Read Sumi Naga SAMUEL AKINIU 10 Bible Online

SAMUEL AKINIU 10 - Sumi Naga bible

SAMUEL AKINIU 10

¹Tipathiu kushuwo kumolo Amunmi kukau Nahas thive, eno pa nu Hanun no akukau shiluve.

²Akukau David no pi, “Papu Nahas no isasu kusapau shicheke toi niye Hanun sasu shoupau shini.” Tighenguno David no aghinimi hapesu Hanun lau kimiyeke tsa pipuwu. Kughou panonguno Amun lo ighilukeno,

³Amunmi sakiphemino akukau vilo pi, “Noye David no opu gihu keu michipu lono pa ghinimi hipaqo hapesu kimiyekeu sutsa sughitsu anipi kumsukevilo. Khilemu tipau kiqi lono ighi amoe. Ikemu paye timi hipaqo hapesu aphughi hipau puju ighi ani, tishino ningu leveniyeke!”

⁴Tileno Hanun no David qemi kughaluveno panongu kichimhi tuxa miyevetsu eno panongu phikukuzu aikughi kutolo suxulave tsu panongu hachile puwove.

⁵Ikehu panonguye akilo idewonikeu ighono kujove. Kughou panongu lau kiu shivekeno David no chilu kemtsa panongu vilo akichimhi ipeghi khamphi loye Jerikho lo ngo aghilepi asutsa tsupuwuve.

⁶Amunmiye David pe panongu ghumi kughulhovea pi kumsu chilelu, ikehu panonguye Bethrehob eno Zoba lono Siriyami ghushimi 20,000 piqe sughi, Tob lono timi 12,000 eno akukau Maaka kudauno 1,000 ishi piqe sughi.

⁷David no tipau sutsa chiluno tipaqo lepenike ghenguno Joab gholono ghushimi kumtsu hapuwu.

⁸Amunmino panongu phughi Rabba lo ilochekeu laghilo panongu a kuto pesu ngokheluve, ipuzu kutamiqono Siriyami Tob, Maaka lono ighikeqo pelono aluza lono a-a kutopesu kheluvepe.

⁹Joab no pa ghumi ghushimino azuu ghi athiu ghi pa la thepe ngokhe akeu ithuluno Israilmi dolo ghushimi akiviuqo likhi kishepheluveno tipaqo pelono Siriyami ghushimi sasu kushopeni keu shive.

¹⁰Tinguno alau achili ghushimi ye pa thikuzuu Abishai pelono azakutsuu shino tipaqono Amunmi sasu kithe penikeu shive.

¹¹Joab no pa vilo pi, “Tsala Siriyamino itheqhiluwo cheghi aye noye ighino ikuphutsulo eno tsala Amunmino otheqhilu wocheghi aye ino ighino okuphu tsuni.

¹²Akumto shilulo eno amlo kuloghilulo! Niwu timi ghenguno aloqhi kichighini eno ningu Lhou phughiqo ghenguno akivishi aghu shini. AMPEU pulou mlalupeniu!”

¹³Tishino Joab ngo pawu timiqono lenike ghenguno azuu hukithishi Siriyamiye pokhave.

¹⁴Kughou Siriyamino povekeu Amunmino ti ithulukeno panongu ghi Abishai msano idechile susu aphughilo poilokhave. Tileno Joab no Amunmi sasu kumjo akeu lono xatsughu ighino Jerusalem lo idewove.

¹⁵Siriyamiye Israilmino panongu theqhiluve keu ithiveno panongu wu ghushimi kumtsu ku kutsuluve.

¹⁶Akukau Hadadezer pelono Siriyami khunoqo Eufrati ghoki au ajeu kudau ngo akhakeno tipaqo ku saghitsupe, ikehu panonguye Shoba zahkutsu qholono Helam lo ighiluve, paye Hadadezer Zoba lo akukau ghushimi shou zahtsuu ke.

¹⁷Hipau sutsa David no chiluke mtsa pano Israilmi ghushimi hekutsuno Jordan putha susu ikuno Helam lo Siriyami ghushimino kutopesu ngokhe akeu alo pa sasu kusho penikeu shi. Tishino tipau alono panongu aghu shithuve,

¹⁸tileno Israilmino Siriyami ghushimi hachile puwove. David ngo pawu timiqono Siriyami khurkulu sakichemi 700 eno khurshi ghushimi 40,000 pithivetsu eno panongu ghumi zahtsuu shi akeu Shobak ghi ghuzavetsu eno paye athiuye aghushiqa lono thive.

¹⁹Kughou Hadadezer qholo kukamino Israilmino panongu shou toluvekeu ithivekeno, panonguye Israilmi sasu vishoshiveno Israilmi qholo anikeu shiluve. Tinguno tilauye Siriyamiye Amunmi kuphumove.