Read Sumi Naga BOTHUBO 7 Bible Online

BOTHUBO 7 - Sumi Naga bible

BOTHUBO 7

¹AMPEU no Noha vilo pi, “No eno okibolomi kumtsu ashukaki lo ilovelo, kughengu hipau tiqhelimi gholo olikhino izulo amikuchou shi aghi keu ino ithulue.

²Mithemighe keu tughashi eno tikishi jeli lakhi khi lono tuna tsunini atsu ngo aqu sawo ogholo qhilo, ikemu mithekumo tughashi eno tikishi jeliye ajeli lakhi khi lono tuna lakhi sawo qhilo.

³Aghau jeli lono ghi adu aqu ishi tuna tsunini sawo qhilo. Tishianguno itaghi ayeghi shou lhoxu puxupe puanike eno ati kughukolu penike.

⁴Kughengu atsala tsuni likhivae eno pucho tsala lhobidi eno putho tsala lhobidi ino ayeghi shou tsutsughu ghupe nani eno ino lhophe puakeu akuxu akeu thaqhu ayeghi shouno pughaveni cheni.”

⁵Ike AMPEU no shilo pikeu toi Noha no ti kumtsu shie.

⁶Kughou ayeghi shou azukuqo ighikeno Noha ye apunu mipe 600 shiae.

⁷Eno azuyimikeu zuuno Noha no pa nipu ngo pa nuliqo eno panongu nipu ngo ishi sasu pagholono ashukakilo ilove.

⁸Mithemighe keu tughashi ngo tikishi jeli gholono, mithekumo tughashi ngo tikishi jeli gholono aghau jeli gholono eno ayeghi shou itikiche lhoxu jeli gholono,

⁹tuna lakhi khi Noha gholo ashukakilo ilove, ti Alhou no shilopi keu toi.

¹⁰Ike atsala tsuni thiu azukuqo ayeghi shou ighie.

¹¹Noha no pa kuxu mipe 600 shi akelo eno aqhi akiniu ti moza qhilo atsala chighi akutsuni ni ayeghi qhou azupuki kumtsu mpakho lava vephe, eno atsutsulo akikighipe kumtsu khaqhive.

¹²Eno ayeghi shou atsala lhobidi putho pucho tsughuqhie.

¹³Tipa tsalanino Noha no panipu eno panu hipano kuthu Shem, Ham, Jafet eno panongu nipuqo ishi sasu pa gholono ashukakilo ilove.

¹⁴Tughashi jeli, tikishi jeli, itikiche lhoxu jeli eno aghau jeli kumtsu panongu gholo ilove.

¹⁵Atuthu akeu lhoxu jeli gholono kinini ighino Noha gholo ashukakilo iloe.

¹⁶Eno ighikeqo lhoxu jeliye tuna lakhi khie, tiye Alhou no pa vilo shilopikeu toi panonguno iloghie. Tileno AMPEU no pa khathasuve.

¹⁷Tithiuye ayeghi shou atsala lhobidi azuqo ae, eno azu kumzapu shive tino ayeghi shou ashukaki pukilhe ikuve.

¹⁸Azuno alau shi ilekitheve eno ayeghi shou kumzapu shive eno ashukakiye azu shou yipe kilhe auve.

¹⁹Azuno alau alau shi ilekitheve eno atsutsu qholo naghuto kiqhe kumtsu vesuwuve,

²⁰tino naghuto kutsuqaqo nguno alau miter tsuni ile kithe ikuve.

²¹Aghau pina, tikishi pina, tughashi pina, itikiche lhoxu pina eno timi pinamu, ayeghi shou lhoxu ithachekeqo kumtsu thikhave.

²²Ayeghi qhai kelo achekeu eno anigipe lono atuthu shechekeu lhoxu kumtsu thikhave.

²³Ayeghi shou akuxu akeu thime thaqhu kumtsu pughave, timi lono tughashi, tikishi eno itikiche lono aghau kutolo. Eno Noha ngo pagholo ashukakilo akeqo likhi puhamono ghulue.

²⁴Ayeghi shou atsala 150 azu haumono ae.