Read Sumi Naga BOTHUBO 49 Bible Online

BOTHUBO 49 - Sumi Naga bible

BOTHUBO 49

¹Jakob no panuliqo kupuwuno pi, “Nongu kumtsa kumqolo, nongu ye hithi azuu kiu shive nani kela ino nongu vilo pitsunie:

²‘Nongu kumtsa kumqono inilo, Jakob no nuliqo; Nongu papu Israil tsa inilo.

³“Ruben, inu anoghiu, noye ikumto ke, Ihe agho lo nu atughiu ke, aqhekuza eno akaghalo ihulomolo keue.

⁴Azukuqo kighide toi, noye akhotou shimo nani, kughengu nono opu nipu sasu zue. Nono izualo ikuno ti shikuchhube vetsue.

⁵‘Simon ngo Levi pamaye athiazu ke; kutsakungoni keu zutangu panongu bocholo anie.

⁶Niye panonguno kuchughu akeulo sumoe; niye panongu kukuholo chhosumoe, kughengu panonguno axu ide kelo timi ghiqhie, eno panonguno zuphuzugha shi aniepi amshi tsu wu apukah love tsue.

⁷Ghukusho panongu xu kighide shou eno panongu loghu shou alo, kughengu tiye ghasu mlae eno shishe mghaloke. Jakob yeghi lo ino panongu kijethapinive ni, Israil gholo ino panongu halepuponie.

⁸“Juda, noye othikuzumino osheqheni keu ke, Nono oghumiqo akuo lono tsukiqhi nanie, Opu nuliqono ozulo khoqhunhe pe ogihu nani.

⁹Juda ye abongushu lhothe lakhie, nono tshupe qhieno ide iqhoghiveke, inu abongushu toi nono aghu chhowuno ihozue, eno khuno pa haputhuluni kya?

¹⁰Akukau kusu ye Juda phemoe, eno pa pukhuno tsape ke; Tipau mipeu shikuzuu ighieno timi kumtsu shou ayeh pemoke kuto pa kuka pe anani.

¹¹Pano gadaha ti attsu atsayibolo tshue, pawu gadaha ti al-li atsayibolo tshupukue; Pano ajilo eno atsayizu kuhu lono pa phimini ishie.

¹²Aji shokeu lono pa nhethi hughuyie, akichhizu sho keu lono pa hu metsughoyie.

¹³‘Zebulun ye azu philo kughuna nani; Pa phivilo ashuka kutsuwo ngokeua shi nani; Pa lughiye Zidon kuto shinani.

¹⁴“Isakhar ye gadaha kumto lakhie, Pa pulukho kuma dolo paye xachhope zue.

¹⁵Ti akulhoqhi keu alokena, eno ayeghiye azukuvupu shi pano ithulue; Pano akho xapuniye panaghu itsaiqie, eno akagho shi mla peni keu qeu shive.

¹⁶‘Dan no pawu timiqo xathatsu nani, Panonguye Israilmi kutami toive nani.

¹⁷Dan ye alaphelo apighi aghike toi nani, alalo tughu pukeu pighino khurshi phitsu mighi tsukelo, pa shou kicheu athiu kilheqhive kehu toi nani.

¹⁸“Nono xaphelupeni ke niye okhe anie, O AMPEU.

¹⁹‘Gad ye abi ale kuxumino xupuwuve nani, ikemu pano panongu mujo eno hawu nani.

²⁰“Asher yeghi lono kinikulu chuqupu ipeghi nani; Kukami chuqupu pano tsu nani.

²¹‘Naftali ye ashe kumthu lakhie, tino asheti jukivi pitie.

²²“Josef ye agha gadaha lakhie, azupuki philo agha gadaha lakhie, ato vekudalo agha gadahaqoe.[14]

²³Ashihami no aghuza kitikhi shi pa pipe, panongu suzu ngo apiji pesu pa puzuqhie.

²⁴Ikemu panongu suzuye pighechhe piniyive tsue, panongu u shipa sulavetsue, tiye Jakob wu Akughushu Lhou kuka no ke, tiye Akheu, Israil Tuqu huno ke,

²⁵tiye opu Lhou no okuphu kehu ke, tiye Akughushu Lhou no okumghatsue. Kunguuno tsutsughu wu kukumgha, ayeghi qhouno azu kutho wu kukumgha, akichhi ngo atita wu kukumgha,

²⁶alothi eno akupu wu kukumgha, kha-ghino achekeu naghuto wu kukumgha, alhokuthu achekeu tolo azukuvupuqo, hi kumtsu Josef kutsu shou ikughi peniu, khuu pa thikuzumiqo launo kututa shivekeu kishe shou ikughi peniu!

²⁷“Benjamin ye mihemuzakeu tine ke, Pano tsuqhi keu inaqheno chu, eno pano yiqhilukeu kijiliu kutolo kijetha aphie.”

²⁸Hipaqono Israil shiayeh chighi kini ke eno hiye panongu papuh no panongu vilo pikeu ke. Milakhi khi shou kukumgha lakhi khi pututa kuzupu shi ghi pano panongu kumghatsue.

²⁹Jakob no panongu vilo ahza tsu ghi pi, “Niye ni timi kithimi gholo wuniae, ike Kanan yeghilo Mamre phu kipelau Makpela a-lo Hatimi Efron lulo akeu tukilo ipu noqo gholo ikumo qhotsulo. Abraham no atuki hipau ngo alu kuma Hatimi Efron launo akumokilive shiniye qhuluke.

³¹Panonguno tilehi Abraham ngo panipu Sara kumo qhoe eno tilehi Isak ngo pa nipu Rebeka kumo qhoe, eno tilehi ino Lea kumo qhoe.

³²Alulo akeu atuki supuzu Hatimiqo launo qhulue. Tilehi ikumo qholo.”

³³Jakob no pa nuliqo vilo ahza tsuakeu tave kethiu, azualo daluve no thive eno pano timi kithimi lhogha lo wove.