Read Sumi Naga BOTHUBO 8 Bible Online

BOTHUBO 8 - Sumi Naga bible

BOTHUBO 8

¹Alhou no ashukakilo Noha ngo tughashi tikishi eno lhoxu kumtsu kumsu chilelue. Pano ayeghi shou amlhu mulhuwu pe eno azuno isuilo kithe thuve.

²Ayeghi qhou azupuki, atsutsulo akikighipeqo khave, atsutsu lono tsutsughu lakhave;

³eno ayeghi shouno azu isukitheve eno atsala 150 thiuye ti isutave.

⁴Aqhi akutsuniu, ghileqhi lo tsala chighi akutsuni nilo ashukakino Ararat naghutolo wo ngolue.

⁵Azuno hakithe iqive, eno aqhi achighiu, Luu-qhilo tsala atughuni lono naghuto kutsuqa ithulue.

⁶Atsala lhobidi thiu Noha no ashukaki kighipe lhaphe, puzuuno pano mulape puakeu hu,

⁷eno pano agha lakhi puwue. Tino ayeghi shou azu haumoke kuto yeiqhoiqi auve.

⁸Tile Noha no azu haiqive akemo kela juniye miqhedu lakhi puwue,

⁹ikemu azuno ayeghi nhape akehu miqheduye kiulo nepukumo puzu ashukakilo ideghive. Tithiu pano pau chhopuwo miqhedu kughaluve eno ashukaki alou sasu luve.

¹⁰Pano itaghi atsala tsuni ngo apuzu miqhedu pipe;

¹¹miqheduno avelau pa lau ighi eno tipau hubo lo oliv nipa kughunu mighipe cheghi. Ikehu ayeghi shou azu hauvea kena pi Noha no ithive.

¹²Noha no itaghi atsala tsuni ngo apuzu miqhedu pipe, ikemu tiye pa lau ideghikithe move.

¹³Kughou Noha no apunu mipe 601 shi akeno, aqhi atughiu ghixuqhilo, atsala atughuni, ayeghi lono azu qhai hauve. Noha no ashukaki nhaqhikeu lhaveno jupuwo kelauye ayeghiqha qhaive aghikeu ithulue.

¹⁴Eno aqhi akiniu mozaqhilo atsala muku akutsuni nino ayeghi qhaive.

¹⁵Alhou no Noha putsaghi pi,

¹⁶“Onipu ngo onuliqo eno panongu nipuqo sasu ashukaki lono ipelo.

¹⁷Eno ogholo lhoxu akeqo kumtsu, aghau na, tikishi na tughashi na ayeghilo itikiche namu sasu ipeghivelo, tishianguno panonguno ati kughukono ayeghi shou nhakha wolu pelo.”

¹⁸Ikehu Noha no ashukaki lono pa nipu ngo, pa nuliqo eno panongu nipuqo sasu ipeghive.

¹⁹Tughashi, tikishi, aghau eno itikiche lhoxu kumtsu pututa jeli muqo shighi ashukaki lono ipeghive.

²⁰Noha no akumllagho kiptia lakhi AMPEU lau shitsue. Pano tughashi mithemighe keu ngo tikishi eno aghau kimthe jeli gholono lakhi khi sawo akiptia lono akuchopu pitikhavekeu kumllagho shitsue.

²¹Kughou AMPEU no tsungqu keu xo tsungulu keno, pa likhi pa putsaghi ishi pi, “Timi ghenguno niye khilemu ayeghi ghusho kithe mae; kughengu timiye alhothe aphi lono pa kukumsu alhoksa kepi ithi anie. Niye lhoxu kumtsu hipaphi shighi khilemu pughavekeu shikithe mae.

²²Ayeghi ake kutolo, ghixu tsala ngo ghile tsala eno akumko ngo akushu, mutsutsala ngo susutsala eno tsukuzu tsukuvu tsala ashekha shivemo nani.”