Read Sumi Naga BOTHUBO 6 Bible Online

BOTHUBO 6 - Sumi Naga bible

BOTHUBO 6

¹Tipau ghulokilo ayeghi shou timino ikosu wove eno totimi kutomo punu qhiwuve.

²Alhou nu noqono totimi hipaqo ithulu eno juvi aghi kelauye, panonguno lunishikeu kishe sawo anipu shie.

³Tileno AMPEU no pi, “Inguaghaye timi lolo pulhapuju apemo nani, kughengu paye puhave kepu lhoxuke. Hinguno hilau panonguye ampe 120 nguno alau xupemoe.”

⁴Tipau ghulokilo ghi tipathiu ghi ayeghi shou timi kuloghiqo acheke, panonguye Alhou nunoqono timiqo nga sasu zuke lono punuke nuliqoke, kha-ghilo panonguye aghutomi eno aje kipimi ke.

⁵Timiqo lhoksano ayeghi shou alaushi kighishe akeu eno timiqo mulolo alhoksa likhi pulhapuju kumsu hawo akeu AMPEU Alhou no ithuluve.

⁶Kushiniye ayeghilo timi lhosu kela ipi AMPEU ye pa mlo kighishi shiauve eno tino pamlo putakihi auve.

⁷Ikehu pano pi, “Ayeghi shou timi lhoxu lhosu puakeu ino puhavenie. Timi na, tughashi na, itikiche na aghauqo pinamu ino kumtsu pughavenie, kughengu ino panongu lhokeulo imlo kighishipu auvae.”

⁸Ikemu AMPEU no Noha ye kupuqhiyi ithulue.

⁹Hipaqono Noha laghaqo: Pano anu kuthu shie, Shem ngo Ham eno Jafet. Noha ye pano tiqhelimi gholo pa likhino amikuchou eno kikhikighiue, paye Alhou sasu kuposhughi xu ache.

¹¹Alhou zulo ayeghiqha kumtsu shikupsapu shiauve eno hekiqhi bukiqhino chhitoive.

¹²Alhou no ayeghiqha jukelo ti shikupsapu shive, kughengu ayeghilo timi kumtsu pututa shelo shikupsapu shiwoveke.

¹³Ike Alhou no ishi Noha vilo pi, “Timi lhoxu kumtsu ghavenikeu izulo auvae kughengu panongu vechewo ayeghilo hekiqhi bukiqhi chhitoivae, Julo, ino panongu ayeghi lono kutsaveniae.

¹⁴Osala suchosu suwo ashukaki lakhi shilo, tile kokuthabo shilo, eno ata pesu alou eno ashou mekhalo.

¹⁵Ashukakiye hipahi shilo: akushu launo miter 133, akije launo miter muku kini eno akiqhe launo miter chighikuthu.

¹⁶Ashuka nhaqhi kepu shilo eno nhaqhi kepu ngo ashukaki kichi dolo miter tuxa akighipe shewolo. Akijolha kuthu shilo eno ajibolono ahukikha shelo.

¹⁷Julo, ino ayeghi shou azu kuqo sughini cheni. Atsutsu qholo eno ayeghi shou atuthu sheakeu lhoxu thaqhu kumtsu puhaveni eno thive nani.

¹⁸Ikemu osasu ino puloshoqhi lakhi shini, no ngo onuliqo, onipu eno anunoqo nipu ngo ishi ogholono ashukakilo iloluve ni.

¹⁹Akuxu akeu lhoxu jeli kumtsu lono kinini sawo ashukalo sulo. Panongu ogholo puxupe puanike ghenguno tuna lakhi khi shilo.

²⁰Aghauqo jeli, tughashi qo jeli, eno ayeghilo itikiche qo jeli kumtsu lono kinini ogholo saghilo ti puxupe puanike.

²¹Achuqupu aghikeu jeli kumtsu pekutsu sawo ogholo qhilulo, tino osala eno panongu sala achuqupu shilu nani.”

²²Alhou no pavilo shilo pikeu toi Noha no ti kumtsu shie.