Read Sumi Naga BOTHUBO 47 Bible Online

BOTHUBO 47 - Sumi Naga bible

BOTHUBO 47

¹Ikehu Josef no Farao lau wuno pi, “Ipu ngo imunoqoye pano tsu-aqu loji sasu eno pano no pighi chekeu kumtsu sasu Kanan lono ighi anie. Panonguye Goshen ghakhulo ani.”

²Pano pamunoqo gholono mipungu sasu ighino Farao sasu kushope.

³Farao no pamunoqo vilo iniju, “Nonguye kiu mla chekemi kya?” Panonguno khochile ishi pi, “Akijeu, ningu oqemi qoye nipuasuqo toi atsu-aqu pighimiqoe.”

⁴Tinguno alau ghi panonguno Farao vilo ishi pi, “Kanan yeghilo puqumiye keu ihulo ani kehu ni mishi ngo bheri ghenguno asutsuni itsu keu kuhaye hipa yeghilo inami shisusu ighi ani. Tighenguno akijeuno oqemiqo pelo Goshen ghakhulo kughunalu penima?”

⁵Ike Farao no Josef putsano pi, “Opu ngo omunoqoye olau ighivae, Ijip yeghiye nono ithi ani,

⁶ike aghakhu akiviulo panongu pelo kughuna pelo. Panongu pelo Goshen ghakhu lo kughuna pelo, panongu gholo shitsami nono ithi aghi aye tipaqo pelo atsu aqu peithape kepushi qhilo.”

⁷Tishieno Josef no papu Jakob sasu ighieno Farao sasu kushope, Jakob no Farao shou kumghatsue.

⁸Farao no pavilo ishi iniju, “Opunu mipe khije shive akya?”

⁹Jakob no khochile pi, “Ikuxulo inami shi iqhoiqi keu hi ampe 130 shivae. Ampe aghulo likhi aphie, ikemu shilusakeu pachie, ipuzu ipuasu noqo kuxu mipe qhemi kumoe.”

¹⁰Jakob no Farao kumghavetsu no wuve.

¹¹Ikehu Farao no ahza tsukeu toi Josef no papu ngo pamunoqo pelo kughunape eno Ijip yeghilo aghakhu akiviu lo Ramos bocho lo amheghipu shi kuto tsu.

¹²Josef no papu ngo pa thikuzu zukighimi eno papu no kibolomi kumtsu ayitiu kutolo kihisuno achuqupu kophetsu ae.

¹³Puqumiye keu ihulo kehu ayeghiqha kumtsulo achuqupu kuhave, eno Ijip lo ngo Kanan lo akemiqoye akhuamzu lono inayive.

¹⁴Ijipmi ngo Kananmi yeghilo pisa aghikeu lono Josef no athi qhupesu hekutsu suluveno pisa hu Farao kini khukilo sughi.

¹⁵Kughou Ijip ngo Kanan yeghilo pisa kumtsu kuhave keno Ijipmi kumtsuno Josef lau ighieno pi, “Achuqupu nitsulo, tikumoaye ninguye ozulono thiniae. Niwu pisa kumtsu puwo khavae.”

¹⁶Josef no panongu vilo pi, “Nongu wu pisa kumtsu puwokhave aye, nongu tsu-aqu saghilo, tipau zuqhu ino achuqupu nongu tsunike.”

¹⁷Ike panonguno atsu-aqu Josef lau saghi eno panonguno khurshi, bheri, ane, amshi, gadaha ishi saghikeu akili shi ghi pano achuqupu panongu tsu. Panongu tsu-aqu kumtsu kili keu zuqhulo pano tipa mipe kutolo achuqupu kothape tsuae.

¹⁸Tipa mipe ashekha shive kelo, itaghi panonguno ighieno pavilo pi, “Akijeu launo kiumu kusuve mlae. Niwu pisa akuchopu puwo khavae eno niwu atsu-aquye owu shivae. Niphi ampi eno ni yeghi likhi thono kutau akijeu tsukepu kiumu kuhavae.

¹⁹Ike kushiepi ningu eno niyeghiye ozu lono thive apeni kya? Ningu eno niyeghi ngo ishi achuqupu kili shi ghi ni qhuluvelo. Ninguye Farao qemi shiveni niyeghiye pawu shivepenie. Eno ni puxu no thipemo kepushi athi piti ni tsulo eno ayeghi puhave pemo kepushi.”

²⁰Ijip lo ayeghi kumtsu Farao wu shi ghi Josef no qhuluve. Puqumiye keu ihulo kehu Ijipmi lakhi khino pututa kialu kumtsu pesu Farao ulo jesuve. Ijip yeghilo timiqoye aku lakhi lono agha

²¹cheku kutolo Farao no kugha pesu aqemi shivepe.

²²Pano achinemiqo yeghi likhi qhulumoe, kughengu Farao no achinemi sala kophe tsuche kehu eno panonguye Farao no kophe tsuchekeu chuche kehu panongu yeghi jemoe.

²³Tile Josef no timiqo vilo pi, “Julo, ishino ino nongu eno nongu yeghi Farao wu shi ghi qhuluvae. Athi piti hi anie, nonguno hipau alulo yisulo.

²⁴Ghile hukelo nonguye saje pungulo lakhi Farao tsumasae. Saje pungulo bidino alulo apiti shikepushi no kibolo akeqo eno nonuliqo chuqupu ishi ghengu lono qhilo.”

²⁵Timiqono khochile pi, “Nono ni kuxu xalutsue, ninguye olopu eno Farao qemi shinie.”

²⁶Josef no hipau vehu pesu Ijip yeghilo ayezah shipe qhie. Tipau yezah ishi kutolo pepimhe aphie, ike tiye ghile hukelo saje pungulo lakhiye Farao wu shinikeu shie. Achinemiqo yeghi likhino Farao wu shimoe.

²⁷Israilmi no Ijip Goshen ghakhulo kughunauve, panonguye kinikulu shive eno ati anuli kutomo ikowove.

²⁸Jakob ye Ijip lo ampe chighi tsuni xue, ike pa kuxu kupuju kelo ampe 147 xue.

²⁹Kughou Israil no thivekepu do kupunuve keno pano Josef kupuzu pavilo pi, “Ino ogizulo olopu shilu aghi aye o-u ipukudolo beno ashoqhi shilo, noye igihu eno ilau kuchou shinikeu pilo eno Ijip lo ikumo qhokevilo,

³⁰ikemu niye ipuasu gholo qhopenishi ani ke noye Ijip lono ikumo xapuwulo eno panongu kumo gholo iqholo.” Josef no khochile pi, “Nono pikeu toi ino shinie.”

³¹Israil no pi, “Noye tushoqhivelo.” Pano pa vilo tushoqhive, eno Israil no pa zualo ihozuve.