Read Sumi Naga BOTHUBO 44 Bible Online

BOTHUBO 44 - Sumi Naga bible

BOTHUBO 44

¹Josef no pakilo aqemi shou ampiu shichekeu vilo hitoi ahza tsu, “Timi hupaqono pukulu thaqhu panongu pulukholo athi lesu tsulo, eno pututa wu pisa pututa pulukho kutsuqolo suvetsulo.

²Eno anipau pulukho kutsuqolo iwu tsandiyi jukhu pesu pisa athi me tsu keu gholo suvetsulo.” Josef no pa vilo pikeu tsa kiqi lono titoi shivetsue.

³Inaqhe vuipeghi kemtsa panonguye gadahaqo sasu kumtsa wovepe.

⁴Panonguno aphughi qhiveno kushuwa wumphi lono Josef no aqemi shou ampiu shiakeu vilo pi, “Mutazu timi hupaqo pape wulo, nono panongu halukelo ishi panongu vilo pilo, ‘Kushiye nongu lau akivi shikeulo alhoksa lochile cheni kya?

⁵Kushiye nonguye impeu wu tsandiyi jukhu pukaluve kya? Impeu no ajukhu hipau lono sho cheni eno pano hipau pesu asaqhi cheni. Hitoi shikeuye nonguye ighono akumou shivae.’ ”

⁶Kughou aqeu huno panongu halukeno tipa tsa pesu panongu vilo pie.

⁷Panonguno pa khochile pi, “Akijeu, kishipuzu hikithiputsa pi ani kya? Khilemu tishimo thono khuno hikithipu shini kya?

⁸Nono ithuluano, pisa ni pulukho kichilo aghikeu ghi Kanan yeghi lono olau suchile sughie, ike kishi puzu ompeuno kilono ninguye shuna tsandi pukalu ni kya?

⁹Akijeu, ningu khuu gholo ti pucheghi keu phuluni keno timi tipau pithivepeni eno ningu ghi oqemi shiwuvenie.”

¹⁰Tile pano pi, “Tishi aye nongu tsaluvetsuni ikemu khuu kholono ti pucheghi keu lheluni keno paye iqemi shiveniae, ikemu kutamiye kumokumo ke woluve nani.”

¹¹Ikehu panonguno papashi panongu wu apulukho ayeghilo peqhino pututa pulukho kuqho.

¹²Josef qeu no akichiu kholono ayitiu kho kutolo tsaquyi lhekide kudaju, ike ajukhu huye Benjamin pulukholo aghie.

¹³Panonguno amloghime launo aphimini suxu no panongu wu gadahaqo akho xapipe puzu aphughilo ide ighi.

¹⁴Kughou Juda ngo pa thikuzumiqono Josef kilo ighi keno paye tikutolo tilehi aghi. Panonguno pazulo gihu ghi itsaiqi,

¹⁵ike Josef no pi, “Nonguye kiuno hikithipu shi cheni kya? Niye asaqhi pheluve naniepi nonguye mtha kesha?”

¹⁶Juda no khochile pi, “Akijeu, ninguye ovilo kiu piluni kya? Ninguye kiu laluni kya? Ninguye kiumu shipuamoe pi kishi piluni kya? Alhou no ni oqemiqo kipimi phuluvae. Akijeu, khuno ajukhu pucheghi kela palikhi kumono ningu kumtsuno oqemi shivae.”

¹⁷Josef no pi, “Tishi pemla thono niye kishi puzu tishinike. Khuuno ajukhu pucheghi keno pa likhino iqemi shipe nani. Nongu kutamiqoye ithupuzu alokiqi shi nongu papu lau wolo.”

¹⁸Juda no Josef kupunu ighi no pi, “Akijeu, kimiyeno ipelo atsa lakhi ovilo pilu pelo. Akijeuno ishou aloghu ide tsukevilo, kughengu noye Farao toi kijeke.

¹⁹Akijeu, nono oqemiqo vilo ishi inijue, ‘Nonguye apu eno athikuzuu anima?’

²⁰Ninguno akijeu khochile keuno, ‘Ninguye apu aphie, paye muchomi ke eno pano muchomi shive kethiuno anu shikeu ningu thikuzuu ayithiu lakhi anie. Ni thikuzuu ayitiu pamuye thivae eno paza poloye pa likhino akuxu anie; eno papu no pa kimiye chenie,’ ipi pie.

²¹Akijeuno ningu oqemiqo vilo pikeuno ‘Hilau pa sasu iqighilo ino paye kiu toi kela junie.’

²²Akijeu ninguno ovilo. ‘Apuf ye papu phevemlae, kughengu pano tishi aye, papuh ye thiniae,’ ipi okhochile.

²³Tile akijeu no pikeuno, ‘Nongu thikuzuu anipau nongu gholo ighimoke thaqhuloye nonguye isasu kusholupemlae,’ ipie.”

²⁴“Kughou ninguno oqeu ipu lau iqhoghi keno ninguno akijeu nono pikeu tsa pavilo pike.

²⁵Tithiu pano ishi pike, ‘Wu puzu ningu sala achuqupu kitila qhusu ighilo.’

²⁶Tile ninguno ishi pa khochile, ‘Tsala ni thikuzuu anipau nigholo puwu aye ninguye iqinie, tikumoaye ninguye iqimlae; kughengu ningu thikuzuu anipau nigholo cheghimo aye ningu pelo timi hupau sasu kusholupeni chemoe.’

²⁷Ikelo ningu papu no ishi ningu vilo pie, ‘Nonguno ithi anike inipuno anu kini punuqhi tsue.

²⁸Lakhiye puhavae. Ino kumsujukelo tughashino pa sutha piniyive keniae, kughengu tinguno tilauye pa ithumlavekeke.

²⁹Tsala nonguno hipau ghi ilauno sawu puzu pashou kiuala akumou shiveno thive aye ino ateasu shive kethiu ghi akumolo iloke kutolo imlo ghimeshi ilo peni chenie.’

³⁰“Ike akijeu, ningu papu kuxuye appu shou bepe acheni pulaghino tsala pa sasu ningu gholo ighimono ipu lawu wo aye,

³¹appu ningu gholo cheghi mokeu ithulu kelo paye thiniae. Eno ningu oqemiqo no nipuno ateasu shive kethiu ghi akumolo iloke kutolo amlo ghime shipeni cheni.

³²Tinguno alauno akijeu, appu ghenguno ipu vilo ni oqeu kuxuno pa zuqhu shinikeu shipuanie. Tsala ino pa lau apuf sachile saghi moaye ikuxu kupuju ipu ngusu punikeu shi puanie.

³³Tighenguno akijeu, ino oqhuiniju anike, ni oqeu pelo appu zuqhu shi oqemi shipelo eno apuf pelo pamu noqo gholono idewove pelo.

³⁴Appu igholo kuha napi aye niye kishi ipu lawu idewomoe. Ipuno amlo kughuju shi imenikeulo niye jupuku amlae.”