Read Sumi Naga SAMUEL AKINIU 11 Bible Online

SAMUEL AKINIU 11 - Sumi Naga bible

SAMUEL AKINIU 11

¹Tipau mpe ghixu ghulokilo, kukami kumtsu aghu lauvekelo David no Joab ngo pa qholo kijemi eno Israilmi ishi ashou ipepe; panonguno Amunmi theqhiluveno Rabba phughi leae. Ikemu David ye khilaumu wumono Jerusalem lo ngoae.

²Ghulo lakhi avelau David ye puchou zuano ithughi puzu akukaki kunguu amlhu kutufuniye iku. Pano tipau lo ikuno hula-hilau chewoghi akelono pano pishipuwo totimi lakhi li ki lono azu kuchhu aghikeu ithulu. Liye ighono ajukivi.

³Tileno pano aghinimi lakhi hape liye khuu keno inijuwupe ikelo liye Eliam nga Bathsheba shi aghi eno liye Hatimi Uriya nipu shi aghie.

⁴David no aghinimiqo pelono li saghipenike hapuwu; ike panonguno pa lau li saghitsu eno pano li shipusave.(Tipa ghulokilo liye aqhilo shikimitheve chekeu do shiveno ngoae). Tishive kethiu liye akilo idewove.

⁵Tipathiu liye mishiuve ikehu lino tipau sutsa pesu David vilo pipuwu.

⁶Tileno David no asutsa lakhi Joab lau pipuwu: “Hi Hatimi Uriya ilau puwolo.” Tighenguno Joab no Uriya hapesu David lau puwo.

⁷Kughou Uriya no ighikeno David no pa vilo Joab ngo ghushimi akivishi akhanikema eno kiutoi aghu shilu anikyapi iniju.

⁸Tipathiu itaghi pano Uriya vilo pi, “Akilo wono ado kitila akulho qhilulo.” Uriya no cheve eno David no agho lakhi pesu pa kilo tsu puwo.

⁹Ikemu Uriya ye akilo womono akukaki khagholo akukau ghukhumi gholo zuve.

¹⁰Kughou Uriya no akilo womoe pikeu chilukeno David no itaghi pa vilo ishi iniju, “Noye ado kushuwo thiuno ide ighi anike ghenguno noye kushiye akilo womono aphi kya?”

¹¹Tileno Uriya no khochile, “Israilmi eno Judami kumtsu aghushiqalo ani eno Puloshoqhi Bohu ghi panongu gholo ani; iwu zahtsuu Joab ngo pa gholo kijemi kumtsu aluzaqalo aghazu shino ngo ani. Tishiaye niye kishino akilo wopuzu chu-sho eno inipu sasu zu alepikya? Akimthe jeli hupaqo kumtsu jeku ghi ino tushoqhi anike, niye khilemu tipaqo tishi mla amlae!”

¹²Tighenguno David no pi, “Tishiaye ishiye hile akulho qhivelo eno thoghiuye ino opelono idehuvepe nanike.” Ike Uriya ye Jerusalem lo tipa tsalani eno thoghiu ishi ngove.

¹³David no aghulhulo pa kusu eno pa shokumzuve. Ikemu tishi anamu Uriya ye tipaji ghi pa kilo womoe; wonike zuqhu paye akukakilo aghukhemi bolo pa zua lo zuve.

¹⁴Thoghiuye David no inaqheno yekili lakhi Joab lau yeveno tipau Uriya pelono suwo tsupenikeu shi.

¹⁵Pano hitoi yeve: “Khipa alono ighono aghu shikuchou shi ani keno tipa alo Uriya puwulo, tishino pa likhi tile qhivelo tishi keu lono pa heqhi pithive pekepu shilo.”

¹⁶Ike Joab no aphughi khikhi khasu pesu akeno, tipaulo pano Uriya hapuwu, pano tipa aloye aghumino ighono akumto shi akeu ithi ae.

¹⁷Kuchouno aghumi ghushimino aphughi heche khalacheu ipeghino Joab wu ghushimi sasu aghu shithuve; tishikeu lono David wu kijemi khami pithive eno Uriya ghi tipau gholono heqhi pithive.

¹⁸Tileno Joab no aghukishi ghili pesu David lau pithipuwu,

¹⁹eno pano aghinikishiu vilo hitoi mijetsu, “Nono aghukishi ghili akukau vilo pive kethiu,

²⁰paye amlo ide ovilo hishi inijuluvie, ‘Nonguye kushiye aphughi kupunukhoi panongu sasu kichighi kya? Panonguno akupuwu lono apiji nongu lau kapipe nani pikeu nonguye mtha keshea?

²¹Nonguye Gideon nu Abimelek kishi heqhi pithive keno tipau kumsumlave keshea? Paye Thebez lono topumi lakhino akupuwu lono asho kutsughupu tu pesu veqhi pithiveke. Tishiaye nonguye kishi puzu kupunukhoi ti akupuwu kudau wuvekya?’ Tsala akukauno hi iniju aye, pa vilo ‘Owu kijemi Uriya ghi heqhi pithivae,’ ipilo.”

²²Tighenguno aghinikishiuno Joab no pa vilo kiu pesu David vilo pithilo pi ahza tsukeno wuno hishi pi.

²³Pano pi, “Ni ghumiye ningu nguno akumtou kehu panonguno aphughi heche khalacheu ipeghiveno ni sasu aghu shithuve, ikemu ningu ghi panongu hachile susu aphughi khagho kutolo hale puwulue.

²⁴Tileno panonguno akupuwu tu lono panongu leghuthi ningu lau kapuwue, akijeu owu kijemi khami pithivae; eno owu kijemi Uriya ghi heqhi pithivae.”

²⁵David no aghinikishiu vilo pi, “Joab shikumto lo eno pa vilo khilemu amlo sakevilo pilo, kughengu aghushiqa loye khuuno thivenikeno kumu azuuye pimlae. Tighenguno alaushi aphughi lekitheno tipau leluvelo pilo.”

²⁶Kughou Bathsheba no li kimi thivae pikeu chilukeno lino pa kumsuqa.

²⁷Kughou amloksa do hecheve keno, David no li pelono akuka kilo ighive penikeu shive; eno liye pa nipu shiluve eno lino anu lakhi punu. Ikemu AMPEU ye David no kiu mlapuakeno tipaulo amlo qimono ae.