Read Sumi Naga BOTHUBO 50 Bible Online

BOTHUBO 50 - Sumi Naga bible

BOTHUBO 50

¹Josef no papu gi dapesu ngoe, eno qa-ghi papu mumae.

²Pa gholo akumla kishimi shikipivimi vilo papu kumo tsu-mamo kepushi nupe qhinikeu ahza tsue. Shikipivimi no tishi shitsue,

³eno atsala lhobidi kutolo luve, kughengu tsumamono nupe qhinikelo atsala tijehi luvecheke. Ijipmi no pa ghenguno atsala lhotsuni mlo-qae.

⁴Papu ghenguno mlo qakeu tsala kupuve kethiu Josef no Farao no sholokumi vilo pi, “Ino nongu zulo azukuvupu shilu cheghi aye hipau sutsa pewo Farao to tsulo.

⁵Ipu no thiniye akelo ipelo tushoqhipe puakeuno, Kanan yeghilo pa likhi pa kumoki chhupe puakeu lo niye pa kumo qhotsuni keu shi pipuanie. Ikehu ipelo wuno ipu kumo qhowu pelo eno niye ideghive nani ke.”

⁶Farao no khochile tsu, “Opu no opelo tushoqhipe puakeu toi wulo eno opu kumo shiqholo.”

⁷Ike Josef no papu kumo qhoniye iqhoe. Farao no sholokumi muchomiqo, Ijip lo muchomiqo kumtsu

⁸eno Josef nobolomi kumtsu eno pa thikuzumiqo eno papu nobolomiqo kumtsu pa gholo iqho. Panongu ti-anuli muchumunu ngo panongu wu bheri ngo ane eno amshiqo likhi Goshen qhalo qhipuaghive.

⁹Pa gholo khur kulu lono timi xapu eno khurshi shou iku ishino iqhoe; eno tiye aqo kumzapu lakhi.

¹⁰Panonguno Jordan kipelau Atad lo aniqa tolue, eno tile panonguno shisheno ado kushuwa mlo qae. Josef no atsala tsuni papu ghenguno mloqa.

¹¹Kughou tipa yeghilo Kananmi kughuna akemino Atad lo mlo qa akeu ithulu keno panonguno ishi pie, “Ijipmi ghenguno hiye shishe mlo-qa keue.” Tighenguno tipau-a pesu Abel Mizraim kutsue. Hiye Jordan kipelau anie.

¹²Jakob no panuliqo vilo ahza tsupuakeu kiqi lono panongu no ti shikupu tsue,

¹³panonguno pa kumo xapu Kanan lo wue eno Mamre phu kipelau Makpela lo atuki akeu lulo pa kumo qhotsu, tiye Abraham no Hatimi Efron launo akumo kilive shiniye alu sukuqha ghi qhuke.

¹⁴Josef no papu kumo shiqhove kethiu, pamunoqo eno pagholo papu kumo shiqhoni ke iqhokemiqo kumtsu sasu Ijip lo ideqighive.

¹⁵Panongu papu thive kethiu Josef pamunoqono ishi pi, “Ishi ake, Josef ye ni mithi niaphi keniae, eno ninguno pa shou kixikila shikeu ningu lochileniye kughu aghinosae!”

¹⁶Ike panonguno Josef lau aghiniu lakhi puwuno pi, “Opuno thinike zulo hipatsa nitsu puanie;

¹⁷Josef vilo ishi pilo, ‘Ino oqhuiniju anie, omunoqo kipimi eno panongu xine olau shipuku keu qhivetsulo.’ Ike opu Lhou no qemiqo hi ninguno kiu kipimi shipuani keno qhivetsunima!” Panonguno pavilo hitoi pikeulo Josef no qa thuve.

¹⁸Tile pamunoqo ampino ighi no pazulo itsaiqi agigihu pa tsu. Panonguno pi, “Ninguye ozulo oqemi ake.”

¹⁹Ikemu Josef no panongu vilo pi, “Musaichi kevilo; niye Alhou toi shive mlae.

²⁰Nonguye ishou kusakughapu shinike kuchughue ikemu Alhou no ikivipulo tukidesuve, tishikeu lono timi hi ishi kutomo xuaghi keqo kuxu puxu tsuniyeke.

²¹Ike msaichi kevilo. Ino nongu eno nongu ti-anuli tuchomujotsu nanie.” Hitoi pano kupukini tsa pesu panongu mlo shikumto tsukeu huno panongu mlo lokughuno-tsue.

²²Josef no papu no bolomiqo sasu Ijip lo ache eno paye ampe 110 xue.

²³Josef ye Efraim tianuli, tiqheli akuthuu kutolo ithulue. Manase nu Makhir no anuli shike lo Josef no loji puthue.

²⁴Josef no pamunoqo vilo pi, “Niye thini cheae, ikemu Alhou no mutsuqheyi nongu heju ighi nani eno nongu sasu hipa yeghi lono Abraham ngo Isak eno Jakob vilo tushoqhipe puakeu yeghilo saghi nanie.”

²⁵Tile Josef no Israil nuliqo pelo hishi ashoqhi shipe. “Alhou no nongu heju ighikelo, nonguye isukumo ghi hipa-a lono pewuniepi tushoqhilo.”

²⁶Ike Josef ye ampe 110 xuno thive. Panonguno tsu-mamo kepu shi pa kumo nupe qhie eno Ijip lo akumo bohu lo supe qhie.