuzuu Abel ye khile ani kya?” Pano khochile pi, “Niye mathae, niye ithikuzuu kheu kesha?”

¹⁰Tile AMPEU no pi, “Noye kushiye hikithipu shi kya? Ayeghi lono othikuzuu jino amkhu lutsu lepi ighamuku keu sutsano itovae.

¹¹Ayeghino othikuzuu ji ou lono musholuve ketoi ayeghi tipauno oghusho pe qhivae.

¹²Nono ayeghilo axa yisu namu tino ipeghi pemo nani, eno noye ayeghi shou kupokichemi shiniae.”

¹³Kain no AMPEU vilo pi, “Ighimepu hiye ino puqhelu kepu nguno alaue!

¹⁴Nono ishino ayeghi hipau lono ihapupove ani eno ozu lono ino itshu iqho iqiniae eno niye ayeghilo kupokichemi shiniae eno khuno nithuluni keno ighiqhiniae.”

¹⁵Ikemu AMPEU no pa vilo pi, “Tishimlae, khuuno Kain ghiqhini keno, pa shou ghuthu tsuni amkhu lunani.” Khuu khumu Kain sholu kelo pa ghiqhi pemonike AMPEU no pa shou amchi lakhi bevetsue.

¹⁶Eno Kain no AMPEU zulono wuve eno Eden kipelau Nod ipikeu chhighalo acheuve.

¹⁷Kain no panipu sasu ashi aji kuqhae, eno lino mishilu puzu anu Enok punue. Eno pano aphughi lakhi shie eno tipau pesu Enok kutsue, panu Enok jesho shighi.

¹⁸Enok nu Irad, Irad nu Mexual, Mexual nu Methusala, Methusala nu Lamek.

¹⁹Lamek no anipu kini lue, lakhi jeno Ada eno lakhiu jeno Zila.

²⁰Ike Ada no Jabel punue, paye atsuaqu pighimi eno aphikilo kuamiqo puasu shive.

²¹Pathikuzuu jeno Jubal, pano akighi lebo eno lilala lebo kughughami puasu shive.

²²Eno Zila ghi Tubal Kain punue, ayi ngo tamayi pesu koghekughu shikemi puasu shive. Tubal Kain chepuye Naama.

²³Ike Lamek no pa nipu pama vilo pi: “Ada ngo Zila, itsa inilo; nongu Lamek nipuqo, itsapi chilulo, ino apumi lakhi ghiqhivae, pano ighuza kehu,

²⁴Kain mukhu ghuthu tsuni lunapi aye Lamek mukhuye ghuthu lhotsuni tsuni lu nani.”

²⁵Adam no pa nipu sasu ashi-aji kuqhae, eno lino anu lakhi punue, eno pa je Set kutsue, lino pi: “Kain no pithive keu Abel zuqhulo Alhou no apiti lakhi itsu anie.”

²⁶Set ghi anu lakhi ithulu ke pa je Enos kutsue. Hipa ghuloki lono timi no AMPEU jeku ghi pa mlla keu huthue.